Buke zaMateusa 27:1-66
27 Apa lya sire ezuva, vapristeli nomasimbi tava liyongo omu nava dipaga Jesus.
2 Tava mu manga, makura tava mu twara va ka mu gave kwaPiratusa, mupangeli gosirongo.
3 Judasa, muhoroli gwendi, apa ga mwene asi Jesus vana mu tokwere nomfa, ta livere unene. Yipo ga tengwidire ko yimaliwa 30 yosisiliveli kovapristeli nomasimbi,
4 ta tanta asi: “Ame nina zono pokuhorora muntu ga hana nzo, va mu dipage.” Nye awo tava mu tantere asi: “Owo udigu woge, kapisi wetu.”
5 Makura ta ka zugumina yimaliwa yosisiliveli montembeli, ta ka limangerera kositji.
6 Vapristeli tava toragura yimaliwa yosisiliveli, tava tanta asi: “Eyi nokuwapa si kuyitura mosikesa semona lyontembeli, yeeyi ayo yimaliwa vana futu mokudipaga muntu.”*
7 Apa va mene kuyiliyonga, tava yi ruganesa mokuranda epya lyomuhongi gerova, li kare evango lyokuvhumbika vanayirongo.
8 Yipo nye ava li tumbwire epya eli dogoro nanaina asi Epya lyoMponde.
9 Ngesi yimo da sikire mo nonkango domuporofete Jeremiya, edi ga uyungire asi: “Awo tava gusa yimaliwa 30 yosisiliveli, ndando ezi va tulisire po Vaisraeli mokurandesa muntu,
10 makura tava yi gava, va rande epya lyomuhongi gerova, moomu ga pangera nge Jehova.”
11 Jesus kwa sikamene komeho zomupangeli, makura mupangeli ta mu pura asi: “Nyove Hompa goVajuda ndi?” Jesus ta mu limburura asi: “Yimo, moomu ono tanta.”
12 Nye apa va mu rundilire vapristeli nomasimbi, age teete.
13 Piratusa makura ta mu pura asi: “Kapi ono kuzuvha kuhamena yininke yoyinzi eyi vana kukurundira ndi?”
14 Nye age kapi ga mu limbwilire nampili nkango zimwe zeezi, dogoro mupangeli gosirongo tayi mu tetura unene.
15 Pwankenye sipito soPaska, mupangeli nga mangurura nkwate zimwe ezi va here vantu kuvamangwilira.
16 Posiruwo oso, awo kwa kere nonkwate zimwe ezi za divikwire morwa kurugana udona, zedina Barabasa.
17 Apa va pongere, Piratusa ta va pura asi: “Yilye ogu muna hara nani mu mangwilira, Barabasa ndi Jesus, ogu ava tumbura asi Kristusa?”
18 Yeeyi Piratusa ga yi divire asi awo kwa mu twere kwendi morwa mfudu.
19 Age haga hingilira posipundi sokupangwira, mukadendi ta tumu muntu a ka mu tantere asi: “Wa ha lipaka mogo muhungami, yeeyi ame naina monzodi kuna mono udigu morwa mugara ogo.”
20 Nye vapristeli wovanene nomasimbi tava zedagwire mbunga asi zi tumbure Barabasa, nye Jesus va mu dipage.
21 Mupangeli makura ta va pura asi: “Pwava vavali, yilye muna hara nani mu mangwilira?” Awo tava tanta asi: “Barabasa.”
22 Piratusa ta va pura asi: “Yisinke nye nani rugana ogu Jesus ava tumbura asi Kristusa?” Navenye tava zigire asi: “Va mu pampare kositji!”
23 Age ta va pura asi: “Morwasinke? Udona musinke ga rugana?” Vena makura tava ziguruka unene asi: “Va mu pampare kositji!”
24 Piratusa apa ga mwene asi kwato eyi ana kutompora, ntani ndjorongani kuna kuligwederera, ta gusa mema, ta kuhu mawoko gendi komeho zombunga, ta tanta asi: “Ame kutupu usima wohonde zogu muhungami. Owo udigu weni.”
25 Mbunga mudima tazi limburura asi: “Honde zendi ngava zi tondore kwetu nokovana vetu.”
26 Makura age ta va mangwilire Barabasa, ano ta panga asi Jesus va mu sopore,* va mu tware va ka mu pampare kositji.
27 Kutunda opo, vakwayita womupangeli tava twara Jesus mombara zomupangeli, tava pongaike mbunga zovakwayita zi mu kundurukide.
28 Awo makura tava mu hutura yidwara yendi, tava mu dwareke erwakani lyegeha,
29 tava mu gangere nkata zomega noku zi mu dwareka komutwe, tava mu pe ruu mokuwoko kwendi korulyo. Makura tava mu twire nongoro, tava mu zoro pokutanta asi: “Moro, Hompa goVajuda!”
30 Makura tava mu fizagere, tava mu gusa ruu, tava ru mu toonesa momutwe.
31 Apa va mene kumuzora, tava mu hutura erwakani, tava mu dwareke hena yikoverero yendi yokontunda. Makura tava mu twara, va ka mu pampare kositji.
32 Awo kuna kupwaga mositata, tava gwanekere nomugara gomoKirene, gedina Simoni. Tava mu sininike a mu simbire po sitji* sendi.
33 Apa va ya sikire kevango eli ava tumbura asi Gorogata, kutanta asi Evango lyoYikora,
34 tava mu pe vhinyu zokuvhonga nonyangwe* asi a nwe, nye apa ga zi makerere, ta nyoka kuzinwa.
