Buke zaMateusa 21:1-46
21 Apa va hederere pepi naJerusarema, tava ka sika koNdundu zoMauzwe oku kwa kere mukunda gwaBetefage, Jesus makura ta tumu varongwa vavali,
2 nokuvatantera asi: “Zendeni momukunda gwina muna kumona, nomu ka gwana sindongi namunaso, ayo kuna yi mangerere. Ka yi ditureni mu ka yi retere nge.
3 Nsene gumwe na ka mu pura, ka mu tantereni asi ‘Hompa ana yi hepa.’ Makura age na ka mu pulisira mu ka yi rete.”
4 Eyi kwa horokerere yipo yi sike mo eyi ga uyungire muporofete asi:
5 “Tantereni mukadona gomoSiyoni asi: ‘Tara! Hompa goge kuna kuwiza koge, age mugomoki ntani kuna rondo posindongi, aso sindongigona.’”
6 Varongwa tava zi nokukarugana moomu ga va tanterere Jesus.
7 Tava ka reta sindongi namunaso, tava zara po yikoverero yawo yokontunda, ano age ta rondo pwesi sosinona.
8 Makura sinzi sovantu tava zara yikoverero yawo yokontunda monzira. Ano vamwe tava tete nomutayi koyitji, tava di zara monzira.
9 Vantu ava va pitire komeho nava va kere konyima zendi, kwa twikilire kuzigira asi: “Karunga, tatu ku likwambere, popera MunwaNdafita! Va mu tungike ogu ana kuwizira medina lyaJehova! Karunga ove gekeguru-guru, mu popera!”
10 Apa ga ya sikire moJerusarema, vantu navenye womositata kwa piyaganene tava lipura asi: “Yilye ogu?”
11 Ava ga gendere nawo tava twikire kuzigira asi: “Ogu muporofete Jesus, gomoNasareta zomoGalireya!”
12 Jesus ta hwilire montembeli, ta tjida mo varandesi novarandi, ta gandanga yitafura yovatjindji woyimaliwa noyipundi yovarandesi wonomputukuwa.
13 Ta va tantere asi: “Kwa tjanga asi ‘nzugo zange ngava zi tumbura asi nzugo zomakanderero,’ nye one yiyo muna kuzitura zi kare ekombombo lyovakorokotji.”
14 Vatwiku noyirema nayo kwa wizire kwendi montembeli, age makura ta va verura.
15 Vapristeli wovanene novalirongi womatjangwa kwa handukire apa va mwene yitetu eyi ga rugene novanona ava va zigilire montembeli asi “Karunga, mu popera MunwaNdafita!”
16 makura tava mu tantere asi: “To zuvhu tupu eyi vana kutanta ava?” Jesus ta va limburura asi: “Nhi. Kapi mwa resa asi ‘vanona novakeke, ngava ku hamberera’?”
17 Age ta va sigi, nokutunda mo mositata a ze koBetani, oko yiko ga ka rere.
18 Ngurangura zonene apa ga tengwire kositata, ta zi mu kwata nzara.
19 Pepi nonzira, ta mono sitji soukuzu makura ta si hedere, nye yihako yelike ga ka gwene ko, ta si tantere asi: “Kapi hena ngo yima enyango.” Poopo ngoso, ta si kukuta.
20 Varongwa apa va yi mwene eyi, tava tetuka nokutanta asi: “Ngapi omu ukuzu ou una kukuta usimbu ngesi?”
21 Jesus ta va limburura asi: “Yosili nina kumutantera asi nsene mu kara nepuro mwa hana kusinganyeka, kapisi yeeyi tupu nina rugana sitji soukuzu yelike ngomu rugana, nye one kuvhura kutantera ndundu ezi asi ‘tunda po apa o ka gwire mefuta,’ makura tayi horoka.
22 Ano nayinye eyi omu hundire mekanderero, ngomu yi gwana nsene mu kara nepuro.”
23 Apa ga zire montembeli, vapristeli wovanene nomasimbi kwa wizire kwendi age kuna kuronga, tava mu pura asi: “Nononkondo musinke o rugana yininke eyi? Yilye ogu ga ku pa nonkondo edi?”
24 Jesus ta va limburura asi: “Name tani mu pura ko sininke simwe. Nsene nomu limburura nge, name nani mu tantera asi nononkondo musinke ani rugana yininke eyi.
