Buke zaMateusa 25:1-46
25 “Uhompa wemeguru kuvhura kuufanekesa hena kovakadona murongo ava va gusire noramba dawo va simbagwire mukwali.
2 Vatano kwa kere magova, ano ava vakwawo vatano kwa kere vanandunge.
3 Wovagova kwa simbire noramba dawo va hana kupitura ko maholi,
4 nye wonondunge tava pitura maholi moyipako yawo nonoramba dawo.
5 Ano siruwo esi ga liranga-rangere mukwali kuwiza, navenye tava kumauka, tava rara.
6 Pokatji komasiku tapa zuvhika ezwi lina kuzigira asi: ‘Mukwali gogo ana kuwiza, mu simbagwireni!’
7 Makura vakadona navenye tava pinduka, tava wapaike noramba dawo.
8 Wovagova makura tava tantere wonondunge asi: ‘Tu gusireni mo momaholi geni, noramba detu kuna kudima.’
9 Wonondunge tava limburura asi: ‘Hawe, nampo kapi natu ga gwaneka. Yoyiwa po, zendeni kovarandesi mu ka rande.’
10 Hava za mokukaranda, mukwali ta wiza. Ano ava va liwapaikilire, tava hwilire nage monzugo zosipito sononkwara, makura evero tava li zedire.
11 Konyima, vakadona vakwaawo nawo tava wiza, tava zigire asi: ‘Ani hompa, hompa, tu zegurura!’
12 Age ta va limburura asi: ‘Yosili nina kumutantera asi ame kapi na mu diva.’
13 “Yipo nye nomu vangararera, morwa kapi mwa diva ezuva novili.
14 “Ayo kwa fana ngwendi mugara ogu ga here kuza kougenda, makura ta zigida vakareli vendi, a va sigire emona lyendi, va li mu takamesere.
15 Age kwa geve yimaliwa* yitano kwagumwe, ano kwamukwawo yimaliwa yivali, kogu gwautatu simaliwa simwe. Age kwa geve kwankenye ogu yokuheteka ponondunge dendi, kutunda opo makura ta zi nye.
16 Ogu ga gwene yimaliwa yitano, ta zi ta ka ruganesa ko ngesefa, ta ka gwanena po hena yimaliwa yitano.
17 Ano ogu ga gwene yimaliwa yivali, ta ka gwanena po hena yimaliwa yivali.
18 Nye ogu ga gwene simaliwa simwe, ta zi ta ka sima ekero, ta ka vhumbika mo yimaliwa* yahekurwendi.
19 “Apa sa pitire po siruwo sosire, hekurwawo makura ta wiza a ya tare yimaliwa yendi kumwe nawo.
20 Ogu ga gwene yimaliwa yitano, ta wiza noyimaliwa yitano eyi ga gwanenene po, ta tanta asi: ‘Hekurwange, yimaliwa yitano wa pere nge, tara, na gwanena po hena yimaliwa yitano.’
21 Hekurwendi makura ta mu tantere asi: ‘Yina wapa, o mukareli gomuwa gokulimburukwa. Ove kwa limburukwa mweyi yoyinunu. Ngani ku pa situmbukira sokupakera mbili yininke yoyinzi. Wiza o ya hafe kumwe name.’
22 Ogu ga gwene yimaliwa yivali nage ta hedere po, ta tanta asi: ‘Hekurwange, yimaliwa yivali wa pere nge. Tara, na gwanena po hena yimaliwa yivali.’
23 Hekurwendi makura ta mu tantere asi: ‘Yina wapa, o mukareli gomuwa gokulimburukwa. Ove kwa limburukwa mweyi yoyinunu. Ngani ku pa situmbukira sokupakera mbili yininke yoyinzi. Wiza o ya hafe kumwe name.’
24 “Moruhura, mukareli ogu va pere simaliwa simwe ta hedere po, ta tanta asi: ‘Hekurwange, ame na yi divire tupu asi ove muntu ogu ga hara kupanga, ove kuteza oku wa dira kukuna, ove hena kuzangura eyi wa dira kuruganena.
