Buke zaMateusa 2:1-23
2 Konyima zehampuruko lyaJesus moBeterehema zomoJudeya posiruwo sepangero lyahompa Herodesa,* vakonentu vamwe yipo va wizire koJerusarema, va tunde koUpumezuva,
2 makura tava pura asi: “Kupi ana kara hompa goVajuda, ogu kava hampurukire? Ose kwa monenene mbungururu zendi ose simpe koUpumezuva, yiyo tuna wiza, tu ya mu tongamene.”*
3 Apa hompa Herodesa nava womoJerusarema va yi zuvhire, tava kara nosinka sosinene.
4 Age kwa zigidire vapristeli wovanene novalirongi womatjangwa womomuhoko gwawo, makura ta va pura oku ngava hampurukira Kristusa.*
5 Awo tava mu limburura asi: “MoBeterehema zomoJudeya, morwa yimo va yi tjanga kupitira momuporofete asi:
6 ‘Ove Beterehema zomosirongo saJuda, nyove wa nunupa po mokatji koyitata yoyinene yomoJuda, ano moge yimo ngamu tunda mugendesi, ogu nga gendesa muhoko gwange gwaIsraeli.’”
7 Herodesa makura ta zigida vakonentu mokahore-hore, ta va pura siruwo esi za monekere mbungururu.
8 Apa ga va tumine koBeterehema, kwa va tanterere asi: “Zendeni, mu ka papare nawa munona ogo, nsene ngomu ka mu gwana, ngomu divise nge ko, name ngani ze, ni ka mu tongamene.”
9 Apa va mene kupurakena kwahompa, makura tava ka za. Va tara ko, mbungururu ezi va mwene awo koUpumezuva, zezi, kuna kuvapitisira komeho zawo, dogoro ta zi ka sikama apa ga kere munona.
10 Apa va mwene mbungururu, tava hafa unene.
11 Apa va hwililire monzugo, tava gwana mo munona nozina Mariya, tava mu twire nongoro va mu tongamene.* Kutunda opo tava rongorora ugawo wawo, tava mu pe uhwi wongorodo noyikwa edumba.*
12 Nye morwa Karunga kwa va tanterere konzodi asi va ha tengura hena kwaHerodesa, yiyo va tengwilire kwawo nonzira peke.
13 Konyima zapa va tengwire, muengeli gwaJehova ta monekere Josefa monzodi nokumutantera asi: “Pinduka, o guse munona nozina, o tjwayukire koEgipite, ngo ka kare kooko dogoro ngani ku tantere, yeeyi Herodesa kuna hara kupapara munona, a ya mu dipage.”
14 Josefa makura ta pinduka, ta gusa munona nozina masiku googo, tava zi koEgipite.
15 Age kwa ka kere ko dogoro paapa ga fire Herodesa. Eyi kwa sikisire mo nonkango daJehova edi ga uyungire kupitira momuporofete asi: “Ame kwa zigida munange, a tunde moEgipite.”
16 Apa Herodesa ga yi dimbwilire asi vakonentu kuna mu kumbagere, ta handuka unene, makura ta tumu vantu vendi va ka dipage vanona navenye wovamati womoBeterehema wonomvhura mbali yigurumwise, mokuhetakanesa nosiruwo esi ga zuvhire kovakonentu.
17 Makura ta yi siki mo eyi ga uyungire muporofete Jeremiya asi:
18 “Ezwi kuna kuzuvhika moRama, kuna kulira unene. Rakera kuna kulilira vana vendi, nye nokuvhura si kumuhengagwida, yeeyi nagumwe si ana hupu po.”
19 Apa ga fire Herodesa, makura muengeli gwaJehova ta monekere Josefa konzodi age moEgipite
20 ta mu tantere asi: “Pinduka o guse munona nozina, mu ze kosirongo saIsraeli, yeeyi vena va here kudipaga munona vana fu.”
21 Makura ta katuka, ta gusa munona nozina, va tengure kosirongo saIsraeli.
22 Nye apa ga zuvhire asi Arukerausi yige ana kara mouhompa woguhwe Herodesa moJudeya, age ta tjira kuza ko. Ntani hena, Karunga kwa mu rondwere kupitira monzodi asi ga ha za ko, makura ta zi komukunda gwaGalireya.
23 Ta ka tunga mositata sedina Nasareta, yipo yi sike mo eyi va uyungire vaporofete asi: “Ngava mu tumbura asi Munasareta.”*
Nonkango dokonhi
^ Ndi “nyongamene.”
^ Ndi “Mesiyasa; Mugwavekwa.”
^ Ndi “nyongamene.”
^ Ayo kuna kara manganganga gokututumikidisa nomira.
^ Nkango Munasareta, nampo kwa tunda konkango zoRuhebeli ezi azi tanta asi mutayi gomupe.