25 Ekuho lyaJohanesa kupi lya tundilira? Meguru ndi kovantu?” Nye awo tava tameke kulipuragera vene navene asi: “Nsene natu tanta asi ‘kwa tunda meguru,’ ta tu pura asi ‘morwasinke nye mwa dilire kumupura?’
26 Ano nsene natu tanta asi ‘kovantu,’ ose tuna tjira eyi ngava tu rugana vantu, yeeyi navenye kutara Johanesa asi muporofete.”
27 Awo makura tava limburura Jesus asi: “Kapi tatu diva.” Age ta va tantere asi: “Name kapi nani mu tantera asi nononkondo musinke ani rugana yininke eyi.”
28 “Ngapi muna kugazara? Tu tante asi guhya kwa kara novana vavali. Makura ta zi kogu gomukondi po nokumutantera asi: ‘Munange, zende o ka rugane mosikunino sange soyindjembere.’
29 Age ta limburura asi ‘kapi nina kuza ko,’ nye konyima, ta livere makura ta zi.
30 Ta zi kogu gomunona po nokumutantera yokulifana. Age ta limburura asi ‘nhi, nani za tate,’ nye kapi ga zire.
31 Pwava vavali, yilye ogu ga sikisire mo mpango zoguhwe?” Tava mu limburura asi: “Gomukondi po.” Jesus ta va tantere asi: “Yosili nina kumutantera asi vafutisi womutero novahondedi yiwo ngava ka mu lihovera kuza moUhompa waKarunga.
32 Yeeyi Johanesa kwa wizire a ya mu likide nzira zouhunga, nye one kapi mwa mu pulire. Nye vafutisi womutero novahondedi va mu pulire, nye nampili ngomu mwa yi mwene eyi, kapi mwa litezwilire mu pure mwendi.”
33 “Purakeneni kosifanekeso esi: Pwa kere mugara ogu ga kere nosikunino soyindjembere, ta tura ko rugumbo nokutungira mo hena sikameno sovhinyu, ta tungire mo hena etungo lyere, makura ta si gava kovarugani womosikunino va si takamese, makura ta zi kosirongo sokoure.
34 Apa sa sikire siruwo sokuzangura, ta tumu vakareli vendi kovarugani womosikunino va ka mu retere enyango lyendi.
35 Nye varugani owo, tava kwata vakareli vendi, gumwe tava mu toona, mukwawo tava mu dipaga, ano ogu gumwe po tava mu toona nomamanya.
36 Ta tumu ko hena vakareli vapeke, wovanzi kupita womuhowo, nye nawo tava ka va rugana yokulifana.
37 Moruhura, ta tumu ko munendi, nokutanta asi ‘munange nava ka mu fumadeka.’
38 Varugani womosikunino apa va mwene munendi, tava litantere vene navene asi: ‘Yige mupingi googu. Tu zeni tumu dipage, tu ka guse upingwa wendi.’
39 Tava mu kwata nokumuzugumina ponze zosikunino makura tava mu dipaga.
40 Apa nga wiza mwenyasikunino, yisinke nga ya rugana varugani owo?”
41 Awo tava limburura asi: “Morwa awo vadona, age nga ya va zonagura po nokugava sikunino sendi kovarugani vapeke, ava ngava mu pa enyango posiruwo somuzangu.”
42 Jesus ta va tantere asi: “Kapi mwa resa rumwe moMatjangwa asi ‘emanya eli va zumbire vatungi, yilyo lya ya kara emanya lyemekovhu?* Jehova yige ga yi rugana eyi makura yiyo yina kututetura.’
43 Eyi yiyo nina kumutanterera asi Karunga nga mu gusa Uhompa wendi nokuugava kovantu ava ava rugana eyi ga hara.
44 Ano muntu ogu nga gwira pemanya eli, nga tekauka. Ano ogu ngali gwira, nga myoka.”
45 Apa vapristeli wovanene noVafalisayi va zuvhire yifanekeso eyi, tava yi dimburura asi yiwo ana tamba.
46 Nampili ngomu va here kumukwata, tava tjira mbunga, morwa vantu ngava mu tara asi muporofete.
Nonkango dokonhi
^ Ndi “emanya lyomulyo po.”
