Buke zaMateusa 3:1-17
3 Momazuva ogo, Johanesa Mukuhwi kwa zuvhisire momburundu zaJudeya
2 asi: “Litezurureni, yeeyi Uhompa waKarunga pepi una kara.”
3 Age yige googu ga tembe muporofete Jesaya apa ga tente asi: “Ezwi lyagumwe kuna kuzigira momburundu asi: ‘Wapaikireni Jehova nzira, vyukiseni nonzira dendi.’”
4 Johanesa nga dwara sikoverero sonohuki dongameru noliva rosipapa mombunda zendi, ano nondya dendi kwa kere simbonde nousi.
5 Vantu womoJerusarema naJudeya nazinye nava womoyirongo nayinye eyi ya kundurukidire Jorodana ngava zi kwendi.
6 Awo ngava tanta nonzo dawo, age makura ta va kuhwire* momukuro gwaJorodana.
7 Apa ga mwene Vafalisayi noVasadukayi wovanzi kuna kuwiza oku ga kuhwilire vantu, ta tanta asi: “One vana wonombaroka, yilye ogu ana mu tantere mu henduke ehandu lyenene lyaKarunga eli lina kuwiza?
8 Nsene yimo ngoso, yimeni nye yiyimwa eyi ayi likida elitezururo.
9 Walye omu ligazara asi ‘ose guhyetu Abirahamu.’ Nye ame tani mu tantere asi Karunga kwa kara nononkondo dokuninka mamanya aga ga kare vana vaAbirahamu.
10 Ekuva nare vana li tura konondandani dositji. Nkenye sitji esi asi dili kuyima yiyimwa yoyiwa, ngava si teta, tava si zugumine momundiro.
11 Ame kuna kumukuhwa tupu nomema, morwa muna litezurura, nye ogu nga wiza konyima zange, ga pita nge mononkondo. Ame kapi na wapera kumuhutura yicamakaku yendi. Age yige nga ya mu kuhwa nompepo zokupongoka nomundiro.
12 Sizereso mokuwoko kwendi sa kara. Age nga wapeka rupare rwendi nokupongaikira rukokotwa mosihete, ano rungu* nga ru swakerera momundiro ogu agu dili kudima.”
13 Jesus makura ta tundu moGalireya a ze koJorodana kwaJohanesa yipo a ka mu kuhwe.
14 Nye Johanesa ta mu kava asi: “Ove ngano nyove ono wapere kukuhwa nge, ngapi hena omu no wizira nge ame?”
15 Jesus ta mu limburura asi: “Wa ha kava nge, yeeyi ntani nayi tu wapera, tu sikise mo mpango zaKarunga.” Makura Johanesa ta yi pura.
16 Jesus kwa pwa tupu kumukuhwa, makura ta zauka momema. Va tara ko, eguru lina mu zegurukire, ta mono mpepo zaKarunga kuna kumuhegumukira pomutwe ngwendi mputukuwa.
17 Ano meguru tamu tundu ezwi lina kutanta asi: “Ogu yige Munange ogu na hara, ga za nge komutjima.”
