Buke zaRukasa 12:1-59
-
Yihaheso yoVafalisayi (1-3)
-
Tjireni Karunga, kapisi vantu (4-7)
-
Ogu a dili kupatana Kristusa (8-12)
-
Sifanekeso somugara gongawo gomugova (13-21)
-
Hagekeni kukara nosinka (22-34)
-
Siundagona (32)
-
-
Kuvangarara (35-40)
-
Mukareli gokulimburukwa nogu gokudira kulimburukwa (41-48)
-
Jesus kwa reta maligaunuko (49-53)
-
Mulyo gokudiva yiruwo (54-56)
-
Kukohonona po maudigu (57-59)
12 Posiruwo oso, apa za pongere mbunga zonene, azo kuna kulipaterekeda noku lilyatanga, age ta howo kutantera varongwa vendi asi: “Takameseni koyihaheso yoVafalisayi ndi asi uyilipaki wawo.
2 Nye kwato esi va horeka ngava dira kuhorora ntani kwato esi sa horama, ngasi dira kudivikwa.
3 Yipo nye, nkenye eyi omu uyunga momundema, ngayi wiza poruzera ntani nkenye eyi omu wowota monzugo, ngava yi divisa moyitarameho yovantu navenye.
4 Tani mu tantere hena vakwetu asi walye omu tjira ava ava dipaga tupu rutu, nye va hana kuvhura kurugana ko yapeke.
5 Nye ame tani mu tantere ogu nomu tjira: Tjireni ogu ga kara nononkondo dokumuzugumina moGehena* konyima zokumudipaga. Tani mu tantere asi ogu yige nomu tjira.
6 Manzunge gatano nani kapisi kugarandesa nosenda mbali* tupu? Nye kwato eli a divara ko* Karunga.
7 Nye nampili nonohuki dokonomutwe deni deedi, da pwa kuvarura. Mwa ha tjira, yeeyi one mulyo unene kupitakana manzunge gomanzi.”
8 “Tani mu tantere asi nkenye ogu a divisa nge komeho zovantu, MunwaMuntu nage nga ka mu divisa komeho zovaengeli vaKarunga.
9 Nye nkenye ogu a patana nge komeho zovantu, nage ngava ka mu patana komeho zovaengeli vaKarunga.
10 Ntani nkenye ogu a swaura MunwaMuntu, ngava mu gusira po nye ogu a swaura mpepo zokupongoka, kapi ngava mu gusira po.
11 Apa ngava mu kwata, va ka mu pangure,* kapisi ngomu kare nosinka asi ngapi ndi yisinke ngomu ka uyunga mokulipopera,
12 yeeyi mpepo zokupongoka ngazi mu ronga posiruwo sooso eyi ngomu uyunga.”
13 Makura gumwe mombunga ta mu tantere asi: “Murongi, tantera mukurwange a pe nge ko name upingwa.”
14 Age ta mu limburura asi: “Yilye ogu ga tura nge ni kare mupanguli gweni?”
15 Makura ta va tantere asi: “Omu takamese kwankenye madowo, morwa muntu nampili a kare noyininke yoyinzi, kapi ngayi vhura kumuparura.”
16 Kutunda opo, ta va tantere sifanekeso esi asi: “Epya lyomugara gongawo kwa yimine nawa.
17 Makura ta lipura mwene asi: ‘Yisinke nani rugana ngesi mokumona asi kwato oku nina kupungwira nombuto dange?’
18 Makura ta tanta asi: ‘Eyi yiyo nani rugana: Tani zungurura yihete yange ni tungire po yoyinene, omo yimo ngani pungwira nombuto dange nadinye noyininke yange nayinye,
19 makura ta uyunga asi: “Nina kara noyininke yoyinzi eyi ngayi kara po nomvhura dononzi, tani li nokunwa ni hafere eparu.”’
20 Nye Karunga ta mu tantere asi: ‘Egova ove, masiku ganaina to fu. Yilye nye ogu nga gusa yininke eyi wa pungura?’
21 Yimo nye ngayi horokera muntu ogu a lipungwire emona, nye ga hana kungawopa kosipara saKarunga.”
22 Makura ta tantere varongwa vendi asi: “Eyi yiyo nina kumutanterera asi hagekeni kukara nosinka kuhamena eparu* lyeni asi yisinke nomu lya ndi marutu geni asi yisinke nomu dwara.
23 Yeeyi eparu* mulyo kupitakana nondya ano rutu mulyo kupitakana yikoverero.
24 Gazareni kuhamena makorova: Ago kapi aga kunu ndi ga zangure, kapi ga kara noyihete ndi nonzugo dokupungwira nye Karunga kugarera. One nani kapisi mulyo kupitakana yidira?
25 Yilye ogu a vhuru kugwederera ko keparu lyendi nampili nakauke morwasinka sendi?
26 Yipo nye, nsene kapi o vhuru kurugana yininke yoyinunu ngwendi yooyo, morwasinke nye no lipakererera sinka yininke yokuhupa ko?
27 Gazareni omu adi kuru nombya: Kapi adi rugana ko yuma yipo di moneke nawa, nye tani mu tantere asi nampili Saromo ogu ga kere ngawo zonene, age kapi nga dwara a pitakane po nampili mbya zimwe.
28 Nsene asi Karunga yimo a dwareke ngesi yimeno eyi ayi kara po naina ano mungura tava yi zugumine momundiro, ngapi nye omu na dira kumudwareka mu pitakane yimeno, one vepurogona!
29 Hagekeni kukara nosinka seyi nomu lya neyi nomu nwa,
30 yeeyi vantu wokonomuhoko yiwo ava lipakere sinka yininke eyi nye Guhyeni ga diva asi yininke eyi mwa yi hepa.
