Numeri 9:1-23
9 Jehova kwa uyungisire Mosesa momburundu zaSinayi mokwedi kokuhova momvhura zauvali kutunda apa va tundire mosirongo saEgipite. Age kwa tente asi:
2 “Vaisraeli va hepa kuwapaika nzambo zoPaska apa ngasi sika mo siruwo.
3 Mwa hepa kuziwapaika apa ngasi sika mo siruwo mezuva 14 lyokwedi oku kongurova. Ngomu zi wapaike kuliza nomavyukiso aga va tura po.”
4 Makura Mosesa ta tantere Vaisraeli va wapaike nzambo zoPaska.
5 Awo makura tava wapaike nzambo zoPaska mokwedi kokuhova mezuva 14 momburundu zaSinayi kongurova. Vaisraeli kwa rugene nayinye kuliza nomu Jehova ga pangerere Mosesa.
6 Pwa kere vagara vamwe ava va nyete morwa kwa kwete simpu, yipo nye awo kapi va vhulire kuwapaika nzambo zoPaska. Makura vagara owo yipo va zire komeho zaMosesa naArona mezuva olyo,
7 ta va tantere Mosesa asi: “Ose tuna nyata morwa tuna kwata simpu. Morwasinke natu dilira kugava nzambo kwaJehova ngwendi Vaisraeli navenye posiruwo sazo?”
8 Makura Mosesa ta va tantere asi: “Ndindireni paapa ni ka purakene eyi na ka tantera nge Jehova kumuhamena.”
9 Makura Jehova ta tantere Mosesa asi:
10 “Tantera Vaisraeli asi: ‘Nkenye mugara ogu ana kara mokatji keni ndi gomoruvharo rweni rokomeho nga nyata pokukwata simpu, ndi ogu nga kara morugendo, ga hepa simpe kuwapaika nzambo zaJehova zoPaska.
11 Awo va hepa kuziwapaika mokwedi kwauvali momazuva 14 kongurova. Awo ngava zi lye kumwe nomboroto zokudira yihaheso noyikwahidi youruru.
12 Kapisi ngava sigise po nkenye eyi dogoro ngurangura ntani kapisi ngava teze yisupa yonzwi. Awo va hepa kuziwapaika kuliza nomavyukiso gokuhamena Paska.
13 Nye nsene mugara kapi ana nyata ntani kapi ana kara morugendo, nye a dire kuwapaika nzambo zoPaska, muntu ogo va hepa kumugusa mo* mokatji kovantu vendi, yeeyi age kapi ana gava nzambo zaJehova posiruwo sazo. Mugara ogo va hepa kumutengeka morwa nzo zendi.
14 “‘Ano nsene kweli munayirongo ogu ga tunga mokatji keni, nage ga hepa kuwapaika nzambo zaJehova zoPaska ntani nage ga hepa kukwama mavyukiso aga va tura po goPaska. Namuvenye mwa hepa kukwama mavyukiso gokulifana, a kare asi munayirongo ndi Muisraeli.’”
15 Mezuva eli va dikire nkongoronzugo, eremo kwa kudumikire nkongoronzugo ndi tende zomadiworokeso, nye kongurova keguru lyonkongoronzugo kwa kere ko mundiro dogoro ngurangura.
16 Eyi yiyo ngayi horoka nkenye apa: Eremo ngali kara ko mutenya, ano masiku ngaku kara mundiro.
17 Apa ngali tundu ko eremo kotende, Vaisraeli ngava katuka usimbu va ze, nye apa ngali sikama eremo, awo ngava dikire kamba zawo poopo.
18 Kuliza neyi ga va tanterere Jehova, Vaisraeli ngava katuka va ze ntani kuliza neyi ga va tanterere Jehova, Vaisraeli ngava dike notende dawo. Apa ngali kara eremo konkongoronzugo, awo kapi ngava diruka.
19 Apa ngali kara eremo mazuva gomanzi keguru lyonkongoronzugo, Vaisraeli ngava limburukwa Jehova pokudira kukatuka va ze.
20 Poyiruwo yimwe eremo ngali kara keguru lyonkongoronzugo mazuva gomasesu. Kuliza neyi ga va tanterere Jehova, Vaisraeli kapi ngava diruka ntani kuliza neyi ga va tanterere Jehova, Vaisraeli ngava katuka va ze.
21 Poyiruwo yimwe, eremo ngali kara ko tupu kutunda ngurova dogoro ngurangura. Ano apa ngali katuka eremo ngurangura, nawo ngava katuka va ze. Awo ngava katuka va ze yi kare asi eremo kwa katukire mutenya ndi masiku.
22 Yi kare asi eremo ngali kara keguru lyonkongoronzugo mazuva gavali ndi kwedi ndi siruwo sosire, Vaisraeli kapi ngava katuka nye apa ngali katuka, nawo ngava katuka.
23 Kuliza neyi ga va tanterere Jehova, Vaisraeli ngava dike notende dawo ntani kuliza neyi ga va tanterere Jehova, Vaisraeli ngava katuka va ze. Awo kwa limburukwire Jehova kuliza neyi ga tanterere Jehova Mosesa.
Nonkango dokonhi
^ Ndi “va hepa kumudipaga.”
