Numeri 24:1-25
24 Baramu apa ga mwene asi yina hafesa Jehova yokutungika Vaisraeli, age kapi ga zire hena a ka divilise nsene Vaisraeli nayi va horokera yininke yoyidona,* nye age kwa tere komburundu.
2 Apa ga kankukire Baramu a mone Vaisraeli vana dike notende dawo kuliza nomarudi gawo, makura mpepo zaKarunga ta zi mu wizire.
3 Age ta uyunga mutango ogu asi:
“Edi yido nonkango daBaramu munaBeyoro,nonkango domugara ogu va mahura meho,
4 nonkango dogu ana kuzuvha nonkango daKarunga,ogu ga mona emoneko lyoMunankondo nadinye,ogu va mahwire meho age ana linyongamene:
5 Notende deni nongwa unene one woruvharo rwaJakopo,notende deni nongwa unene one Vaisraeli!
6 Ado kwa fana ngwendi muramba gomure,ngwendi yikunino eyi ya kara konontere domukuro,ngwendi yimeno* eyi ga tapeka Jehova,ngwendi yitji yosedeli eyi ya kara konontere domema.
7 Mema kutwikira kutunda moyipako yawo yivali yoyipapa,ntani mbuto* zawo kwa zi kuna konontere domema.
Hompa gwawo nga kara nonkondo unene kupitakana Agaga,ano uhompa wendi ngau kara nononkondo unene.
8 Karunga kuna kuvagusa moEgipite;age kwa fana ngwendi nombinga dontwedu zonene edi adi va vatere.
Age nga zonagura po nomuhoko ndi nonkore dendi,ano yisupa yawo ngayi tezagura ntani ngava zonagura po noyikutji.
9 Age kuna rara ngwendi nyime,ntani ngwendi nyime, yilye gokuvhura kumuhadagura?
Ava vana kukutungika, va va tungika,ano ava vana kukufinga, va va finga.”
10 Baraka ta handukire Baramu. Makura Baraka ta sakerere nehandu nokutantera Baramu asi: “Ame kuna kuzigida o ya finge nonkore dange, nye ove yiyo ono va tungike yikando yitatu.
11 Zende kembo, ame kwa here ni ku fute, nye Jehova ana ku ninkisa o dire kugwana mfuto zoge.”
12 Baramu ta limburura Baraka asi: “Nani kapi na tanterere vantu ava wa tumine asi:
13 ‘Nampili nga pe nge Baraka embo lyendi eli lina zura sisiliveli nongorodo, ame kapi ngani rugana yininke eyi ga nyokesa nge Jehova, yi kare asi yoyiwa ndi yoyidona. Ame ngani uyunga tupu eyi nga tantera nge Jehova.’
14 Ngesi ame tani tengura kekoro lyange. Wiza ni ya ku tantere eyi ngava rugana vantu ava, vantu woge komeho.”*
15 Age ta uyunga mutango ogu asi:
“Edi yido nonkango daBaramu munaBeyoro,nonkango domugara ogu va mahura meho,
16 nonkango dogu ana kuzuvha nonkango daKarunga,nogu ga kara nounongo waKarunga gekeguru-guru,ogu ga mona emoneko lyoMunankondo nadinye
ogu va mahwire meho age ana linyongamene:
17 Ame ngani mu mona, nye kapisi ngesi;ame ngani mu tara, nye simpe ure ana kara.
Mbungururu ngazi tunda moruvharo rwaJakopo,ntani mpango zosiuhompa ngazi tunda moVaisraeli.
Age nga taura nomutwe doVamowaba
nokubamuna yikora yovakwayita navenye wonyanya.
18 Awo ngava pinga Edomu,ntani nonkore daSeire ngadi pinga sirongo sawo,siruwo oso Vaisraeli awo ngava likida uradi.
19 Ano gomoruvharo rwaJakopo yige nga funda nonkore,ta dipaga nkenye ogu nga paruka mositata.”
20 Apa ga mwene Amareki, ta twikire nomutango gwendi asi:
“Amareki kwa kere muhoko gokuhova,nye komeho ngava mu zonagura.”
21 Apa ga mwene Vakeni, ta twikire nomutango gwendi asi:
“Mavango goge aga wa tunga kapi aga zonauka usimbu ngwendi sikorogo esi va tungira pemanya.
22 Nye kweli ogu nga hwika Vakeni.*
Siruwo sokuhura kupi sina hupu ko komeho Asiliya a mu tware mounkwate?”
23 Age ta twikire kuuyunga mutango gwendi asi:
“Nanewo! Yilye nga paruka apa nga rugana Karunga yininke eyi?
24 Yikepa ngayi tunda konontere defuta lyaKitimu,ntani awo ngava rwisa Asiliya,ntani awo ngava rwisa Ebere.
Nye nage ngava mu zonagura po.”
25 Makura Baramu ta katuka, ta zi nonzira zendi, ano Baraka nage ta zi nonzira zendi.
Nonkango dokonhi
^ MoRuhebeli asi “a ka papare youmpure.”
^ MoRuingilisa asi “aloe,” kwa tamba koyimeno yedumba lyewa eyi ngava ruganesa koyikwaedumba posiruwo sanare.
^ Ndi “ruvharo.”
^ Ndi “momazuva gopouhura.”
^ MoRuhebeli asi “Kayini.”
