Buke zaMateusa 15:1-39
15 Vafalisayi vamwe novalirongi womatjangwa ava va tundire koJerusarema kwa hederere Jesus makura tava mu pura asi:
2 “Morwasinke varongwa woge ava dilire kukwama mpo zozinyakurwetu? Pasihonena, apa ava li nondya, kapi ava likuhu komawoko kuliza nompo zozinyakurwetu.”
3 Age makura ta va limburura asi: “One morwasinke omu tagurukire sipango saKarunga morwa nompo deni?
4 Pasihonena, Karunga kwa tanta asi: ‘O fumadeke oguho nonyoko,’ ntani asi: ‘Ogu a swaura* oguhwe ndi ozina, va mu dipage.’
5 Nye one kutanta asi: ‘Nkenye ogu a tantere oguhwe ndi ozina asi “eyi nina kara nayo yokuvhura kumukwafesa kapi tani vhuru kuyimupa morwa na yi tumbwidira mokuyigava kwaKarunga,”
6 gwangesi asi kapi hena ga hepa kupakera oguhwe nozina mbili.’ Yimo nye omu pukisa ngesi nonkango daKarunga morwa mpo zeni.
7 Kwa yi lipaka mwa yi lipaka! Jesaya nyone ga tembe nawa-nawa apa ga pumbire asi:
8 ‘Vantu ava kufumadekesa nge tupu konomurungu, nye nomutjima dawo ure name.
9 Ukareli wawo kwato mulyo kwange, morwa awo kuronga noveta dovantu ngwendi asi daKarunga.’”
10 Makura ta zigida mbunga zovantu, ta zi tantere asi: “Purakeneni, one mu yi kwate egano:
11 Eyi ayi zi mokana kapisi yiyo ayi nyateke muntu, nye yeeyi ayi tundu mokana, yiyo ayi mu nyateke.”
12 Varongwa vendi tava mu hedere makura tava mu tantere asi: “Nye ono yi diva tupu asi Vafalisayi kuna va koro eyi ono uyunga?”
13 Age ta va limburura asi: “Nkenye simeno esi ga dira kukuna Tate gemeguru, nga si dura mo.
14 Va sigeni tupu. Awo kwa twika, yiyo hena ava pitisire vatwiku. Nsene mutwiku a pitisira mutwiku mukwawo, navenye tava gwire mekero.”
15 Makura Peturusa ta tanta asi: “Tu fatwilira sifanekeso esi.”
16 Nye age ta va tantere asi: “Nani none kapi muna yi kwata egano?
17 Kapi mwa yi diva asi nkenye eyi ayi zi mokana, mezimo tanko ayi zi, ntani nye vana kuyipwagesa mo?
18 Nye eyi ayi tundu mokana, komutjima ayi tundu, eyi yiyo nye ayi nyateke muntu.
19 Pasihonena, momutjima yimo amu tundu magazaro gomadona aga: edipago noruhonda* noyirugana yapeke yokunyata nowidi noyimpempa nokuswaura Karunga.
20 Eyi yiyo nye ayi nyateke muntu. Nye yokulya nomawoko aga vana dili kukuhwa pampo, kapisi yiyo ayi nyateke muntu.”
21 Kutunda opo, Jesus makura ta zi momukunda gwaTirusi naSidoni.
22 Makura mukadi gumwe gomomukunda gwaFonisiya, ta mu zigire asi: “Hompa, MunwaNdafita, fira nge nkenda! Munange gomukadi kuna kuhepa unene kompepo zondona.”
23 Nye age kapi ga mu limbwilire. Varongwa vendi makura tava mu hedere, tava mu tantere asi: “Mu ninka a ze, yeeyi age kuna kutukwama-kwama, ta tu zogerere.”
24 Nye age ta limburura asi: “Karunga kwa tuma nge ni ya vatere tupu Vaisraeli ava va kara ngwendi nonzwi dokuzumbana.”
25 Nye mukadi ta wiza a ya mu tongamene,* ta uyunga asi: “Hompa, kwafa nge!”
26 Age ta mu limburura asi: “Kapi ya wapa kugusa mboroto zovanona o zi zugumine yimbwagona.”
27 Age ta tanta asi: “Ani yimo Hompa, nye yimbwagona nayo kulya ruvhugunyu oru a sigisa po hekurwayo.”
28 Jesus makura ta mu tantere asi: “Epuro lyoge enene unene, yi ku horokere moomu ono hara.” Ruveze rooro, munendi ta veruka.
29 Apa Jesus ga tundire opo, ta wiza kefuta lyaGalireya, makura ta rondo kondundu, ta hingire.
30 Makura mbunga zovantu tazi mu wizire, azo kwa pitwire yirema, yipuru-puru, vatwiku nava ava dili kuuyunga ntani navamwe wovanzi ngoso. Tava va tura konompadi dendi, makura age ta va verura.
31 Mbunga kwa tetukire unene apa za mwene ava ava dili kuuyunga kuna kuuyunga, yirema kuna kuveruka, vatwiku kuna kumona, makura tava fumadeke Karunga gwaIsraeli.
32 Jesus ta zigida varongwa vendi, ta va tantere asi: “Vantu ava ame kuna kuvafira nkenda morwa mazuva gatatu vana kara pwange awo va hana kulya. Ame kapi nina hara asi va tengure ngorooro nonzara zawo, kuvhura va fire sikatji.”
33 Nye varongwa vendi tava mu pura asi: “Kupi natu gwana nomboroto dononzi dokuvhura kukutika mbunga zokuhura apa momburundu zangesi?”
34 Jesus ta va pura asi: “Nomboroto dingapi muna kara nado?” Awo tava mu limburura asi: “Ntambali, notumfi tungapi tupu.”
35 Konyima zokutantera mbunga zi hingire pevhu,
36 ta gusa odo nomboroto ntambali nonomfi. Apa ga mene kupandura oGuhwe, ta di bamagura ta di pe varongwa va di gavere kovantu.
37 Navenye kwa lire tava kuta, tava pongaike yikumba yoyinene ntambali yonondya edi da hupire po.
38 Vantu ava va lire kwa kere vagara 4 000, nsene o dira kuvarura ko vakadi novanona.
39 Konyima zokurekera vantu, makura ta rondo mowato a ze komukunda gwaMagadani.
