Buke zaMateusa 5:1-48
5 Apa ga mwene mbunga zovantu, ta rondo kondundu makura ta ka hingira, ano varongwa vendi tava mu wizire.
2 Makura ta tameke kuvaronga asi:
3 “Vantu woruhafo vaava ava dimburura asi va hepa Karunga,* yeeyi Uhompa wemeguru kwa hamena kwawo.
4 “Vantu woruhafo vaava ava guwu, yeeyi ngava va hengagwida.
5 “Vantu woruhafo vaava va linunupika,* yeeyi yiwo ngava pinga evhu.
6 “Vantu woruhafo vaava ava fire nzara nenota uhungami, yeeyi ngava va kutika.
7 “Vantu woruhafo vaava wonkenda, yeeyi nawo ngava va fira nkenda.
8 “Vantu woruhafo vaava wonomutjima dokukuhuka, yeeyi ngava ka mona Karunga.
9 “Vantu woruhafo vaava ava retesa po mbili,* yeeyi ngava va tumbura asi vana vaKarunga.
10 “Vantu woruhafo vaava ava hepere uhungami, yeeyi Uhompa wemeguru kwa hamena kwawo.
11 “One vantu woruhafo nsene vantu tava mu swaura oku tava mu hepeke, tava mu uyungire yoyidona nayinye moyimpempa-mpempa tupu, morwa kukara varongwa vange.
12 Hafeni unene, yeeyi mfeto zeni nene meguru, vaporofete ava va hovere kukara ko, nawo yimo ngorooro va va hepekere.
13 “One nyone mungwa gouzuni. Ano mungwa nsene gu hakumpara, kuvhura kuguninka hena gu kare mungwa ndi? Ago kutupu hena sikwafo. Ago kwa wapera kuguzugumina ponze, va gu lyatange vantu.
14 “One nyone uzera wouzuni. Sitata esi sa kara pondundu, kapi sa horama.
15 Kwato muntu ogu a hwameke ramba, a zi ture konhi zosipako,* nye kuzitura mouzweko woramba yipo zi temene navenye ava vana kara monzugo.
16 Nosite seni naso yimo nasi temena vantu yipo va mone yirugana yeni yoyiwa, va fumadekere po Guhyeni gemeguru.
17 “Mwa ha gazara asi ame kwa wizira ni ya zonagure po Veta ndi matjango goVaporofete. Ame kwa wizira mokuyayisikisa mo, nye kapisi mokuyayizonagura po.
18 Yosili nina kumutantera asi nampili eguru nevhu yi dongonoke po, nye nkenye karuha ndi ndanda zomoVeta, nga yi kara ngorooro dogoro ngayi sike mo nayinye.
19 Nkenye ogu a vatuka po nampili sipango esi asi moneka asi kwato mulyo makura a ronge wopeke nawo va yi rugane, ngava mu tara asi ga nunupa po moUhompa waKarunga. Nye ogu a sikisa mo nayinye makura a ronge wopeke nawo va yi rugane, ngava mu tara asi ga nenepa po moUhompa waKarunga.
20 Ame tani mu tantere asi nsene uhungami weni u dira kupitakana wovalirongi womatjangwa noVafalisayi, kapi ngomu hwilira moUhompa wemeguru.
21 “Mwa zuvha omu va tanterere ozinyakurweni asi: ‘Walye o dipaga, ano nkenye ogu a dipaga, ga wapera kumupangura.’
22 Nye ame tani mu tantere asi nkenye ogu a handukire mukwawo, ga wapera kumupangura, ano a kare ogu a ninki mukwawo asi: ‘Sininke somawoko-woko ove,’ ga wapera kumupangura mompanguro zonene. Ano a kare ogu a ninki asi: ‘Evaya tupu eli,’ ga wapera kumuzonagwilira po moGehena.*
23 “Nsene o reta nzambo zoge kosizambero, makura o diworoke asi mupuli mukweni koyili eyi ga kuzonena,
24 siga tanko nzambo zoge komeho zosizambero, o ka lipe mbili nendi, ntani nye no ka tengura o ya gave nzambo zoge.
25 “Genderera kukohonona po udigu nogu ono kudira kulizuvha nendi paapa ono kugenda nendi monzira, neisi na ka kutanta komupanguli ogu na ka kugava komuporosi gomompanguro, makura va ka ku ture modorongo.
