Nahumu 2:1-13
2 Ogu a hanagura ana ku* wizire.
Kunga makuma goge.
Tarera kositaura.
Liwapaikira ntani rugana ko yuma yipo o nkondopare.
2 Yeeyi Jehova nga ninka Jakopoa fumane kumwe naIsraeli,morwa nonkore dawo kwa zonagura sirongo sawo,ntani nonomutayi dawo.
3 Yilikandwiso yononkore daNinivhe yigeha,vakwayita vawo kuna dwara yoyigeha.
Mezuva eli ngava liwapaikira yita,yivera yoturukara twawo toyita ngayi twera ngwendi mundiro.Magonga gawo goyitji vana ga wapaike.
4 Turukara toyita kuduka kugenderera moyitarata.
Ato kudukagana mositata.
Ato kutema ngwendi noramba domundiro ntani kuvema ngwendi ruvadi.
5 Age nga zigida vakwayita vendi.
Awo ngava liganda ngomu ngava za komeho.
Awo ngava dukira kekuma lyendi;tava dike yilipopereso.
6 Marungavero gokonomukuro ngava ga zegurura,ano mbara ngava zi zonagura po.
7 Vana yi tokora: Vana mu fisa nomuga,vana mu twara, ano vapika vendi wovakadona kuna kumulira;awo kuna kuzuvhika ngwendi nomputukuwa ngomu vana kulitoona pomavere* gawo.
8 Kutunda kwanare Ninivhe kwa kara ngwendi mema gomanzinye ngesi kuna kumuduka.
“Sikameni! Sikameni!”
Nye kwato ogu ana kutengura.
9 Hakaneni sisiliveli, hakaneni ngorodo!
Emona lyawo enzi unene.
Alyo kwa li pungura kumwe noyininke yoyinzi yoyiwa.
10 Sitata sawo muporongwa, erunda ntani sa zonauka!
Nomutjima dawo kuna kukankama, nongoro dawo kuna kumenga, nonyonga dawo kuna kukankama.Yipara yawo nayinye yina suwu.
11 Yisinke ya horokera sitata esi sa kere ngwendi ekombombo lyovanyime, omu ngava lire vanyimegona,omu ngava gendi vanyime novana vawo,va hana kutjira yuma?
12 Nyime ogu nga papagwire vana vendi nyamanokudipagera vanyime wovakadi.
Ekombombo lyendi ngali zwida nonyama,ano siunda sendi, noyikorama eyi ga papagura.
13 Jehova mupitisili govakwayita vemeguru kuna kutanta asi: “Ame tani kurwisa.Ame ngani hwika turukara toge toyita.
Rufuro ngaru dipaga vamatigona woge.*
Ame ngani kuhagekesa mokuhakana uzuni,
ntani ezwi lyonontumi doge kapi ngava li zuvha hena.”
Nonkango dokonhi
^ Kwa tamba Ninivhe.
^ MoRuhebeli asi “ponomutjima.”
^ MoRuhebeli asi “vanyimegona.”
