Buke zaMateusa 24:1-51
24 Jesus apa ga pwege montembeli a ka ze, varongwa vendi tava mu hedere va mu likide matungo gontembeli.
2 Nye age ta va tantere asi: “Nayinye eyi tomu yi mono sa? Yosili nina kumutantera asi kwato emanya eli ngali kara kontunda zekwawo, eli ngava dira kuzugumina pevhu.”
3 Age kuna hingire poNdundu zoMauzwe, varongwa vendi tava mu hedere awo velike, tava mu pura asi: “Tu tantera, ezuvake ngayi horoka yininke eyi ntani sidiviso musinke nga si likida ekaropo* lyoge nouhura wouzuni?”*
4 Jesus ta va limburura asi: “Takameseni asi ga ha mu pukisa muntu,
5 yeeyi vanzi ngava wizira medina lyange nokutanta asi: ‘Nyame Kristusa,’ makura ngava ya pukise wovanzi.
6 One ngomu zuvha yita nonombudi doyita. Kapisi ngomu tukuke, morwa nampili ngayi horoke, nye uhura simpe kapi una siki.
7 “Yeeyi nomuhoko ngadi lirwanesa-rwanesa, ano yirongo nayo ngayi lirwanesa-rwanesa. Nondya ngadi sesupa ntani ngaku kara makankamo gevhu komavango gokulisiga-siga.
8 Nye nayinye eyi ngayi kara tupu etameko lyomaudigu.
9 “Vantu ngava mu gava va ka mu hepeke nokumudipaga. Ano nomuhoko nadinye ngadi mu nyenga morwa edina lyange.
10 Makura wovanzi ngava va pukisa, ngava ligombeka* vene navene nokulinyenga-nyenga.
11 Vaporofete wovanzi woyimpempa ngava horoka ntani awo ngava pukisa wovanzi.
12 Ano morwa udona ngau vhuka, eharo lyovantu wovanzi ngali tenda.
13 Nye ogu nga didimika* dogoro kouhura, yige nga paruka.
14 Ano mbudi zongwa ezi zoUhompa yizo tanko ngava hova kuzuvhisa mouzuni mudima, zi kare umbangi konomuhoko nadinye ntani nye ngau wiza uhura.
15 “Apa ngomu mona mevango lyokupongoka sininke sokunyata esi asi reta ezonauko ngamoomu ga yi tente muporofete Ndaniyera, (gokuyiresa ga hepa kuyikwata egano)
16 ava va kara moJudeya, ngava tjwayukire konondundu.
17 Ogu nga kara peguru lyonzugo, ga ha humburuka a ka simbe yininke monzugo zendi,
18 ano ogu nga kara mepya, ga ha tengura kembo, a ka simbe sikoverero sendi sokontunda.
19 Ani nane vakwetu vakadi ava ngava kara nomarutu gavali, nava ngava zamweka momazuva ogo!
20 Kanderereni asi etjwayuko lyeni kapisi ngali kare pokufu ndi mEsabata
21 morwa ngapa kara udigu wounene ou wa dilire kukara po kutunda ketameko lyouzuni dogoro ngesi, wangoso kapi ngau kara ko hena.
22 Nye ngano mazuva ogo kapi ngava ga supipika, ngano kwato ogu nga paruka. Nye mazuva ogo ngava ga supipika morwa vahoroworwa vendi.
23 “Nsene muntu nga mu tantera asi ‘tareni! Kristusa gogo,’ ndi asi ‘gogwina,’ kapisi ngomu yi pure.
24 Yeeyi ngapa kara Vakristusa woyimpempa novaporofete woyimpempa ava ngava rugana yidiviso noyitetu yoyinene yipo va hare kupukisa vahoroworwa.
25 Tareni si, nina yi mu tantere, ayo simpe ya hana kuhoroka.
26 Yipo nye, nsene ngava mu tantera asi ‘tareni, gogwina momburundu!’ Mwa ha za ko, ndi asi ‘tareni, gogwina monzugo!’ Kapisi ngomu yi pure.