25 Yiyo na tjililire yooyo makura tani zi ni ka vhumbike simaliwa soge mevhu. Gusa simaliwa soge.’
26 Hekurwendi makura ta mu limburura asi: ‘Udona woge owo, mukareli goudwa, ove wa divire asi ame kuteza oku na dira kukuna, hena asi ame kuzangura oku na dira kuzera.
27 Yisinke nye eyi wa dilira kutwarera nge yimaliwa* yange kombanga, mokuninkira asi apa ngani tengura ngani ya gwane ko nsonso.
28 “‘Ngoso, yi mu guseni mu yi pe gwina goyimaliwa murongo.
29 Yeeyi ogu ga kara noyuma, ngava mu pa yoyinzi yipo yi mu vhukire. Ano ogu ya dira, neyi ga kara nayo ngava yi mu gusa.
30 Nye mukareli ogu ga hana sikwafo, mu zugumineni ponze momundema. Mwina yimo nga lilira oku ta likwetja komazego.’
31 “Apa nga wiza MunwaMuntu mouyerere wendi kumwe novaengeli vendi, ntani nga hingira posipundi souyerere wendi.
32 Nomuhoko nadinye ngadi ponga komeho zendi, makura age nga di hangura ngwendi moomu musita a hangura nonzwi koyikombo.
33 Nonzwi nga di tura korulyo rwendi, ano yikombo korumoho rwendi.
34 “Hompa makura nga tantera wokorulyo rwendi asi: ‘Wizeni oku, one ava ga tungika Tate, mu ya pinge Uhompa ou va mu wapaikira kutunda ketameko lyouzuni.
35 Morwa apa za kwete nge nzara, one yiyo mwa pere nge ni lye. Apa na fire enota, one yiyo mwa pere nge ni nwe. Apa na kere ni mugenda, one yiyo mwa tambwire nge,
36 apa na kere nonkagi, one yiyo mwa dwarekere nge. Apa na verere, one yiyo mwa tarerere nge po. Apa na kere modorongo, one kwa ya dingwire nge.’
37 Vahungami makura ngava mu limburura asi: ‘Hompa, ezuvake twa kumwene ono kara nonzara, tu ku pe o lye, ndi li kukwate enota, tu ku pe o nwe?
38 Ntani ezuvake hena wa kere mugenda, tu kutambure, ndi nkagi, tu kudwareke?
39 Ezuvake hena twa ku mwene, to vere ndi ono kara modorongo, tu ka ku tarere po?’
40 Makura Hompa nga va limburura asi: ‘Yosili nina kumutantera asi nkenye eyi mwa ruganena gomununu po povamumbya vange, nyame mwa yi ruganena.’
41 “Age ntani nye nga tantera wokorumoho rwendi asi: ‘Zendeni kwi, one ava va fingilira, mu ze momundiro gwanarunye,* ogu va wapaikira Muzonaguli novaengeli vendi.
42 Morwa apa za kwete nge nzara, one kapi mwa pere nge ni lye. Apa na kere nenota, kapi mwa pere nge ni nwe.
43 Apa na kere mugenda, one kapi mwa tambwire nge. Apa na kere nonkagi, kapi mwa dwarekere nge. Apa na verere ndi apa na kere modorongo, one kapi mwa tarerere nge po.’
44 Makura nawo ntani ngava mu pura asi: ‘Hompa, ezuvake twa ku mwene ove ono fu nzara ndi enota ndi o mugenda ndi nkagi ndi to vere ndi ono kara modorongo, tu dire kukuvatera?’
45 Age makura ntani nga va limburura asi: ‘Yosili nina kumutantera asi nkenye eyi mwa dira kuruganena gomununu po povamumbya vange, nyame mwa dira kuyiruganena.’
46 Ava makura ngava va zonagwilira po,* nye vahungami ngava gwana mwenyo gwanarunye.”
Nonkango dokonhi
^ MoRugereka asi “talent.” Talent zimwe ngazi vihi 20,4 kg.
^ MoRugereka asi “sisiliveli.”
^ MoRugereka asi “sisiliveli.”
^ Kwa tamba kezonauko lyanarunye.
^ Kutanta asi kapi ngava kara po hena. MoRugereka asi “kuteta ko.”
