Numeri 22:1-41
22 Vaisraeli tava katuka makura tava ka dika kamba zawo momazana gaMowaba aga ga livyuka naJeliko koUpumezuva womukuro gwaJorodana.
2 Baraka munaSiporo kwa mwene nayinye eyi va rugene Vaisraeli koVaamoli.
3 Vamowaba kwa tjilire unene Vaisraeli ntani kwa va nyengere morwa vanzi va kere.
4 Makura Vamowaba tava tantere masimbi goVamidiyani asi: “Mbunga ezi ngazi zonagura po sirongo setu ngwendi moomu azi li ntwedu wayi naunye.”
Posiruwo oso, Baraka munaSiporo yige ga kere hompa goVamowaba.
5 Age kwa tumine vantu kwaBaramu munaBeyoro, ogu ga tungire nekoro lyendi moPetoro pepi noMukuro gwaEufurata. Baraka kwa tanterere Baramu asi: “Koveli vantu ava va tunda moEgipite, awo kwa lihanena uzuni* mudima ntani awo vana tungu pepi nosirongo setu.
6 Na kanderere wiza o ya fingire nge vantu ava, yeeyi awo nonkondo kupitakana nge. Nampo nani va funda ni va tjide mo mosirongo, yeeyi ame nayi diva asi nkenye ogu o tungike kumuhorokera yininke yoyiwa, ano nkenye ogu o fingi kumuhorokera yininke yoyidona.”
7 Makura masimbi goVamowaba nomasimbi goVamidiyani tava zi noyimaliwa eyi nava ka futa Baramu, yipo a ka rugane umpure ntani awo kwa ka mu tanterere mbudi zaBaraka.
8 Makura Baramu ta va tantere asi: “Rareni kooku masiku ganaina, ame ngani mu tantera eyi nga tantera nge Jehova.” Makura masimbi goVamowaba taga kara naBaramu.
9 Makura Karunga ta wiza kwaBaramu, ta mu pura asi: “Wolye ava vagara vana kara nove?”
10 Baramu ta limburura Karunga gousili asi: “Baraka munaSiporo, hompa gwaMowaba kuna tumine nge mbudi ezi asi:
11 ‘Vantu ava va tunda moEgipite vana lihanene uzuni* mudima. Wiza o ya va fingire nge. Nampo ngani va rwisa makura ngani va tjide mo.’”
12 Nye Karunga ta tantere Baramu asi: “Wa ha za nawo ntani wa ha finga vantu owo, yeeyi awo kwa va tungika.”
13 Ngurangura, Baramu ta pinduka ta tantere masimbi aga ga tumine Baraka asi: “Tengureni kosirongo seni, morwa Jehova ana silike nge kuza kumwe none.”
14 Makura masimbi goVamowaba taga katuka ga tengure kwaBaraka, taga ka mu tantera asi: “Baramu ana nyoka kuwiza kumwe nose.”
15 Nye Baraka ta ka tuma hena masimbi gamwe gomulyo unene ntani gomanzi kupitakana aga ga hovere kutuma.
16 Awo kwa wizire kwaBaramu, tava ya mu tantere asi: “Baraka munaSiporo kuna tanta asi: ‘Na kanderere wa ha pulisira nkenye eyi yi ku kondere mokuwiza kwange,
17 yeeyi ame ngani ya kufuta ntani ngani rugana nkenye eyi ngo tantera nge. Yipo nye, na kanderere wiza o ya fingire nge vantu ava.’”
18 Nye Baramu ta limburura vakareli vaBaraka asi: “Nampili ngano Baraka a pe nge embo lyendi eli lina zura sisiliveli nongorodo, ame kapi tani vhuru kurugana yininke eyi ga nyokesa nge Karunga gwange Jehova, yi kare asi yoyinunu ndi yoyinene.
19 Nye none rareni kooku masiku ganaina, yipo ni ndindire eyi na tantera nge Jehova.”
20 Makura Karunga ta wizire Baramu masiku ta mu tantere asi: “Nsene vagara ava kuna wiza va ya ku simbe, zende kumwe nawo, nye wa hepa ku ka uyunga tupu eyi nani ka ku tantera.”