26 Yosili nina kukutantera asi kapi ngo pwaga mo dogoro ngo mane kufuta senda zoge zokuhulilira.*
27 “Mwa zuvha sa omu va tanta asi: ‘Walye o hondere.’
28 Nye ame tani mu tantere asi nkenye ogu a tara mukadi nye a mu dovaukire nare ana hondere nendi momutjima.
29 Nsene asi eho lyoge lyokorulyo kuna kukuninkisa o zone, li korora mo o li zugumine kwina. Yeeyi hansa koge, nsene o zumbanesa ruha roge rumwe rorutu, kapisi kumwe neyi yokukazugumina rutu roge mudima moGehena.*
30 Ano nsene asi kuwoko koge korulyo kuna kukuninkisa o zone, kuteta ko o ku zugumine kwina, yeeyi hansa koge, nsene o zumbanesa ruha roge rumwe rorutu, kapisi kumwe neyi yokukazugumina rutu roge mudima moGehena.*
31 “Kwa tanta hena asi: ‘Nkenye ogu a zumbu mukadendi, a mu pe mbapira zelizumbo.’
32 Nye ame tani mu tantere asi ogu a zumbu mukadendi pwa hana konda zoruhonda,* kuninkisa mukadendi a kare mosiponga sokuhondera ntani ogu a kwara mukadi ogu va zumba, kuhondera.
33 “Mwa zuvha hena omu va tanterere ozinyakurweni asi: ‘Walye o gana moyimpempa, nye o sikise mo mugano goge kwaJehova.’
34 Nye ame tani mu tantere asi walye omu gana, li kare eguru walye omu li gana, yeeyi alyo sipundi saKarunga,
35 nevhu si walye omu li gana, yeeyi alyo ulyatero wonompadi dendi, naJerusarema si walye omu ganesa ko, yeeyi aso yiso sitata saHompa gomunene.
36 Nokomutwe goge si walye o ganesa ko, yeeyi ove kapi o vhuru kuninka ruhuki nampili rumwe asi ru zere ndi asi ru sovagane.
37 Nsene ono tanta asi ‘nhi’ yi sikisa mo, ano nsene asi ‘hawe’ yi sikisa mo, komuzonaguli kwelike ayi tundu yokudira kusikisa mo mugano.
38 “Mwa zuvha omu va tanta asi: ‘Nsene gumwe a twiza eho lyamukwawo, nage lyendi va hepa kulitwiza, ano nsene a bomona ezego, nage lyendi va hepa kulibomona.’
39 Nye ame tani mu tantere asi: Walye o tengwida kuwoko muntu gomudona, nye nsene ana kutoona ketama lyoge lyorulyo, mu pirwira nekwawo.
40 Ano nsene muntu ana hara kukutwara kompanguro, nye a guse sikoverero soge sokonhi, mu siga a guse nesi sokontunda,
41 ano nsene muntu ogu ga kara nononkondo dokupangera a ku sininika o gende nendi sinano sokilometa zimwe, genda nendi nokilometa mbali.
42 Gava kogu ana kukuhundira ntani wa ha zumina ogu ana hara kukukorota yuma.*
43 “One mwa zuvha sa omu va tanta asi: ‘Hara mukweni ntani nyenga nkore zoge.’
44 Nye tani mu tantere asi hareni nonkore deni oku tomu kanderere po ava ava mu hepeke,
45 yipo yi likide asi one vana vaGuhyeni gemeguru, morwa age kupumisira ezuva vadona novawa ntani kurokesera mvhura vahungami novanzoni.
46 Yeeyi nsene mu hara tupu vaava va mu hara, mfeto musinke ngomu gwanena po nye? Kapisi vafutisi womutero nawo yimo ava rugana?
47 Ndi nsene mu likunda-kunda tupu novapuli vakweneni velike, yisinke muna kurugana yomulyo? Vantu wokonomuhoko dapeke nawo nani kapisi yimo ava rugana?
48 Omu sikilire mo moomu ga sikilira mo* Guhyeni gemeguru.
Nonkango dokonhi
^ Ndi “vaava ava likwambere va gwane mpepo zokupongoka.”
^ Ndi “va gomoka.”
^ Ndi “wombili.”
^ Ndi “sipako sokumetesa.”
^ MoRugereka asi “quadrans zokuhulilira.”
^ Kutanta asi kukorotesa wa hana kugweda ko kweyi wa korotesa.
^ Ndi “kukwama sihonena saGuhyetu gemeguru.”
