Buke zaMateusa 13:1-58
-
YIFANEKESO YOUHOMPA (1-52)
-
Mukuni (1-9)
-
Eyi Jesus nga ruganesere yifanekeso (10-17)
-
Sifanekeso somukuni tava si faturura (18-23)
-
Rukokotwa nowayi (24-30)
-
Huma zomositareta noyihaheso (31-33)
-
Yifanekeso kwa sikisire mo uporofete (34, 35)
-
Sifanekeso sorukokotwa nowayi tava si faturura (36-43)
-
Ugawo ou wa horama ntani mbamba zongwa (44-46)
-
Ekwe (47-50)
-
Kuhorora yoyipe neyi yanare pougawo (51, 52)
-
-
Jesus tava mu nyoka mositata esi ga kulira (53-58)
13 Ezuva olyo, Jesus ta pwaga membo olyo, a ka hingire kefuta.
2 Mbunga zonene tazi ya mu pongere, ano morwa eyi, age ta rondo mowato, ta hingire. Mbunga nazinye zovantu makura tazi sikama pezenga.
3 Makura ta va tantere yininke yoyinzi moyifanekeso asi: “Mukuni gumwe kwa zire a ka kune.
4 Haga za mokukuna, mbuto zimwe tazi gwire konontere donzira, makura yidira tayi wiza, tayi zi li po.
5 Ano mbuto zimwe tazi gwire poyingurumanya apa pwa dilire kukara evhu lyenzi, makura tazi mene usimbu morwa evhu lyapo esesu unene.
6 Nye apa lya sire ezuva, tali hwike mbuto, makura tazi suwu nokukukuta morwa kapi za kere nonondandani.
7 Ano mbuto zimwe hena tazi gwire momega, eyi ga kura, ta ga zi kondere zi dire kukura.*
8 Ezi zimwe tazi gwire pevhu lyewa, tazi reta nondanda 100 kupitakana pwanare, ezi zimwe 60 ano zimwe 30.
9 Ogu ga kara nomatwi, a zuvhe.”
10 Varongwa tava wiza, tava ya mu pura asi: “Morwasinke ono kuuyungira nawo moyifanekeso?”
11 Age makura ta va limburura asi: “One Karunga ga mu vatera mu kwate egano yihoramo yoUhompa wemeguru, nye awo kapi va va vatera.
12 Yeeyi ogu ga kara noyuma, ngava mu pa yoyinzi, makura ngayi mu vhukire, ano ogu ya dira, ngava mu gusa nayeeyi ga kara nayo.
13 Yiyo nye ani va uyungilire moyifanekeso, yeeyi nampili va tare, nye ngwendi kapi vana kumona, va zuvhe, nye ngwendi kapi vana kuzuvha va yi kwate egano.
14 Uporofete waJesaya kuna kusika mo asi: ‘Komatwi ngomu zuvhisa, nye kapi ngomu yi kwata egano; komeho ngomu taresa, nye kapi ngomu yi mona.
15 Yeeyi nomutjima domuhoko ogu nonkukutu. Ame nokuvhura si kuvaverura, morwa awo kuzuvha nye kapi ava yi kwama. Awo kuferera va dire kumona ntani kumbandera matwi gawo va dire kuzuvha, va dire kuyikwata egano yipo va dire kulitezurura.’
16 Nye one vanerago morwa meho geni kumona, ano ga kare matwi geni kuzuvha.
17 Yosili nina kumutantera asi vaporofete novahungami wovanzi kwa here kumona eyi muna kumona, nye kapi va yi mwene, awo kwa here kuzuvha eyi muna kuzuvha, nye kapi va yi zuvhire.
18 Purakeneni kuhamena sifanekeso somukuni.
19 Mbuto ezi va kunine konzira kuna kara muntu ogu a zuvhu nonkango doUhompa, nye a dire kudikwata egano. Muzonaguli makura ta wiza, ta ya hakana mo momutjima gwendi nonkango edi vana kunu mo.
20 Ano mbuto ezi va kunine poyingurumanya, googu a zuvhu nonkango makura nare ana di tambura nehafo.
21 Nye morwa kudira nondandani mwamwene, age kukura tupu pokaruwogona. Ano nsene pa wiza maudigu nomahepeko morwa nonkango daKarunga, age ta hageke kudikwama.
22 Mbuto ezi va kunine momega, googu a purakene nonkango daKarunga, nye sinka seyi youzuni* ou nedowo lyemona tayi dipaga* nonkango edi ga zuvha, makura kapi ta reta hena mbuto.
23 Ano nye mbuto ezi va kunine pevhu lyewa, googu a zuvhu nonkango odo nokudikwata egano. Ogu yige nye a yimi, age kureta nondanda 100, gumwe 60, ano gumwe 30.”
24 Age kwa va tanterere sifanekeso simwe hena asi: “Uhompa wemeguru kwa lifana nomuntu ogu ga kunine mbuto zongwa mepya lyendi.
25 Apa vantu va rere, nkore zendi ta zi wiza, ta zi ya kunu wayi* mokatji korukokotwa makura ta zi ka za.
26 Ano apa mbuto za kulire zi vhare, wayi nawo makura tau moneka mo.
27 Vakareli vanturagumbo tava wiza, tava ya mu pura asi: ‘Nturagumbo, nani kapi wa kunine mbuto zongwa mepya lyoge? Ngapi nye omu una kara mo wayi?’
