Buke zaMateusa 23:1-39
23 Jesus makura ta tantere mbunga novarongwa vendi asi:
2 “Valirongi womatjangwa noVafalisayi kwa hingira posipundi saMosesa.
3 Yipo nye, sikiseni mo nayinye eyi ava mu tantere. Nye walye omu honene yirugana yawo, yeeyi awo kapi ava rugana eyi ava tanta.
4 Awo kumangaika nomudigo donondigu, tava di kambaike poyipepe yovantu, nye awo vene kapi va hara kuguma ko mpili nyara.
5 Yirugana nayinye eyi ava rugana, kuyiruganena va limonekese kovantu. Awo kunenepeka tundjatogona tokupungwira noVeta otu ava dwara posipara ngoyilipopereso nokurepesa nonyerera doyikoverero yawo.
6 Awo kwa hara mavango gomawa poyipito noyipundi yokomeho* monosinagoge
7 nokuvamorora nefumadeko pomarandesero ntani vantu va va tumbure asi Murongi.*
8 Nye one, kapisi va mu tumbure asi Murongi, yeeyi Murongi gweni gumwe tupu, one hena namuvenye vezimo limwe tupu.
9 One hena, kwato ogu ngomu tumbura apa pevhu asi guhyeni, morwa Guhyeni gumwe tupu, ogu ga kara meguru.
10 Walye hena ava mu tumbura asi vapitisili, morwa Mupitisili gweni gumwe tupu, Kristusa.
11 Gomunene po mokatji keni a kare mukareli gweni.
12 Ogu a linenepeke ngava mu nunupika, ano ogu a linunupike ngava mu nenepeka.
13 “Ani nane one valirongi womatjangwa noVafalisayi, vayilipaki one! One kuzedilira vantu mavero goUhompa wemeguru asi va ha hwilira mo. Nye one nyamweni kapi omu zi mo, ano ava va hara kuza mo yiyo omu va silike.
14 *——
15 “Ani nane one valirongi womatjangwa noVafalisayi, vayilipaki one! One kuvindakana sirongo nefuta asi mu tezwilise po nampili gumwe,* ano eyi na litezurura, tomu mu ninki a zone unene kumupita one yipo ngava ka mu zonagure moGehena.*
16 “Ani nane one vapitisili wokutwika, one kutanta asi: ‘Nsene gumwe a gana medina lyontembeli, nawa tupu, ano nsene a gana medina lyongorodo zomontembeli, ga hepa kusikisa mo mugano gwendi.’
17 Magova novatwiku one! Yisinke yomulyo po, ngorodo ndi ntembeli ezi za pongora ngorodo?
18 One kutanta hena asi: ‘Muntu nsene a gana sizambero, nawa tupu, nye nsene a gana sigava sonzambo esi sina kara posizambero, ga hepa kusikisa mo mugano gwendi.’
19 Vatwiku one! Yisinke yomulyo po, sigava ndi sizambero esi asi pongora sigava?
20 Yeeyi ogu a gana sizambero, kusigana nanayinye eyi yina kara po,
21 ano ogu a gana ntembeli, kugana hena nogu ga kara mo,
22 ntani ogu a gana eguru, kugana hena sipundi saKarunga nogu ga hingira po.
23 “Ani nane one valirongi womatjangwa noVafalisayi, vayilipaki one! One kugava yiumurongo yehidi lyokutovesesa, ano eyi ya nenepa po moVeta zaKarunga ngwendi, uhungami noufenkenda noulimburukwi kapi omu yi pakere mbili. Ayo mulyo kugava yiumurongo, nye simpe mwa hepa kupakera mbili eyi ya nenepa po moVeta.
24 One vapitisili wokutwika, one kudinda ko ndi, nye ngameru tomu mininine.
25 “Ani nane one valirongi womatjangwa noVafalisayi, vayilipaki one! One kukuhwa nkinda nosiyaha kontunda, nye monda kwa zura udona nomadowo aga omu dili kupangera.
26 Vafalisayi one wovatwiku, kuhweni tanko monda zonkinda ntani zosiyaha, yipo ntunda zaso nazo zi kuhuke.
27 “Ani nane one valirongi womatjangwa noVafalisayi, vayilipaki one! One kwa lifana nonontoko edi va painda, ado kumoneka ufuuli, nye monda zado kwa zura yisupa yovafe nouworodi nkenye ou.
28 None yimo mwa fana, komeho zovantu kumoneka ngwendi kwa hungama, nye monomutjima deni kwa zura uyilipaki noudona.
29 “Ani nane one valirongi womatjangwa noVafalisayi, vayilipaki one! One kutunga nontoko dovaporofete nokulimbagura mamanya gonontoko* dovahungami,
30 nokutanta asi: ‘Ngano asi nose kwa parukire posiruwo sozinyakurwetu, ngano kapi twa lihamekere mo mokudipaga vaporofete.’
31 One ngesi kuna kugava umbangi asi one vana vava va dipaga vaporofete.
32 Maneseni nye eyi va varekere ozinyakurweni no.
33 “Mazoka one, vana wonombaroka, ngapi ngomu henduka kokumupangwira moGehena?*
34 Eyi yiyo nye nina kumutumina vaporofete novakonentu novarongi. Vamwe ngomu ya va dipaga nokuvazenzeresa koyitji, ano ava vamwe ngomu ya va sopora* monosinagoge deni, tomu ya va hepeke tunda sitata zende sitata.
35 Eyi yiyo nye ngava mu gwanena nzo zohonde zovahungami ava mwa dipaga, kutunda kohonde zaAbeli gomuhungami dogoro kohonde zaSakaliya, munwaBarakiya, ogu mwa dipagerere pokatji kontembeli nosizambero.
36 Yosili nina kumutantera asi, vantu ava ngava va futisira yininke nayinye eyi.
37 “Jerusarema, Jerusarema, mudipagi govaporofete nomudipagi nomamanya ava va mu tumina. Rungapi na here kupongaika vana woge moomu azi pongaike nhunhwa vana momavava gazo, nye ove kapi wa here!
38 Tareni, nzugo zeni ngava zi siga.
39 Tani mu tantere asi, kutunda apa kapi ngomu mona nge hena dogoro apa ngomu tanta asi: ‘Va mu tungike ogu ana kuwizira medina lyaJehova!’”
Nonkango dokonhi
^ Ndi “yoyiwa po.”
^ Ndi “Rabi.” Ntumbwisiso ezi, ngava zi ruganesa mokulikida efumadeko komurongi goMujuda.
^ Tara mwaMateusa 17:21, ftn.
^ Ndi “mu ninke nampili gumwe a ya kare Mujuda.”
^ Ndi “gomayendo.”