27 Moomu tupu aru vema ruvadi ru tundilire koUpumezuva, ru ka livete koUtokero, nekaropo* lyaMunwaMuntu yimo ngali kara ngorooro.
28 Oku aku kara erambo,* yiko aga pongo makuvi kooko.
29 “Tupu ngau pwa udigu wounene, ezuva ngali sovagana ntani kwedi kapi ngaku gava uzera, nombungururu ngadi gwa keguru, ano nonkondo deguru ngava di nyunganga.
30 Ntani nye ngasi moneka sidiviso saMunwaMuntu keguru. Vantu navenye vepevhu ngava kara moruguwo, MunwaMuntu ngava mu mona ta wiza pomaremo nononkondo nouyerere wounene.
31 Age nga tuma vaengeli vendi nomarumbendo gokuhagara unene. Awo ngava ya pongaika vahoroworwa vendi komaruha gane gouzuni, kutunda kosikondo simwe seguru dogoro kosikwawo.
32 “Lirongereni ko kosifanekeso esi kuhamena sitji soukuzu, nsene asi nomutayi daso dina tarara, ano yihako yaso kuna kuhokera, nare muna diva asi siruwo sokulima pepi.
33 Mokulifana, apa ngomu mona yininke nayinye eyi, diveni asi pevero ana kara.
34 Yosili nina kumutantera asi vantu ava vantaantani kapi ngava lipitira ayo yininke nayinye eyi ya hana kuhoroka.
35 Eguru nevhu ngali dongonoka, nye nonkango dange kapi ngadi dongonoka po.
36 “Kwato ogu ga diva ezuva nosiruwo apa ngasi sika mo, novaengeli si vemeguru noMuna si, ntudi Guhya gelike.
37 Moomu tupu ya kere momazuva gaNowa, nekaropo* lyaMunwaMuntu yimo ngali kara ngorooro.
38 Moomu tupu ya kere komeho ru wize Ruhanzo, vantu ngava li oku tava nu, vagara ngava kwara ano vakadi ngava va pangere va kware dogoro ezuva eli ga rondere Nowa memuwato,
39 nye awo kapi va yi kwete egano dogoro noku rwa wizire Ruhanzo ru va zonagure po navenye, nekaropo* lyaMunwaMuntu yimo ngali kara ngorooro.
40 Ano mepya ngamu kara vagara vavali, gumwe ngava mu gusa po, ano ogu mukwawo ngava mu siga.
41 Povakadi vavali ava ngava twa yilya ngava gusa po gumwe, mukwawo tava mu sigi po.
42 Vangarareni, yeeyi kapi mwa diva ezuva eli nga wiza Hompa gweni.
43 “Nye diveni asi mwenya embo nsene a diva asi siruwoke* na wiza muwidi, amesi ngano ta vangarara a takamese va dire kuteza nzugo zendi.
44 Yipo nye nomu liwapaikilira none, yeeyi MunwaMuntu nga wiza movili zohararasi.
45 “Yilye nawa-nawa mukareli gokulimburukwa gonondunge ogu hekurwendi ga tulire a kare mutakamesi govantu vendi, a va paape nondya posiruwo souhunga?
46 Mukareli gwangesi erago nsene a ya mu gwana hekurwendi age ta yi sikisa mo!
47 Yosili nina kumutantera asi age nga ya mu pa nonkondo dokutakamesa yininke yendi nayinye.
48 “Nye nsene mukareli ogo gomudona a gazara asi: ‘Hekurwange kuna kuliranga,’
49 makura a tameke kutoona vakareli vakwawo oku ta li nokunwa kumwe nononkorwe,
50 hekurwendi nga wiza mezuva lyohararasi nomovili ezi nga dira kudiva,
51 age nga ya mu tengeka momunene, nokumutura kumwe novayilipaki. Oko yiko nga lilira oku ta likwetja komazego.
Nonkango dokonhi
^ Ndi “ligenda konhi, likumbagera.”
^ Ndi “ogu a didimike.”
^ Ndi “sikorama sokufa.”
^ Ndi “vilike masiku.”
