Buke zaMateusa 12:1-50
-
Jesus, “Hompa gEsabata” (1-8)
-
Mugara ga fa kuwoko tava mu verura (9-14)
-
Mukareli ogu ga hara Karunga (15-21)
-
Nompepo donondona tava di tjidisa kompepo zokupongoka (22-30)
-
Nzo ezi ava dili kugusira po (31, 32)
-
Sitji kusidimbwilira koyiyimwa yaso (33-37)
-
Sidiviso sokuhamena Jona (38-42)
-
Apa azi tengura mpepo zondona (43-45)
-
Ozina vaJesus novamumbya vendi (46-50)
12 Posiruwo simwe, Jesus kwa pitire novarongwa vendi momapya gorukokotwa mEsabata.* Ano varongwa kwa va kwete nzara makura tava tezagura rukokotwa va lye.
2 Apa Vafalisayi va yi mwene, tava mu tantere asi: “Tara si, varongwa woge kuna kurugana eyi va silika mEsabata.”
3 Age ta va limburura asi: “Nani kapi mwa resa eyi ga rugene Ndafita novantu vendi apa za va kwete nzara ndi?
4 Omu ga hwililire monzugo zaKarunga, va ka lye nomboroto donzambo,* edi va dilire kupulisira asi va di lye, ntudi vapristeli velike.
5 Ndi kapi mwa resa moVeta omu vapristeli ngava teza po Veta zEsabata montembeli, nye kapi ngava va pe unzoni?
6 Nye ame tani mu tantere asi ogu ga kara nomulyo kupitakana ntembeli pweli apa.
7 Nye one ngano kwa kwata egano eyi adi tanta nonkango edi asi: ‘Ame kwa hara nkenda, kapisi nonzambo,’ ngano kapi muna pangura ava va hana usima.
8 Yeeyi MunwaMuntu yige Hompa gEsabata.”
9 Apa ga tundire opo, ta hwilire mosinagoge zawo,
10 amo kwa kere mo mugara ogu ga fa kuwoko. Vena makura tava mu pura asi: “Va yi pulisira kuverura mEsabata ndi?” Yipo va mu gwanene po unzoni.
11 Age ta va limburura asi: “Nsene wa kara nonzwi makura zi gwire mekero mezuva lyEsabata, yilye pokatji keni na dira kuza a ka zi koke mo?
12 Pokatji komuntu nonzwi, yilye gomulyo po? Yipo nye, mEsabata kuvhura kurugana mo yoyiwa.”
13 Kutunda opo ta tantere mugara ogo asi: “Gonyonona kuwoko koge.” Makura age ta ku gonyonona, ta ku veruka, ta ku fana kukwawo.
14 Nye Vafalisayi tava pwaga va ka liyonge omu nava genda, va dipage Jesus.
15 Apa Jesus ga yi dimbwilire eyi, ta tundu po. Vantu wovanzi tava mu kwama, age makura ta va verura navenye,
16 nye ta va tantere asi va ha ka yi tantera vantu,
17 yipo di sike mo nonkango domuporofete Jesaya, ogu ga tente asi:
18 “Tara si, mukareli gwange ogu na horowora, yiyo na mu hara, ogu ga za nge komutjima. Ngani mu pa mpepo zange, nga ka divise nomuhoko youhunga.
19 Kapi nga tanguna ndi a zigagane, ntani hena nagumwe si nga zuvha ezwi lyendi mononzira.
20 Kapi nga teza ruu rokudifuka ndi a dimise kage* koramba, dogoro nga sikise mo uhungami.
21 Nomuhoko nadinye ngadi huguvara mwendi.”
22 Tava mu retere mutwiku ogu ga kere nompepo zondona ntani kapi nga uyunga, makura ta mu verura, ta mono, ta uyunga hena.
23 Mbunga nazinye tazi tetuka, tazi tanta asi: “Kapisi yige MunwaNdafita ogu?”
24 Apa Vafalisayi va yi zuvhire eyi, tava tanta asi: “Muntu ogu kapi a tjida mo nompepo donondona nononkondo dapeke, ntudi nedi daBelisebubu,* mupangeli gonompepo donondona.”
25 Apa ga divire eyi vana kugazara, ta va tantere asi: “Nkenye uhompa ou wa kara novantu ava ava lirwanesa kuhanauka po, ano sitata ndi embo omu mwa kara vantu ava lirwanesa, kuharagana po.
26 Mokulifana, nsene Satana kutjida mo Satana, age kulirwanesa mwene. Ngapi nye omu ngau karerera uhompa wendi?
27 Ntani hena, nsene asi ame nompepo donondona kuditjida mo nononkondo daBelisebubu, awo varongwa veni nononkondo dalye ava di tjidisa mo? Eyi yiyo ngava mu dimbwilira asi mepuko mwa kara.
