Buke zaMateusa 20:1-34
20 “Uhompa wemeguru, kwa lifana nanturagumbo ogu ga menekere ngurangura zonene a ka papare varugani va ya rugane mosikunino sendi soyindjembere.
2 Konyima zapa ga lizuvhire novarugani asi ta va futu nkenye ogu edenali limwe,* makura ta va tumu mosikunino.
3 Koyiha yovili zautatu,* ta zi ko hena, ta ka gwana vamwe, awo vana sikama pomarandesero, kwato eyi vana kurugana,
4 nawo ta va tantere asi: ‘None zendeni mosikunino sange soyindjembere, nani ka mu futa mouhunga.’
5 Awo tava ka za. Age kwa zire ko hena koyiha yovili zauntazimwe* ntani vili zauntane* noku ka rugana yokulifana.
6 Ano povili zau 11* ta zi ko hena, ta ka gwana ko hena vamwe, awo vana sikama. Makura ta va pura asi: ‘Yisinke eyi muna sikamene apa ezuva nalinye, mwa hana kurugana yuma?’
7 Awo tava mu limburura asi: ‘Morwa kwato ogu ana tu kutu.’ Age ta va tantere asi: ‘None zendeni mosikunino sange soyindjembere.’
8 Ano kongurova, mwenyasikunino soyindjembere ta tantere mukondi govarugani vendi asi: ‘Zigida varugani, o ya va pe mfuto zawo. Tamekera kwava vana hulilire, o ya manese kwava vana howo.’
9 Ava va wizire povili zau 11 apa va ya sikire, nkenye ogu kwa gwene edenali limwe.
10 Ano ava va hovere apa va wizire, tava gazara asi awo nava va gwederera ko, nye nawo kwa gwene edenali limwe tupu.
11 Tupu va yi tambwire ngoso, tava tangwisa mwenyasikunino,
12 tava tanta asi: ‘Ava amesi kuna hulilire, vili zimwe tupu vana rugana, nye ove yiyo ono va hetakanesa kumwe nose tuna rugana unene ezuva nalinye momutenya.’
13 Age makura ta limburura po gumwe asi: ‘Hewa, ame kapi nina kukurugana momudona. Nani kapi katu lizuvhu asi edenali limwe?
14 Gusa po yoge o ze. Ame kuna hara kufuta ava vana rugana vili zimwe yokusika pweyi nina ku pe.
15 Nani ame nokuvhura si kuruganesa yininke yange moomu nina panga? Ndi nampo mfudu zina kukara morwa ugavi* wange?’
16 Ngesi yimo ngava kara, wokuhulilira ngava hova, ano wokuhova ngava hulilira.”
17 Monzira zawo zokukanduka va ze koJerusarema, Jesus ta zigidire varongwa vendi 12 kompengi, ta va tantere asi:
18 “Tareni, tatu kandukeni koJerusarema, ano MunwaMuntu ngava mu gava kovapristeli wovanene nokovalirongi womatjangwa. Yiwo ngava mu tokwera konomfa
19 nokumugava kovantu wokonomuhoko dapeke ngava ka mu swaure nokumusopora,* makura ngava ka mu pampare kositji, ano mezuva lyautatu ngava mu pindura koufe.”
20 MukadaSebede makura ta mu wizire novana vendi, ta mu tongamene,* a mu hundire yuma.
21 Jesus ta mu pura asi: “Yisinke ono hara?” Age ta limburura asi: “Ninka vana vange ava vavali ngava ka hingire moUhompa woge, gumwe korulyo ano gumwe korumoho roge.”
22 Nye Jesus ta va limburura asi: “One kapi muna diva eyi muna kuhundira. Nkinda* ezi ngani nwa none kuvhura kuzinwa ndi?” Awo tava limburura asi: “Nhi, kuvhura.”
23 Age ta va tantere asi: “Nhi, nkinda zange ngomu zi nwa, nye yokukahingira korulyo nokorumoho rwange, ame nokuvhura si kuyigava, ayo kwa hamena tupu vaava va yi wapaikira Otate.”
24 Apa vakwawo murongo va yi zuvhire oyo, tava handukire owo vantu namumbyendi.
25 Nye Jesus ta va zigida makura ta va tantere asi: “Mwa diva asi vapangeli wonomuhoko kupangera nomuhoko dawo moomu vana harere, ano mapangero kuruganesa nonkondo dago mokuninkilira mo vantu.
26 Nye kweni one ya ha kara ngoso, ogu ga hara kukara gomunene mokatji keni, a kare mukareli gweni,
27 ano ogu ga hara kukara gokuhova, a kare ngwendi mupika gweni.
28 Ngwendi moomu MunwaMuntu ga wiza, age kapi ga wizira asi va ya mu karere, nye a ya karere nokuyagava mwenyo* gwendi mokuyazowora wovanzi.”
29 Apa va tundire moJeliko, mbunga zonene kwa mu sikwire.
30 Vatwiku vavali ava va hingilire konontere donzira tava zuvhu asi Jesus ana kupita po, tava zigire asi: “Hompa, MunwaNdafita, tu fira nkenda!”
31 Nye mbunga tazi va kava asi va mwene, nye awo tava zigire unene asi: “Hompa, MunwaNdafita, tu fira nkenda!”
32 Jesus ta sikama, ta va zigida makura ta va pura asi: “Yisinke eyi muna hara nani mu ruganena?”
33 Awo tava mu limburura asi: “Hompa, tuna hara o mahure meho getu.”
34 Jesus tava fire nkenda, ta va kwata pomeho, poopo ngoso, meho gawo taga mahuka, makura tava mu kwama.
Nonkango dokonhi
^ Simaliwa sosisiliveli soVaroma.
^ Kwa tamba koyiha yovili 9, ngurangura.
^ Kwa tamba koyiha yovili 12, mutwekatji.
^ Kwa tamba koyiha yovili 3, sitenguko.
^ Kwa tamba koyiha yovili 5, sitenguko.
^ Ndi “uwa.”
^ Ndi “nyongamene.”
^ “‘Nkinda’ kwa fanekesa mpango zaKarunga mokupulisira Jesus a fe morwa kumurundira asi kwa swawire Karunga.”
^ Ndi “eparu.”