35 Apa va mene kumupampara kositji, yikoverero yendi yokontunda tava yi ligavere pokuyininkira fungu-fungu,
36 tava mu hingilire, va mu kunge.
37 Keguru lyomutwe gwendi tava tura ko sidiviso apa va tjenge nonkango edi va mu rundilire asi: “Ogu yige Jesus, Hompa goVajuda.”
38 Age kwa mu pamparere kumwe novanamahaka vavali, gumwe korulyo, ano mukwawo korumoho rwendi.
39 Ava va pitire konzira, kwa mu swawire oku tava puku nomutwe dawo,
40 tava tanta asi: “Nyove wa tente asi ngo zungurura ntembeli nokuzitungurura momazuva gatatu, lipopera nyamoge nye no! Nsene asi ove MunwaKarunga, liturura ko sa nye kositji!”*
41 Vapristeli wovanene novalirongi womatjangwa nomasimbi nawo kwa mu swawire asi:
42 “Age nga popere vakwawo, ngapi omu yina kumuvhura yokulipopera mwene! Nsene asi sili age Hompa gwaIsraeli, a tunde ko kositji* no, makura ngano nose natu mu pura.”
43 Age kwa huguvara Karunga, a mu popere nye, nsenesi sili ga mu hara. Yeeyi age kwa tente asi: ‘Ame MunwaKarunga.’
44 Novanamahaka ava va mu pamparere nendi kositji, nawo yimo ngorooro va mu swawire.
45 Kutunda povili zauntazimwe* dogoro vili zauntane,* mosirongo nasinye ta mu kara mundema gomunene.
46 Koyiha yovili zauntane, Jesus ta zigire nezwi lyenene asi: “Eli, Eli, lama sabaktani?” kutanta asi “Karunga gwange, Karunga gwange, yisinke ono sigilire nge?”
47 Apa va yi zuvhire, vamwe ava va sikeme po tava tanta asi: “Mugara ogu, kuna kuzigida Eliya.”
48 Naruvali si gumwe ta duka, ta gusa kaninke,* ta ka zaveke movhinyu zoururu, ta ka tura koruu, makura ta ka mu kandwisire, a mu nwise.
49 Vena pena asi: “Sigeni tu tare, nsene asi Eliya na wiza a ya mu kwafe.”
50 Jesus ta zigire hena nezwi lyenene, makura ta fu.
51 Va tara ko, ekehe lyomontembeli tali tauka pokatji kutunda keguru dogoro pevhu. Evhu kwa kankamene, ano mamanya kwa gagaukire.
52 Nontoko* kwa zegurukire, makura yimpu yovapongoki tayi gwire ponze,
53 vantu wovanzi kwa yi mwene. (Konyima zapa va mu vhumbwire Jesus, vantu ava va zire komayendo, kwa ka tundire ko va ze mositata sokupongoka.)
54 Apa mupitisili govakwayita efere novakwayita vendi ava va kungire Jesus va mwene ekankamo lyevhu noyininke eyi ya horokere, kwa tukukire makura tava tanta asi: “Nani yosili, MunwaKarunga ga kere.”
55 Pwa kere vakadi wovanzi ava va mu tarerere koure. Awo kwa kweme Jesus kutunda koGalireya, va mu kwafe,
56 mokatji kawo kwa kere mo Mariya Mangadarena naMariya zinyaJakopo naJosesi ntani zinya vana vaSebede.
57 Kositenguko tapa wiza mugara gongawo gomoAremateya, gedina Josefa. Nage murongwa gwaJesus ga kere.
58 Age kwa zire kwaPiratusa a ka hundire simpu saJesus. Piratusa makura ta gava mpangera asi va si mu pe.
59 Josefa ta gusa simpu, ta si dingire pekehe,
60 ta si tura montoko* zendi zompe, ezi ga litjokwerere mwene memumanya. Makura ta sindumwine ko emanya lyenene kevero lyontoko, ta ka za.
61 Nye Mariya Mangadarena naMariya mukwawo kwa hingilire pepi nontoko.
62 Ezuva lya kweme ko, konyima zomaliwapaikiro, vapristeli noVafalisayi tava pongo komeho zaPiratusa,
63 tava tanta asi: “Muhona, ose tuna diworoka eyi ga uyungire mupukisi gwina apa ga kere muzuni asi: ‘Konyima zomazuva gatatu, ngava vhumbura nge.’
64 Age ta gava mpangera asi va ka nomene kontoko dogoro mezuva lyautatu, neisi varongwa vendi ngava mu vaka mo, va tantere vantu asi: ‘Vana mu pindura koufe.’ Makura yimpempa yokuhulilira ngano ngayi dida kupitakana yomuhowo.”
65 Piratusa ta va limburura asi: “Vanomeni wowo, zendeni mu ka nomene ntoko moomu mwa divira.”
66 Awo makura tava zi, tava ka tura ko mamanya yipo zi kore, makura tava sigi po munomeni.
Nonkango dokonhi
^ Ndi “yimaliwa yomponde.”
^ Yininke youruru.
^ Kwa tamba koyiha yovili 12, mutwekatji.
^ Kwa tamba koyiha yovili 3, sitenguko.
^ Kaninke aka kwa fene ngwendi katarase aka ava ruganesa mokuzeresesa ko.
^ Ndi “mayendo.”
^ Ndi “meyendo.”