28 Age ta va limburura asi: ‘Nkore zange ga yi rugana eyi.’ Vakareli tava mu pura asi: ‘Kuvhura tu ka ga pongaike mo ndi?’
29 Age ta va limburura asi: ‘Hawe, apa nomu ka dura mo wayi, neisi nomu ka dulilira norukokotwa.
30 Yi sigeni yi kulire kumwe dogoro pokuteza-teza, ntani nye ngani tantera vatezi asi pomuhowo, pongaikeni wayi, mu u mangaike moyitungu, mu u hwike, ano rukokotwa ru twareni kosihete sange.’”
31 Age ta va tantere sifanekeso simwe hena asi: “Uhompa wemeguru kwa lifana nohuma zomositareta ezi ga kunine muntu mepya lyendi.
32 Azo mbuto zonunu po ponombuto nadinye. Nye nsene zina kuru, kupitakana yimeno nayinye, makura tazi kara sitji sosinene, yidira tayi wiza yi ya tunge yikorogo konomutayi daso.”
33 Age ta va tantere hena sifanekeso simwe asi: “Uhompa wemeguru kwa lifana noyihaheso eyi ga gusire mukadi, ta yi rungu moyipako yitatu yoyinene yousura, makura ta yi hahesa usura naunye.”
34 Jesus kwa yi va tanterere nayinye oyo moyifanekeso. Kapi nga uyunga nawo ga hana kuruganesa yifanekeso
35 yipo di sike mo nonkango edi ga uyungire muporofete asi: “Ame ngani uyunga moyifanekeso, ngani divisa yininke eyi ya horama kutunda ketameko lyouzuni.”
36 Konyima zokurekera mbunga, ta zi kembo. Varongwa vendi tava mu hedere, tava mu pura asi: “Tu fatwilira sifanekeso sowayi wemepya.”
37 Age ta va limburura asi: “MunwaMuntu yige mukuni gombuto zongwa,
38 ano epya, yiwo uzuni ou. Mbuto zongwa, vaava va hamena koUhompa, nye wayi, vaava va hamena koMuzonaguli,
39 nkore ezi za ya kunine mo wayi, kuna kara Muzonaguli, muzangu kuna kara uhura wouzuni,* ano vatezi yiwo vaengeli.
40 Moomu tupu ava pongaike wayi va u hwike momundiro, nopouhura wouzuni* yimo ngayi kara.
41 MunwaMuntu nga tuma vaengeli vendi, va ya pongaike nokugusa ko koUhompa wendi vapukisi nava ava teza po veta zaKarunga
42 ngava va zugumina momundiro. Mwina yimo ngava lilira oku tava likwetja komazego.
43 Posiruwo oso, vahungami ngava paima ngwendi ezuva moUhompa waGuhyawo. Ogu ga kara nomatwi, a zuvhe.
44 “Uhompa wemeguru kwa lifana nougawo ou wa horama mepya, ou ga gwene mugara makura ta u horeke. Age kwa hefe unene makura ta zi a ka randese nayinye eyi ga wekere, ta ya randa olyo epya.
45 “Uhompa wemeguru kwa lifana hena nomurandesi ogu a papara nombamba donongwa.
46 Apa na gwana mbamba zimwe zomulyo gomunene, ta zi ta ka randesa emona lyendi nalinye, ta ya zi randa po.
47 “Uhompa wemeguru kwa lifana hena nekwe eli va tegere mefuta, makura tali kwata marudi nagenye gonomfi.
48 Apa lya zulire, tava li kokere pezenga, tava hingire va horowere nomfi donongwa moyipako, ano donondona tava di zugumine kwina.
49 Yimo ngorooro ngayi kara pouhura wouzuni.* Vaengeli ngava wiza, tava ya hangura wovadona kovahungami,
50 ngava va zugumina momundiro. Mwina yimo ngava lilira oku tava likwetja komazego.
51 “Yininke eyi nayinye muna yi kwata egano ndi?” Awo tava mu limburura asi: “Nhi, Hompa.”
52 Makura age ta va tantere asi: “Nsene asi yimo ngoso, nkenye murongi ogu ava rongo kuhamena Uhompa wemeguru, kwa lifana nanturagumbo ogu a horora yoyipe neyi yanare eyi ya kara pougawo wendi.”
53 Apa Jesus ga mene kuuyunga yifanekeso oyo, makura ta tundu po.
54 Apa ga ka sikire mositata esi ga kulira, ta tameke kuvaronga mosinagoge zawo, makura ta yi va tetukisa, tava lipura asi: “Kupi ga gwana ogu mugara ukonentu ou nononkondo dokurugana yitetu?
55 Nani kapisi munwamuhongi goyikungu ogu? Nani ozina kapisi Mariya? Vamumbya vendi nani kapisi Jakopo naJosefa naSimoni ntani Judasa?
56 Vampanza vendi nani kapisi vaava twa kara nawo? Oku ga gwana yininke nayinye eyi kupi ko?”
57 Makura kapi va mu purakenene hena. Nye Jesus ta va tantere asi: “Muporofete kapi a fumanene mositata esi ga kulira nemembo lyendi.”
58 Age kapi ga ruganenene mo yitetu yoyinzi, morwa awo kapi va kere nepuro.
Nonkango dokonhi
^ Ndi “tazi fu nsine.”
^ Ndi “tazi dipagere nsine nonkango.”
^ MoRugereka kwa tamba mau ndi wayi wouhungu ou ngau mene moIsraeli, awo kumoneka ngwendi rukokotwa.