28 Nye nsene asi ame nompepo zaKarunga ani tjida mo nompepo donondona, diveni asi Uhompa waKarunga una wiza nye one noku yi dimburura si.
29 Ndi ngapi muntu na vhura kuhwilira monzugo zomugara gononkondo a ka mu hakane yininke yendi, ntudi a hove tanko kumupandeka, ntani nye na vhura kukagusa yininke monzugo zendi.
30 Ogu ga dira kuhamena kwange, kurwanesa nge, ntani ogu a dili kupongaika vantu kumwe name, kuvahanagura po.
31 Eyi yiyo nina kumutantera asi nkenye nzo neswau, vantu kuvhura kuyivadongwenena po, nye ogu a swaura mpepo zokupongoka kapi ngava mu dongwenena po.
32 Pasihonena, ogu a swaura MunwaMuntu, kuvhura kumudongwenena po, nye ogu a swaura mpepo zokupongoka, kapi ngava mu dongwenena po, yi kare asi mouzuni ou ndi wokomeho.
33 Nsene sitji siwa, yiyimwa yaso nayo ngayi kara yoyiwa, ano nsene sidona, yiyimwa yaso nayo ngayi kara yoyidona. Yeeyi koyiyimwa yaso yiko ava dimbwilire sitji.
34 One vana wonombaroka, ngapi omu nomu vhura kuuyunga yoyiwa, one nyamweni mu vadona? Morwa eyi ya zura momutjima, kana yiyo aka pwagesa yooyo.
35 Muntu gomuwa kuuyunga yoyiwa eyi ya kara momutjima gwendi, ano muntu gomudona kuuyunga yoyidona eyi ya kara momutjima gwendi.
36 Nye ame tani mu tantere asi mEzuva lyoMpanguro vantu ngava ka va pangwira nkenye nkango za hana mulyo ezi ava uyunga,
37 yeeyi kononkango doge yiko ngava ku dimbwilira asi wa hungama, ano kononkango doge yiko hena ngava ku pangwisa kooko.”
38 Makura valirongi womatjangwa noVafalisayi vamwe tava mu tantere asi: “Murongi, tuna hara o tu likide ko sidiviso.”
39 Age makura ta va limburura asi: “Vantu wovadona wokudira kulimburukwa Karunga yiwo ava puragere yidiviso. Nye kwato sidiviso esi ngava va pa, ntudi sidiviso sokuhamena muporofete Jona.
40 Yeeyi, moomu tupu ga kere Jona nomutenya ntatu nomasiku gatatu mezimo lyemumfi, naMunwaMuntu yimo ngorooro nga kara nomutenya ntatu nomasiku gatatu montoko.
41 Mezuva lyompanguro, Vaninivhe ngava ka va vhumbura kumwe novantu ava makura ngava va pe usima, yeeyi awo kwa litezwilire apa ga va zuvhisilire Jona. Nye tareni! Ogu ga pitakana Jona gogu apa.
42 Hompa gomukadi gokoMbindakano ngava ka mu vhumbura mezuva lyompanguro a pe usima vantu ava, yeeyi age kwa tundire koure a ya purakene kounongo waSaromo. Nye tareni! Ogu ga pitakana Saromo gogu apa.
43 Apa mpepo zondona azi tundu momuntu, azo kurenda-renda momburundu, zi papare evega oku nazi ka kara, nye apa nazi dira kugwana evega olyo,
44 makura tazi tanta asi: ‘Tani zi membo lyange omu na tundire.’ Ano eyi nazi wiza ngoso, kuyagwana membo mwato yuma, vana li kombo nokuliwapeka.
45 Makura tazi zi nye zi ka rete ko nompepo dapeke ntambali donondona unene kuzipitakana. Makura tadi hwilire, di tunge mo. Ukaro wokuhulilira womuntu ogo kuyadonapa unene kupitakana womuhowo. Novantu ava wovadona yimo ngava kara.”
46 Posiruwo esi Jesus ga uyungisire mbunga, nani ozina novamumbya vendi kuna sikama ponze, vana hara kuuyunga nendi.
47 Makura gumwe ta mu tantere asi: “Tara! Onyoko novamumbya woge ponze vana kara, vana hara kuuyunga nove.”
48 Age makura ta mu limburura asi: “Oyina hena wolye? Nowo vamumbya vange hena wolye?”
49 Makura ta gonwene kuwoko kwendi koyiha yovarongwa vendi, ta tanta asi: “Tareni, onane novamumbya vange vava!
50 Yeeyi nkenye ogu a rugana mpango zoTate vemeguru, yige mumbyange nampanzange nonane.”
Nonkango dokonhi
^ Alyo kwa kere ezuva lyauntambali mosivike koVajuda.
^ Ndi “nomboroto delikido.”
^ Kage kuna kara site soramba esi sina kuhara kudima.
^ Edina limwe lyaSatana.
