Buke zaMateusa 9:1-38
9 Age makura ta rondo mowato nokuruta a ze kositata oku ga tungire.
2 Makura tava mu retere sirema somondambo, aso sina rara pouro. Apa Jesus ga mwene asi vana kara nepuro, ta tantere sirema asi: “Wa ha kara nosinka, munange, nonzo doge vana di ku dongwenene po.”
3 Makura valirongi vamwe womatjangwa tava gazara monomutjima dawo asi: “Ogu kuna kuswaura Karunga.”
4 Jesus, ga divire eyi va gazarere makura ta va tantere asi: “Morwasinke muna kugazarera yininke yoyidona ngesi?
5 Yipi youreru po, yokuuyunga asi ‘nonzo doge vana di ku dongwenene po,’ ndi asi ‘katuka o gende’?
6 Nye mokuninka asi mu dive asi MunwaMuntu ga kara nononkondo dokudongonona po nonzo pevhu—” makura ta tantere sirema asi: “Katuka, damuna uro woge o ze kembo.”
7 Makura age ta katuka a ze kembo lyendi.
8 Mbunga apa za yi mwene eyi, tazi tetuka nokuhamberera Karunga ogu ga pere vantu nonkondo odo.
9 Jesus eyi ga tunda opo, ta mono mugara gedina Mateusa ana hingire pomberewa zomutero, makura ta mu tantere asi: “Kara murongwa gwange.” Poopo ngoso, ta katuka a mu kwame.
10 Konyima zosiruwo, Jesus kwa zire a ka lye kembo lyaMateusa, makura vafutisi womutero wovanzi novananzo tava wiza va ya lye kumwe nage novarongwa vendi.
11 Nye Vafalisayi apa va yi mwene, tava pura varongwa vendi asi: “Morwasinke murongi gweni a lire kumwe novafutisi womutero novananzo?”
12 Apa ga yi zuvhire, ta va limburura asi: “Vakanguki kapi va hepa ndokotora, vaveli yiwo va mu hepa.
13 Zendeni, mu ka lironge eyi yina kutanta eyi asi: ‘Ame kwa hara nkenda, kapisi nzambo.’ Ame kapi na wizira vahungami, nye vananzo na wizira.”
14 Varongwa vaJohanesa makura tava mu wizire nokumupura asi: “Morwasinke nose noVafalisayi atu dililire nondya, nye varongwa woge va dire kudilira?”
15 Jesus ta va limburura asi: “Vakwawo womukwali kapi va hepa kuguva age simpe nawo ana kara. Nye mazuva ngaga wiza apa mukwali ngava mu gusa po, ntani nye ngava dilira.
16 Kwato ogu a vandekesa sivando sosipe posikoverero sosikurukuru, neisi na si taura sikoverero sosikurukuru si sige po entomo.
17 Ano muntu kapi a dwire vhinyu zompe monompunda* dononkurunkuru, neisi di tauka, vhinyu zi tjike mo, makura nompunda tadi zonauka. Ano vhinyu zompe kuzidwira monompunda donompe, ntani yi kara po nayinye.”
18 Age simpe kuna kuvatantera eyi, ga tara ko, mupangeli gumwe kuna kuwiza, ta mu twire nongoro* nokutanta asi: “Munange gomukadona ngesi nampo ana fu. Wiza o ka mu kambeke kuwoko koge, makura a ka paruke.”
19 Jesus novarongwa vendi makura tava zi nendi.
20 Ano mukadi ogu ga verere uvera wohonde nomvhura 12, ta mu tundilire konyima, ta kwata konyerera zosikoverero sendi,
21 age kwa liuyungisire momutjima asi: “Nsene nani kwata nampili kosikoverero sendi, tani veruka.”
22 Jesus ta piruka, ta mu tara, ta mu tantere asi: “Wa ha tjira munange, epuro lyoge lina kuverura.” Mukadi makura ta veruka movili zoozo.
23 Ano apa ga ya sikire monzugo zomupangeli, ta mono vantu vana kusika nonsumo doruguwo* nombunga zovantu vana kulira unene,
24 Jesus ta va tantere asi: “Tundeni mo, yeeyi mukadona kapi ana fu nye kuna rara.” Awo makura tava mu zoro sirungu.
25 Apa va pwege mo, ta hwilire mo nokumukwata kokuwoko, mukadona makura ta pinduka.
26 Mbudi zokuhamena yininke eyi kwa lihanene momukunda nagunye.
27 Apa Jesus ga tundire po, vatwiku vavali tava mu kwama oku tava zigire asi: “MunwaNdafita, tu fira nkenda!”
28 Konyima zapa Jesus ga hwililire membo limwe, vatwiku tava mu kwama, age tava pura asi: “Muna yi pura asi kuvhura ni yi rugane eyi ndi?” Awo tava mu limburura asi: “Nhi, Hompa.”
29 Makura ta va kwata pomeho gawo, oku ta uyunga asi: “Yi mu horokere moomu muna yi pulire.”
30 Meho gawo makura taga mahuka. Jesus ta va rondora asi: “Takameseni asi mwa ha ka yi zigauka kovantu.”
31 Nye awo kwa ka yi zigaukire momukunda nagunye.
32 Apa va tundire po, vantu tava mu retere mugara gosipuru-puru ogu ga kere nompepo zondona,
33 apa ga mene kutjida mo mpepo zondona, mugara ogo ta tameke kuuyunga. Mbunga kwa tetukire nokutanta asi: “Ose kapi twa yi mona mo rumwe eyi moIsraeli.”
34 Nye Vafalisayi tava tanta asi: “Age kutjida mo nompepo donondona nononkondo domupangeli gonompepo donondona.”
35 Jesus ta zi moyitata nayinye nomonomukunda nadinye, a ronge monosinagoge dawo nokuzuvhisa mbudi zongwa zoUhompa, nokuverura nkenye uvera nankenye kukora.
36 Apa ga mwene mbunga zovantu, ta va fire nkenda morwa yeeyi va va sigilire va hepe ngwendi nonzwi da hana musita.
37 Makura ta tantere varongwa vendi asi: “Muzangu munzi, nye varugani vasesu.
38 Yipo nye, hundireni Mwenyamuzangu a tume ko varugani komuzangu gwendi.”
