Buke zaMateusa 14:1-36
14 Posiruwo oso, Herodesa ogu nga pangere mukunda gwaGalireya, kwa zuvhire eyi nga rugana Jesus,
2 makura ta tantere vakareli vendi asi: “Ogu yige Johanesa Mukuhwi ogu va pindura koufe, eyi yiyo ana kuruganena yitetu.”
3 Herodesa kwa tulisire Johanesa modorongo morwa Herodiyasa, ogu ga kere nare mukadamukurwendi Filipusa.
4 Johanesa nga tantere Herodesa nkenye apa asi: “Kapi ya liza noveta asi o kware ogo mukadi.”
5 Nampili ngomu ga here kudipaga Johanesa, age kwa tjilire vantu, morwa ngava gazara asi Johanesa muporofete.
6 Nye mezuva lyosipito sehampuruko lyaHerodesa, munwaHerodiyasa gomukadona kwa dene monkedi ezi za hafesere unene Herodesa,
7 makura ta mu tumbwidire nomugano asi na mu pa nkenye eyi na hundira.
8 Morwa ezedagwiro lyozina, ta tanta asi: “Tulireni nge apa porupasa mutwe gwaJohanesa Mukuhwi.”
9 Hompa makura ta guwu unene, nye morwa ga gene ntani ava va kere posipito va yi zuvhire, ta tokora asi va gu mu pe.
10 Makura ta tumu ko mukwayita a ka tete mutwe gwaJohanesa moomo modorongo.
11 Mutwe gwendi tava gu reta porupasa, tava gu pe mukadona, age nage ta gu twara kozina.
12 Konyima, varongwa vaJohanesa tava wiza nokuyagusa simpu sendi va ka si vhumbike makura tava zi va ka yi tantere Jesus.
13 Apa Jesus ga yi zuvhire eyi, makura ta tundu po nowato, ta zi kevega lya hana muntu a ka kare gelike. Nye vantu apa va yi zuvhire, tava tundu moyitata yawo va mu sikure porupadi.
14 Apa ga ya hegekere wato, ta mono mbunga zonene zovantu, ta va fire nkenda, makura ta verura vaveli vawo.
15 Nye apa lya gombokere, varongwa vendi tava mu wizire, tava ya mu tantere asi: “Evega eli amesi kwato ogu ga tunga mo,* alyo hena nare lina toko. Ninka vantu va ze konomukunda dopopepi, va ka lirandere nondya.”
16 Nye Jesus ta va tantere asi: “Kapi va hepa kuza, nyone nomu va pa nondya.”
17 Awo tava mu limburura asi: “Ose kuna kara tupu nonomboroto ntano nonomfi mbali.”
18 Age ta va tantere asi: “Di retereni nge oku.”
19 Makura ta tantere mbunga zi hingire powayi. Ta gusa nomboroto odo ntano nonomfi mbali, ta tara keguru, ta kanderere, makura ta di bamagura nokudipa varongwa vendi va di gavere kovantu.
20 Navenye kwa lire tava kuta, eyi ya hupire po tava yi pongaike, tava zwida yikumba 12.
21 Ava va lire kwa kere vagara wokusika poyiha 5 000, nsene o dira kuvarura ko vakadi novanona.
22 Poopo ngoso, ta tantere varongwa vendi va ronde mowato, yipo va rute mesinya mwina, siruwo esi ana kutantera mbunga zi ze.
23 Apa za liharaganene mbunga, makura ta zi gelike kondundu a ka kanderere. Lya litokerere, age gelike oko.
24 Apa wa ka sikire wato pokatji kefuta, ta u hara kudama morwa mpepo zonene nomankumpi.
25 Ano momasasiku* ta va wizire, age kuna kugenda pomema.
26 Apa varongwa va mwene ngwendi muntu ana kugenda pefuta, tau va kwata woma makura tava takuma.
27 Nye Jesus ta va tantere asi: “Nyame, mwa ha tjira.”
28 Peturusa ta mu tantere asi: “Hompa, nsene asi nyove, ninka nge name ni gende pomema, ni wize koge.”
29 Age ta tanta asi: “Wiza!” Peturusa makura ta tundu mo mowato, ta gendi pomema, a ze kwaJesus.
30 Nye apa ga mwene emumpepo kuna kudida, ta tukuka unene. Apa ga tamekere kudama, ta zigire asi: “Hompa, popera nge!”
31 Poopo ngoso, Jesus ta gonona kuwoko kwendi a mu nyangure, makura ta mu tantere asi: “Morwasinke ono singanyekere? Epuro lyoge esesu.”
32 Konyima zapa va rondere mowato, emumpepo tali litura.
33 Varongwa ava va kere mowato, tava ya mu tongamene* oku tava tanta asi: “Hawe, nani yosili ove MunwaKarunga.”
34 Makura tava rutu, tava ka hegeka koGenesareta.
35 Apa va mu dimbwilire vantu womosirongo oso, tava tumu mbudi konomukunda dopopepi, makura vantu tava mu retere vaveli navenye.
36 Awo kwa mu likwamberere asi va kwate tupu nampili kononyerera dosikoverero sendi ano nkenye ogu ga kwete ko, kwa verukire.
Nonkango dokonhi
^ Ndi “evega lyomapuku.”
^ Kwa tamba koyiha yovili 3 ngurangura dogoro koyiha yovili 6 apa ali pumu ezuva.
^ Ndi “nyongamene.”