21 Makura Baramu ta pinduka ngurangura ta tura nomurongero dendi posindongi,* ta zi kumwe nomasimbi goVamowaba.
22 Nye Karunga ta mu handukire kweyi ga katukire a ze, makura muengeli gwaJehova ta sikama monzira yipo a mu kondere. Baramu kwa zire nosindongi sendi ntani novakareli vendi vavali.
23 Apa sa mwene sindongi muengeli gwaJehova ana sikama monzira norufuro mokuwoko kwendi, ta si hetekere ko kuzapuka monzira si ze mepya. Nye Baramu ta si toona si tengwire monzira.
24 Makura muengeli gwaJehova ta sikama monzira zonunu ezi za kere pokatji koyikunino yivali yomandjembere eyi ya kere nekuma.
25 Apa sa mwene sindongi muengeli gwaJehova, ta si likura kekuma, makura ta si senenekeda mpadi zaBaramu kekuma. Ano Baramu ta tameke hena kusitoona.
26 Muengeli gwaJehova ta piti hena komeho, ta ka sikama pevango apa sa dilire kuvhura kupirukira sindongi korulyo ndi korumoho.
27 Sindongi apa sa mwene muengeli gwaJehova, ta si bwakama, makura Baramu ta handuka unene, ta twikire kutoona sindongi nompango zendi.
28 Makura Jehova ta ninki sindongi si uyunge,* ta si pura Baramu asi: “Yisinke nina kurugana eyi ono toonene nge yikando yitatu?”
29 Baramu ta limburura sindongi asi: “Yeeyi ove kuna ninkisa nge ni moneke ngwendi egova. Ngano kani kara norufuro mokuwoko kwange, ngano nina kudipaga!”
30 Makura sindongi ta si pura Baramu asi: “Nani ame kapisi sindongi soge esi wa ronda eparu lyoge nalinye dogoro ngesi ndi? Na kutekura rumwe monkedi ezi ndi?” Age ta limburura asi: “Hawe!”
31 Makura Jehova ta mahura meho gaBaramu, ta mono muengeli gwaJehova ana sikama monzira norufuro mokuwoko kwendi, makura age tatu nongoro a linyongamene.
32 Muengeli gwaJehova ta mu pura asi: “Morwasinke ono toonene sindongi soge yikando yitatu? Nyame nina kukondere morwa eyi ono kurugana kuna kulilimba nompango zange.
33 Nye sindongi sina mono nge yiyo sina hetekere ko kupiruka yikando yitatu. Ngano kapi sina piruka, ngano nare nina kudipaga ni sige sindongi si paruke.”
34 Makura Baramu ta tantere muengeli gwaJehova asi: “Ame nina zono morwa kapi nina yi diva asi nyove ono sikama monzira, o kondere nge. Nsene kapi ono harere nge ni ze, ame tani tengura.”
35 Nye muengeli gwaJehova ta tantere Baramu asi: “Zende kumwe nomasimbi, nye wa hepa ku ka uyunga tupu yeeyi nani ka ku tantera.” Makura Baramu ta zi kumwe nomasimbi aga ga tumine Baraka.
36 Baraka apa ga zuvhire asi Baramu ana wiza, ta zi usimbu a ka mu gwane mositata soVamowaba, esi sa karera konontere domuramba gwaArunoni komururani gosirongo soVamowaba.
37 Baraka ta pura Baramu asi: “Nani kapi na kuzigida? Morwasinke wa dililire kuwiza? Ngoso ove kwa kugazara asi kapi tani vhuru kukufuta ndi?”
38 Baramu ta limburura Baraka asi: “Nyame ogu nina wiza koge. Nye no pulisira nge kuuyunga yuma ndi? Ame nani uyunga tupu eyi na tantera nge Karunga.”
39 Makura Baramu ta zi kumwe naBaraka tava ka sika poKiliyata-husoti.
40 Baraka ta zamba nongombe nononzwi, makura ta tumu dimwe kwaBaramu ntani komasimbi aga ga kere kumwe nendi.
41 Ngurangura, Baraka ta gusa Baramu, ta mu twara koBamoti-bara; kevango eli ga vhulire kumona vantu navenye.
Nonkango dokonhi
^ Ndi “mosirongo.”
^ Ndi “mosirongo.”
^ MoRuhebeli asi “sindongi sosikadi.”
^ MoRuhebeli asi “ta paturura kana kosindongi sosikadi.”
