Numeri 23:1-30
23 Makura Baramu ta tantere Baraka asi: “Tunga yizambero ntambali pevega eli, ntani wapaikira nge nontwedu ntambali nononzwi donongara ntambali.”
2 Baraka ta rugana poopo eyi ga mu tanterere Baramu. Ano Baraka naBaramu tava zamba ntwedu nonzwi zongara pwankenye sizambero.
3 Makura Baramu ta tantere Baraka asi: “Kara paapa ponzambo zoge zeswakerero, ame tani zi. Nampo Jehova na ka monekera nge. Ano nkenye eyi na ka tantera nge, nove nani ya yi ku tantera.” Makura age ta zi kondundu.
4 Makura Karunga ta monekere Baramu, ano Baramu ta mu tantere asi: “Ame kuna dike yizambero ntambali momukweyo ntani pwankenye sizambero ame kuna zambere po ntwedu nonzwi zongara.”
5 Jehova kwa tanterere Baramu eyi na ka uyunga. Age kwa mu tanterere asi: “Tengura kwaBaraka o ka uyunge eyi nina ku tantere.”
6 Makura ta tengura ta ka gwana Baraka nomasimbi nagenye gomoMowaba gana sikama pepi nonzambo zendi zeswakerero.
7 Makura ta uyunga mutango ogu asi:
“Baraka hompa gwaMowaba kwa ka simba nge koAramu,konondundu dokoUpumezuva. Age kwa tente asi:
‘Wiza o ya fingire nge ruvharo rwaJakopo.
O ya futise Vaisraeli.’
8 Ngapi omu nani finga vantu ava ga dira kufinga Karunga?
Ntani ngapi omu nani futisa vantu ava ga dira kufutisa Jehova?
9 Ame kuna kuvamona ame kuna sikama keguru lyomamanya,ntani kuna kuvamona ame kuna sikama konondundu.
Awo kwa tunga ko velike;awo kwa ligusa ko konomuhoko dapeke.
10 Yilye gokuvhura kuvarura ruvharo rwaJakopo oru rwa fana ngwendi mbundu?
Ndi yilye gokuvhura kuvarura ruha rumwe* rombunga zoVaisraeli?
Ninka nge* ni fe ngwendi moomu ava fu vahungami,ntani ninka ukaro wange wokuhulilira u kare ngwendi wawo.”
11 Baraka ta tantere Baramu asi: “Yisinke ono ruganene nge yininke yokufana ngesi? Ame kwa ka kusimba o ya fingire nge nonkore dange, nye ove yiyo ono va tungike.”
12 Nye Baramu ta tanta asi: “Ame kuuyunga tupu eyi ana tantere nge Jehova.”
13 Baraka ta mu tantere asi: “Tu ze kumwe kevango lyapeke oku no ka vhura kukavamona, nye vamwe kapi no ka va mona. Oko yiko no ka va fingilira nge.”
14 Makura ta mu twara mepya lyaSofimu eli lya kara kondundu zaPisiga, makura ta ka tunga yizambero ntambali ntani pwankenye sizambero ta zambere po ntwedu nonzwi zongara.
15 Baramu ta tantere Baraka asi: “Kara paapa ponzambo zoge zeswakerero siruwo esi nina kuza ni ka uyunge naKarunga.”
16 Makura Jehova ta monekere Baramu, ta mu tantere eyi na ka uyunga. Age kwa mu tanterere asi: “Tengura kwaBaraka o ka uyunge eyi nina ku tantere.”
17 Baramu ta tengura kwaBaraka, ta ka mu gwana age kuna kundindira ponzambo zendi zeswakerero kumwe nomasimbi goVamowaba. Baraka ta mu pura asi: “Yisinke ana kutantere Jehova?”
18 Makura Baramu ta uyunga mutango ogu asi:
“Baraka, katuka o purakene.
Purakena nge, ove munaSiporo.
19 Karunga kapi ga kara ngwendi muntu ogu a tanta yimpempa,ndi a kare ngwendi muntu ogu a rundurura magano gendi.*
Apa a uyunga yuma, age kuyirugana,apa a tumbwidire yuma, age kuyisikisa mo.
20 Ame kwa ka simba nge ni ya tungike vantu ava;ano ngesi Karunga ana va tungike ntani ame kapi tani yi rundurura.
21 Age kapi a tarerere nkenye umpure va u ruganese koruvharo rwaJakopo,age kapi a pulisire nkenye udigu u gwane Vaisraeli.
Karunga gwawo Jehova nawo ga kara,ntani awo kumuhamberera ngahompa mokatji kawo.
22 Karunga kuna kuvagusa moEgipite.
Age kwa fana ngwendi nombinga dontwedu zonene edi adi va vatere.
23 Kwato gokuvhura kupumba yininke yoyidona kuhamena ruvharo rwaJakopo,ntani kwato mpure gokuvhura kurwanesa Vaisraeli.
Ngesi vantu kuvhura va uyunge kuhamena ruvharo rwaJakopo ndi Vaisraeli asi:
‘Tareni eyi ga rugana Karunga!’
24 Vantu ava ngava katuka ngwendi nyime,ngwendi moomu nyime a katuka pwamwene.
Ngwendi moomu tupu nyime a dili kurara dogoro a lipapagwire sikorama esi ana kwata
ntani dogoro a rase honde zosikorama esi ana dipaga.”
25 Baraka ta tantere Baramu asi: “Nsene kapi ono kuvafinga, kapisi o va tungike hena.”
26 Baramu ta limburura Baraka asi: “Nani kapi nina ku tantere asi ‘tani rugana nayinye eyi ana tantere nge Jehova’?”
27 Baraka ta tantere Baramu asi: “Wiza ni ya kutware kevango lyapeke. Nampo Karunga gousili na ka kupulisira o ka finge vantu ava kevango olyo.”
28 Makura Baraka ta twara Baramu kondundu zaPeoro. Peoro kwa livyuka naJesimoni.*
29 Makura Baramu ta tantere Baraka asi: “Tunga yizambero ntambali pevega eli, ntani wapaikira nge nontwedu ntambali nononzwi donongara ntambali.”
30 Makura Baraka ta rugana ngwendi moomu ga mu tanterere Baramu, ano pwankenye sizambero ta zambere po ntwedu nonzwi zongara.
Nonkango dokonhi
^ MoRuhebeli asi “siune.”
^ Ndi “mwenyo gwange.”
^ Ndi “a livere.”
^ Ndi nampo asi “nomburundu.”
