Buke zaMateusa 17:1-27
17 Konyima zomazuva ntazimwe, Jesus ta zi naPeturusa ntani Jakopo naJohanesa vantu namumbyendi kondundu zonde.
2 Makura ta lisitunuka komeho zawo, sipara sendi tasi tema ngwendi ezuva, ano yikoverero yendi tayi zere tooto ngwendi site.
3 Makura tava mono Mosesa naEliya, awo kuna kuzogera nendi.
4 Peturusa makura ta tantere Jesus asi: “Hompa, yina wapa kweyi tuna kara po. Nsene ono hara, ninka ni tunge apa nondunda ntatu, zimwe zoge, zimwe zaMosesa, ano ezi nkwawo zaEliya.”
5 Age simpe kuna kuuyunga, va tara ko, eremo lyokupaima tali va kudumike,* meremo olyo tamu tundu ezwi lina kutanta asi: “Ogu yige Munange ogu na hara, ga za nge komutjima, omu mu limburukwe.”
6 Ano varongwa apa va yi zuvhire, tava tukuka unene, makura tava gu kawomba.
7 Jesus makura ta wiza, ta va nyungu ta tanta asi: “Katukeni, mwa ha tukuka.”
8 Apa va kankukire, tava mono Jesus age gelike po.
9 Ngomu va humburukire kondundu, Jesus ta va pamperekeda asi: “Eyi muna mono kapisi mu ka yi tantere muntu, dogoro MunwaMuntu ngava mu pindure koufe.”
10 Nye varongwa tava mu pura asi: “Morwasinke nye valirongi womatjangwa ava uyungire asi Eliya yige nga hova kuwiza?”
11 Age ta va limburura asi: “Nhi, Eliya nga wiza, nga ya wapaike nayinye.
12 Nye ame tani mu tantere asi Eliya nare ga wiza, nye awo kapi va mu divire, ngava mu rugana moomu va here. MunwaMuntu nage ngava ya mu hepeka.”
13 Makura varongwa yipo va yi kwete egano asi age nani kuna kuvatantera kuhamena Johanesa Mukuhwi.
14 Apa va wizire kombunga zovantu, mugara gumwe ta mu hedere, ta mu twire nongoro makura ta tanta asi:
15 “Hompa, fira munange nkenda, yeeyi age kuvera sihegani. Age nkenye apa kugwira-gwira pomundiro nomomema.
16 Na mu retere kovarongwa woge, nye kapi va vhulire kumuverura.”
17 Jesus makura ta limburura asi: “Vantu one wokudira epuro ava mwa puka, siruwo sokuhura kupi ngani kara none? Siruwo sokuhura kupi ngani mu lididimikira? Mu retera nge oku.”
18 Jesus makura ta tugumukire mpepo zondona, azo tazi pwaga mo momumati, ta veruka poopo.
19 Varongwa makura tava wiza kwaJesus va ya mu pulire kompengi asi: “Ose morwasinke zina tu vhulire kuzitjida mo?”
20 Age ta va limburura asi: “Morwa epuro lyeni esesu. Yosili nina kumutantera asi nsene epuro lyeni li hura pohuma zomositareta,* one kuvhura kutantera ndundu ezi asi ‘tunda po apa, o hedere pena,’ makura tazi tundu po. One ngano nayimwe si ngayi mu vhura.”
21 *——
22 Apa va pongere moGalireya Jesus yipo ga va tanterere asi: “MunwaMuntu ngava mu gava momawoko gononkore dendi,
23 ngava mu dipage, ano mezuva lyautatu, ngava mu pindura koufe.” Eyi kwa va guvisire unene.
24 Apa Jesus novarongwa vendi va ya sikire moKaperenaumu, vagara ava ngava futisa mutero gontembeli* tava hedere Peturusa nokumupura asi: “Murongi gweni kapi a futu mutero gontembeli?”
25 Age ta limburura asi: “Hawe, kufuta.” Tupu ga hwililire monzugo, Jesus ta mu pura asi: “Simoni, ngapi omu ono kugazara: kwalye nani ava gwana vahompa wouzuni mutero, kovana vawo ndi kovageni?”
26 Apa ga limbwilire asi: “Kovageni,” Jesus ta mu tantere asi: “Nani vana vawo va manguruka ko kofuta mutero.
27 Nye mokuninkira asi va ha tu gazarera yoyidona, zende kefuta o ka rovere, ka tampure mfi ezi nazi ka hova kulya ko o ka zi zahameke, no ka gwana mo simaliwa sosisiliveli. Ka si guse, o ka fute mutero gwange nogu goge.”
Nonkango dokonhi
^ Ndi “tali va kara keguru.”
^ Tara mwaMateusa 13:31, 32.
^ “Velise ezi kapi za moneka mo momatjango ganare ntani kapi za kara ruha roMatjangwa aga za retesa po mpepo zokupongoka.”
^ MoRugereka asi “nodrachma mbali (yimaliwa yosisiliveli) edi ngava futu muntu konyima zokurugana mazuva gavali.”
