Buke zaMateusa 8:1-34
8 Konyima zapa ga humburukire kondundu, mbunga zonene tazi mu kwama.
2 Kutunda opo, muntu goyingondwe ta mu wizire, ta mu twire nongoro,* ta tanta asi: “Hompa, nsene ono yi panga, kuvhura o verure* nge.”
3 Age makura ta gonyonona kuwoko kwendi, ta mu gumu, ta tanta asi: “Nina yi panga, veruka!” Naruvali si, ta veruka koyingondwe yendi.
4 Jesus makura ta mu tantere asi: “Wa ha ka yi tantera muntu. Nye zende o ka moneke komupristeli nokukagava nzambo ezi ga tura po Mosesa, yi ka kare umbangi kwawo.”
5 Apa ga zire moKaperenaumu, mupitisili govakwayita efere ta mu wizire, ta mu likwambere
6 asi: “Hompa, mukareli gwange kuna rara monzugo, age kuna kuzuvha kukora kokunene morwa mondambo ga kara.”
7 Age ta mu tantere asi: “Apa nani ka sika ko, nani ka mu verura.”
8 Mupitisili govakwayita makura ta mu limburura asi: “Hompa, ove kapi wa wapera kuhwilira membo lyange. Nye uyunga tupu nkango, makura mukareli gwange ta veruka.
9 Yeeyi name kwa kara mepangero lyomuntu ntani name na kara novakwayita ava ani pangere, ano nsene ni tantera gumwe povakwayita vange asi ‘zende,’ ta zi, ano mukwawo asi ‘wiza,’ ta wiza, ano nsene ni ninka mukareli gwange asi ‘rugana esi,’ ta si rugana.”
10 Apa Jesus ga yi zuvhire eyi, tayi mu tetura makura ta tantere vantu ava va mu kweme asi: “Yosili nina kumutantera asi moIsraeli kapi na gwana mo muntu gepuro lyenene ngwendi gogu.
11 Nye tani mu tantere asi wovanzi ngava tunda koUpumezuva nokoUtokero, va ya hingire kositafura kumwe naAbirahamu naIsaka naJakopo moUhompa wemeguru,
12 nye ava wa tumbukira Uhompa wemeguru, ngava va tjidira ponze momundema. Mwina yimo ngava lilira oku tava likwetja komazego.”
13 Jesus makura ta tantere mupitisili govakwayita asi: “Zende, yi ku horokere moomu ono yi pulire.” Makura mukareli gwendi ta veruka movili zoozo.
14 Apa Jesus ga wizire membo lyaPeturusa, ta gwana ngumweyi zaPeturusa age ana rara, ta vere.
15 Ta mu kwata kokuwoko, makura ta veruka. Ta katuka makura ta mu wapaikire ko nondya.
16 Ngurova, tava mu retere vantu wovanzi ava va kere nonompepo donondona. Ta tjida mo nompepo donondona konkango zendi nokuverura vaveli navenye,
17 yipo yi sike mo eyi ga uyungire muporofete Jesaya asi: “Age kwa likambeka mauvera getu, yiyo ga simba maudigu getu.”
18 Apa Jesus ga mwene mbunga zonene zina mu kundurukida, ta tantere varongwa vendi va ze nage mesinya mwina.
19 Mulirongi gumwe gomatjangwa makura ta mu hedere, ta mu tantere asi: “Murongi, ame tani kukwama nkenye oku no za.”
20 Nye Jesus ta mu tantere asi: “Vambanze nomakero gawo, ano yidira nayo noyikorogo yayo, nye MunwaMuntu kapi ga paka oku na sateka mutwe gwendi.”
21 Murongwa gwendi gumwe makura ta mu tantere asi: “Hompa, pulisira nge tanko ni ka horeke otate.”
22 Nye Jesus ta mu tantere asi: “Kwama nge, siga vafe va horeke vafe vakwaawo.”
23 Apa ga rondere mowato, varongwa vendi nawo tava mu kwama.
24 Va tara ko, ekundungu lyenene lina pinduka mefuta. Mankupi taga yeragura wato, nye Jesus kwa rere.
25 Awo tava wiza va ya mu pindure pokutanta asi: “Hompa, tu popera, tatu fu!”
26 Nye age ta va tantere asi: “Morwasinke muna karere nowoma* ngoso one vepurogona?” Ta pinduka, ta kava ekundungu nefuta, makura tayi litura.
27 Vagara owo tava tetuka, tava tanta asi: “Muntu musinke hena ogu no? Ogu ali limburukwa ekundungu nefuta lyeeli.”
28 Apa ga ka sikire mesinya mwina momukunda goVagadara, vagara vavali wonompepo donondona ava va tundire monontoko,* tava mu simbagwire. Awo kwa kere nyanya unene, kwato ogu nga gendi nzira ozo.
29 Makura tava zigire asi: “Yisinke tuna kuzono, ove MunwaKarunga? Kuna wizire oku o ya tu hepeke, aso siruwo setu sa hana kusika mo ndi?”
30 Pepi nevega olyo, kwa kere po yinguru yoyinzi yina kulya.
31 Nompepo donondona tadi mu likwambere asi: “Nsene to tu tjida mo, tu siga nye tu ka hwilire moyinguru oyo.”
32 Makura age ta di tantere asi: “Zendeni!” Makura ado tadi pwaga tadi ka hwilira moyinguru. Va tara ko, yinguru nayinye tayi kunkumukire mefuta, tayi fu komema.
33 Nye vasita tava duka va ze mositata, tava ka tanta nayinye eyi va mwene, kukwatera mo neyi ya horokerere vagara wonompepo donondona.
34 Makura vantu navenye womositata tava simbagwire Jesus. Apa va mu mwene, tava mu tantere a tunde mo momukunda gwawo.
Nonkango dokonhi
^ Ndi “nyongamene.”
^ MoRugereka asi “kukuhura.”
^ Ndi “guna mu pwagere.”
^ Ndi “momayendo.”
