Buke zaMateusa 18:1-35
18 Posiruwo oso, varongwa tava hedere Jesus nokumupura asi: “Yilye ogu ga nenepa po moUhompa wemeguru?”
2 Age ta zigida po munonagona gumwe, ta mu ninki a sikame pokatji kawo
3 makura ta uyunga asi: “Yosili nina kumutantera asi nsene mu dira kulitezurura,* mu kare ngwendi vanona, kapi ngomu hwilira moUhompa wemeguru.
4 Nye ogu a linunupike ngwendi munona ogu yige ga nenepa po moUhompa wemeguru,
5 ogu a tambura munonagona ngwendi gogu medina lyange, nyame a tambura.
6 Nye nkenye ogu a pukisa kanonagona kamwe potu twa pura nge, gwangesi ngano ga fira kumumangerera emumanya* monsingo, a ka dame nalyo metondo lyefuta.
7 Ani nane uzuni ou morwa mapukiso. Mapukiso yipo ngaga kara, nye nane vakwetu muntu ogu a retesa po mapukiso!
8 Nsene kuwoko koge ndi mpadi zoge kuna kukuninkisa o zone, zi teta ko, o zi zugumine kwina. Yeeyi hansa koge kukagwana eparu ove ono remana, kapisi kumwe neyi yokukakuzonagwilira po momundiro gwanarunye* ove nomawoko goge gavali nonompadi doge mbali.
9 Ntani hena, nsene eho lyoge kuna kukuninkisa o zone, li korora mo o lizugumine kwina, li ku lipore. Yeeyi hansa koge kukagwana eparu ove neho limwe, kapisi kumwe neyi yokukakuzugumina nomeho goge gavali moGehena.*
10 Takameseni asi mwa ha nyenga kamwe potunona twange, morwa ame tani mu tantere asi vaengeli vawo vemeguru kwa kara nkenye apa noTate vemeguru.
11 *——
12 Ngapi muna kugazara? Nsene muntu ga weka nonzwi 100, makura zi zumbane po zimwe, kapi na siga edi 99 ponondundu, a ze a ka papare zokuzumbana ndi?
13 Nsene a ka zi gwana, yosili nina kumutantera asi ta hafere nzwi zimwe ozo kupitakana omu na hafera odo 99 da dira kuzumbana.
14 Mokulifana, Otate* vemeguru nawo kapi va hara asi potunona otu pa zumbane nampili kamwe.
15 Nsene mukweni ana ku zono, zende o ka mu vyukisire kompengi. Nsene na ka kupurakena, ngoso ono mu vatere a twikire kurugana yoyiwa.
16 Nye nsene kapi ana ka kupurakena, zigida ko mukweni gumwe ndi vavali mokuninkira asi umbangi* wovantu vavali ndi vatatu kuvhura kutokora nawa unzoni.
17 Nsenesi napoopo kapi ana kukupurakena, yi twara nye kombungakriste. Ano nsene nokombungakriste kooku kapi ana kupurakena, mu siga nye a kare koge ngwendi muntu gokomuhoko gwapeke ndi mufutisi gomutero.
18 Yosili nina kumutantera asi nkenye eyi ngomu manga pevhu, nemeguru namo ngava yi manga, ano nkenye eyi ngomu mangurura pevhu, nemeguru namo ngava yi mangurura.
19 Tani mu tantere hena asi nsene vavali pokatji keni va hundira yuma yomulyo koTate, ngava yi va pa.
20 Yeeyi nkenye oku aku pongo vantu vavali ndi vatatu medina lyange, name kumwe nawo ani kara.”
21 Peturusa makura ta mu hedere, ta mu pura asi: “Hompa, rungapi nani dongwenena po mukwetu* ogu ana zono nge? Dogoro yikando ntambali ndi?”
22 Jesus ta mu limburura asi: “Ame tani ku tantere asi kapisi dogoro yikando ntambali tupu, nye dogoro yikando 77.”
23 “Yiyo nye ava u fanekesere Uhompa wemeguru nahompa ogu ga here asi vakareli vendi va mu fute eyi va mu korota.
24 Apa ga tamekere kuvarura, tava mu retere ko mukareli gwendi gumwe, ogu ga mu korotere yimaliwa 10 000.*
25 Morwa kapi ga vhulire kufuta, hekurwendi ta gava mpangera asi va mu randese po namukadendi novana vendi noyininke nayinye eyi ga wekere, a fute makongo gendi.
26 Mukareli makura ta mu twire nongoro* oku ta mu likwambere asi: ‘Lididimika tupu, ngani kufuta.’
27 Hekurwendi makura ta mu fire nkenda, ta mu sigi a ze, age ana mu gusire po makongo gendi.
28 Nye mukareli ogo ta zi, ta ka gwana mukareli mukwawo ogu ga mu korotere madenali* 100 tupu, makura ta mu kwata ta mu sini oku ta tanta asi: ‘Futa nayinye eyi wa korota nge.’
29 Ano mukareli mukwawo ta mu twire nongoro, ta mu likwambere asi: ‘Lididimika tupu, ngani ku futa.’
30 Nye age ta nyoka, ta zi ta ka mu tulisa modorongo asi dogoro nga mane kufuta makongo gendi.
31 Vakareli vakwawo apa va mwene eyi ga rugene, tayi va guvisa, makura tava zi va ka tantere hekurwawo nayinye eyi ya horokere.
32 Hekurwendi makura ta mu zigida , ta mu tantere asi: ‘Mukareli gomudona ove! Ame kani ku gusilire po makongo goge apa ko likwamberere nge.
33 Nani nove nokuvhura si kufira kenda mukareli mukweni, moomu kani ku fililire ame nkenda?’
34 Hekurwendi makura ta handuka, ta mu gava kovanomeni wodorongo asi dogoro nga mane kufuta makongo gendi.
35 Otate vemeguru nawo yimo ngava mu rugana nkenye ogu a dili kudongwenena po mukwawo nomutjima nagunye.”
Nonkango dokonhi
^ Ndi “kurundurura nkareso.”
^ Ndi “emanya lyenene eli nga si mbirumuna sindongi.” Alyo ngava li ruganesa mokukweya rukokotwa.
^ Kwa tamba kezonauko lyanarunye.
^ Tara mwaMateusa 17:21, ftn.
^ Ndi nampo asi “Guhyeni.”
^ MoRugereka asi “tuna.”
^ Kwa tamba komupuli mukwetu.
^ MoRugereka asi notalent 10 000, ado kwa hulire pomadenali 60 000 000.
^ Ndi “nyongamene.”
^ Mosiruwo sina, edenali limwe kwa kere mfeto ezi ngava futu muntu mezuva limwe.
