Buke zaMateusa 16:1-28
16 Vafalisayi noVasadukayi kwa mu hederere, va ya mu heteke, pokumupura a va likide sidiviso seyi yekeguru.
2 Nye age ta va tantere asi: “Nsene ngurova one kutanta asi ‘mungura ngaku wapa, yeeyi keguru kuna gehe,’
3 ano kongurangura one kutanta asi: ‘Taku kara ekundungu nomvhura morwa keguru kuna gehe ntani kuna sovagana.’ One kwa diva kufaturura nawa yimoneka yekeguru, nye yidiviso yomaruveze aga kapi mwa yi diva.
4 Vantu wovadona wokudira kulimburukwa Karunga yiwo ava puragere yidiviso. Nye kwato sidiviso esi ngava va pa, ntudi sidiviso sokuhamena Jona.” Makura ta va sigi, ta ka za.
5 Apa va ka sikire mesinya mwina, varongwa nani vana divara kusimba nomboroto.
6 Jesus ta va tantere asi: “Takameseni kuhamena yihaheso yoVafalisayi noVasadukayi.”
7 Makura tava tameke kuliyonga asi: “Tuna divara nomboroto.”
8 Apa Jesus ga yi dimbwilire, ta va tantere asi: “One vepuro lyesesu, yisinke muna kuliyonga ngoso, yeeyi muna dili kusimba nomboroto ndi?
9 Nani simpe kapi muna yi kwata egano, ndi kapi muna kudiworoka nomboroto ntano edi da kutikire vantu 5 000, nani yikumba yingapi ya zulire koruhupwa oru mwa pongaikire?
10 Ndi kapi muna kudiworoka nomboroto ntambali edi da kutikire vantu 4 000, nani yikumba yingapi yoyinene ya zulire koruhupwa oru mwa pongaikire?
11 Kapi nani muna yi kwata egano asi kapisi mboroto nina tamba pokumutantera asi: ‘Omu takamese yihaheso yoVafalisayi noVasadukayi?’”
12 Makura tava yi kwata egano asi kapi ana tamba asi va likunge koyihaheso yomboroto, nani nye kerongo lyoVafalisayi noVasadukayi.
13 Apa Jesus ga ka sikire mosirongo saKesareya Filipi, ta pura varongwa vendi asi: “Ngapi omu vantu ava gazara kuhamena MunwaMuntu, asi yige yilye?”
14 Awo tava limburura asi: “Vamwe asi yige Johanesa Mukuhwi, nye ava vamwe asi Eliya, ano vamwe asi Jeremiya ndi muporofete gumwe ngoso.”
15 Age ta va pura asi: “One omu omu gazarere nge asi nyame yilye?”
16 Simoni Peturusa ta limburura asi: “Nyove Kristusa, MunwaKarunga gomunamwenyo.”
17 Makura Jesus ta mu limburura asi: “Munerago ove Simoni zaJona. Kapisi muntu ana ku vatere o yi kwate egano nye Otate vemeguru.
18 Nye ame tani ku tantere asi ove nyove Peturusa,* ano pemanya eli yipo ngani dikira mbungakriste zange ano Mayendo* kapi ngaga zi funda.
19 Ame ngani ku pa nonsapi doUhompa wemeguru, nkenye eyi ngo manga pevhu, nemeguru namo ngava yi manga, ano nkenye eyi ngo mangurura pevhu, nemeguru namo ngava yi mangurura.”
20 Kutunda opo, ta pamperekeda varongwa vendi asi va ha ka tantera vantu asi yige Kristusa.
21 Kutunda opo, Jesus ta divisa varongwa vendi asi ga hepa kuza koJerusarema, ngaga ka mu hepeke masimbi novapristeli wovanene novalirongi womatjangwa mononkedi dokulisiga-siga nokumudipaga, nye mezuva lyautatu ngava mu pindura koufe.
22 Peturusa makura ta mu twara kompengi, ta ka mu kava asi: “Hompa, wa ha pulisira yininke oyo yi ku horokere.”
23 Makura age ta setuka, ta tara Peturusa, ta mu tantere asi: “Hageka, Satana! Ove kuna kukondera nge mokusikisa mo mpango zaKarunga, yeeyi ove kapi wa kara nomagazaro gaKarunga nye gosintu wa kara nago.”
24 Makura Jesus ta tantere varongwa vendi asi: “Nkenye ogu ga hara kukwama nge, ga ha litura mwene muhowo, nye ga hepa kulikambeka sitji* sendi, a twikire kukwama nge.
25 Yeeyi ogu ga hara kuparura mwenyo* gwendi, nga gu zumbanesa, ano ogu a zumbanesa mwenyo* gwendi morwa kukara murongwa gwange, yige nga gu gwana.
26 Yisinke ayi kwafa muntu yokuweka uzuni mudima, nye mwenyo* gwendi a gu zumbanese? Ndi yisinke na gava muntu a zowese ko mwenyo* gwendi?
27 Yeeyi MunwaMuntu nga wiza mouyerere woGuhwe kumwe novaengeli vendi, makura nga ya tengwide kuwoko nkenye ogu kuliza noyirugana yendi.
28 Yosili nina kumutantera asi poveli vamwe apa tuna sikama ngesi, ngava dira kufa, awo va hana kumona MunwaMuntu ta wiza moUhompa wendi.”
Nonkango dokonhi
^ MoRugereka edina Peturusa kutanta asi “emanya.”
^ Ndi “eparu.”
^ Ndi “eparu.”
^ Ndi “eparu.”
^ Ndi “eparu.”