31 Nye one, papareni Uhompa wendi, ano yininke eyi yokuhupa ko ngava yi mu pa.
32 “Wa ha tjira, ove siundagona, yeeyi Guhyeni nga mu pa Uhompa.
33 Randeseni yiweka yeni makura mu gave yigava yonkenda.* Omu liruganene nondjato doyimaliwa edi adi dili kukurupa ndi emona lyemeguru omu muwidi na dira kulivaka ndi yimbumburu yi li zonagure.
34 Yeeyi oku kwa kara emona lyoge, mutjima goge nago yiko gwa kara.
35 “Limangeni maliva mu liwapaikire ntani hwamekeni noramba deni,
36 kareni ngwendi vakareli ava vana kundindira hekurwawo ogu ana kutunda kosipito sekwareko, yipo va ya mu zegurure apa na ya sika nokungongora kevero.
37 Vakareli owo erago nsene hekurwawo a ya va gwana awo vana vangarara. Tani mu tantere asi age ta liwapaikire noku va tantera va hingire kositafura noku va pa nondya.
38 Nsene a wiza pokatji komasiku* ndi masasiku,* nye a ya va gwane awo vana liwapaikire, awo erago.
39 Nye diveni eyi asi mwenya embo nsene a diva siruwo esi na wiza muwidi, kapi na pulisira embo lyendi va li teze.
40 None vangarareni, yeeyi MunwaMuntu nga wiza posiruwo* esi ngomu dira kundindira.”
41 Makura Peturusa ta mu tantere asi: “Hompa, nyoselike tupu ono kutantera sifanekeso esi ndi navenye?”
42 Hompa ta tanta asi: “Yilye nawa-nawa mukareli* gokulimburukwa gonondunge ogu hekurwendi ga tulire a takamese vantu vendi* ava paape nondya dokugwanena po posiruwo souhunga?
43 Mukareli gwangesi erago nsene a ya mu gwana hekurwendi age ta yi sikisa mo!
44 Tani mu tantere asi age nga ya mu pa nonkondo dokutakamesa yininke yendi nayinye.
45 Nye nsene mukareli ogo a tameka kugazara asi: ‘Hekurwange kuna kuliranga kuwiza,’ a tameke kutoona vakareli wovagara nava wovakadi ntani nokulya oku ta nu a korwe,
46 hekurwendi nga wiza mezuva eli nga dira kundindira ntani movili ezi nga dira kudiva, makura ngava ya mu tengeke momunene nokumutura kumwe nava wokudira kulimburukwa.
47 Makura mukareli ogu ga divire eyi ga mu harerere hekurwendi nye kapi ga liwapaikire ndi a yi rugane, ngava mu sopora unene.
48 Nye ogu ga dilire kuyidiva, a rugane yokumuninkisa va mu sopore, kapi ngava mu sopora unene. Nkenye ogu ava pe yoyinzi, ngava ndindira ko yoyinzi kwendi, ano ogu ava pe yoyinzi unene, ngava ndindira ko yoyinzi unene kwendi.”
49 “Ame kwa wizira ni ya hwameke mundiro pevhu, yisinke hena nani rugana ko mokumona asi ago gwa hwama nare?
50 Ame tani ndindire ekuho eli ngava kuhwa nge, ame nina guwu dogoro nga yi sike mo.
51 One kugazara asi ame kwa wizira ni rete mbili pevhu? Hawe, ame kwa wizira ni rete maligaunuko.
52 Kutunda apa, membo omu mwa kara vantu vatano ngava ligaunuka, vatatu ngava vyuka vavali ano vavali ngava vyuka vatatu.
53 Awo ngava ligaunuka, guhya nga vyuka munendi gomugara, ano muna gomugara nga vyuka guhya, zinya nga vyuka munendi gomukadi ano muna gomukadi nga vyuka zinya, ngumweyi zomuntu nga vyuka ngumweyi zendi ano ngumweyi zendi nga vyuka ngumweyi zomuntu.”
54 Makura ta tantere mbunga asi: “Apa omu mono eremo kuna kutunda koUpumezuva, one kuuyunga asi: ‘Mvhura zonene kuna kuwiza,’ makura ta yi horoka.
55 Ntani apa omu mono mpepo zokoMbindakano, one kutanta asi: ‘Ta ku kara upyu,’ makura nayo ta yi kara po.
56 Vayilipaki one, one kwa diva kufaturura mukarompepo nye morwasinke mwa dilira kudiva eyi yina kuhoroka posiruwo esi?
57 Morwasinke omu dilire kukwata egano eyi mwa hepa kurugana?
58 Pasihonena, nsene gumwe ta kutwara kompanguro, monzira zeni zokuza, kohonona po udigu woge nage yipo a dire kukutwara komupanguli, mupanguli a ka kugave komuporosi gomompanguro ano muporosi gomompanguro a ka kuture modorongo.
59 Tani kutantere asi kapi ngo pwaga mo dogoro ngo mane kufuta senda zoge zokuhulilira.”*
Nonkango dokonhi
^ MoRugereka asi “noassarion mbali.” Nosenda domulyo gomusesu.
^ Ndi “a sigilire.”
^ Ndi “nokumutwara konosinagoge.”
^ Ndi “nomwenyo.”
^ Ndi “mwenyo.”
^ Kwa tamba koyiha yovili 9 masiku dogoro pokatji komasiku.
^ Kwa tamba pokatji komasiku dogoro koyiha yovili 3, ngurangura.
^ MoRugereka asi “movili ezi.”
^ Ndi “mugendesi gembo.”
^ Ndi “varugani vemembo.”
^ MoRugereka asi “lepton zokuhulilira.”
