Buke zaMateusa 28:1-20
28 Konyima zEsabata, kongurangura zonene zezuva lyokuhova lyomosivike,* Mariya Mangadarena naMariya mukwawo, kwa zire va ka tare kontoko.
2 Tapa horoka ekankamo lyenene lyevhu, yeeyi muengeli gwaJehova kwa tundire meguru, makura ta sindumuna ko emumanya kontoko, makura ta hingire po.
3 Age kwa monekere ngwendi site soruvadi, ano yikoverero yendi ya tooto ngwendi yiterengenze.
4 Vanomeni kwa tukukire unene dogoro tava pwilire.
5 Nye muengeli ta tantere vakadi asi: “Mwa ha tjira. Nina yi diva asi Jesus muna kupapara, ogu kava pamparere kositji.
6 Age mwato omu, ka va mu pindwire koufe, moomu ga tente. Wizeni mu ya tare pevango eli ka rere.
7 Zendeni usimbu mu ka tantere varongwa vendi asi vana mu pindura koufe. Tareni, age ta mu hovere kuza koGalireya. Kwina yiko nye ngomu ka mu mona. Ezi yizo mbudi nina mu retere.”
8 Tava tundu po pontoko, awo vana kara nowoma, oku hena vana hafa unene, va ka tantere varongwa vendi.
9 Va tara ko, Jesus ta va wizire, ta uyunga asi: “Morokeni!” Makura tava mu hedere, tava mu kwata konompadi, tava mu tongamene.*
10 Jesus ta va tantere asi: “Mwa ha tjira! Zendeni mu ka tantere vamumbya vange, va ze koGalireya. Kwina yiko nye ngava ka monena nge.”
11 Hava za mokugenda, vanomeni vamwe tava zi mositata, tava ka tantera vapristeli wovanene nayinye eyi ya horokere.
12 Awo makura tava pongo kumwe nomasimbi, va liyonge, makura tava pe vanomeni yimaliwa yoyinzi,
13 tava va tantere asi: “Ka tanteni asi ‘varongwa vendi yiwo vana wiza va ya mu vake mo masiku, ose tuna rara.’
14 Nsene nga yi zuvha mupangeli, ngatu yi mu fatwilira,* one mwa ha kara nosinka.”
15 Awo makura tava gusa yimaliwa, tava ka rugana moomu va va tanterere. Mbudi ezi kwa lihanena moVajuda dogoro naina.
16 Varongwa 11 kwa zire koGalireya kondundu ezi ga va tanterere Jesus asi yiko nava za.
17 Apa va mu mwene, tava mu tongamene,* nye vamwe kapi va yi pulire nawa-nawa asi yige.
18 Jesus ta va hedere, ta va tantere asi: “Nonkondo nadinye demeguru, nedi depevhu nyame va di pa.
19 Yipo nye nomu zira konomuhoko nadinye, mu ka tulise po varongwa, mu ka va kuhwire medina lyaGuhwe neli lyoMuna neli lyompepo zokupongoka,
20 ka va rongeni, va ka limburukwe nayinye eyi na mu tantera. Tareni, ame none ngani kara dogoro pouhura wouzuni.”*
Nonkango dokonhi
^ Ezuva eli atu tumbura asi Sondaha, koVajuda alyo kwa kere ezuva lyokuhova lyomosivike.
^ Ndi “nyongamene.”
^ MoRugereka asi “kumuninka a yi pure.”
^ Ndi “nyongamene.”
