Buke zaRukasa 13:1-35
-
Nsene mu dira kulitezurura, ngava mu zonagura po (1-5)
-
Sifanekeso sositji soukuzu sokudira kuyima (6-9)
-
Mukadi gosirema tava mu verura mEsabata (10-17)
-
Sifanekeso sohuma zomositareta noyihaheso (18-21)
-
Twa hepa kukondja mokuhwilira mevero lyenunu (22-30)
-
Herodesa, “mbanze ogo” (31-33)
-
Jesus ta lilire Jerusarema (34, 35)
13 Posiruwo oso, vamwe ava va kere po tava mu tantere asi Piratusa kwa dipagere Vagalireya ava va zembe nonzambo.
2 Age ta va pura asi: “Ngapi muna kugazara, Vagalireya vena kwava dipagere morwa awo kwa kere vananzo wovanene kupitakana Vagalireya wopeke ndi?
3 Hawe, tani mu tantere asi nsene kapi muna kulitezurura, none ngava mu zonagura po.
4 Ndi ngapi omu muna kugazara, ava 18 rwa gwililire ruhungu rwaSiroya, ru va dipage, awo ngoso nonzo dawo nonzi kupitakana vantu navenye ava va tunga moJerusarema ndi?
5 Hawe, tani mu tantere asi nsene kapi muna kulitezurura, none ngava mu zonagura po.”
6 Makura ta va tantere sifanekeso esi asi: “Mugara gumwe kwa tapekere sitji soukuzu mosikunino sendi soyindjembere, makura ta zi a ka tare nsene kuna yimi enyango, nye kwato eyi ga ka gwene ko.
7 Makura ta tantere murugani gwendi asi: ‘Ngesi mvhura zautatu nina kuyapapara enyango kositji esi soukuzu nye kwato eyi nina ya gwana ko. Si teta po! Morwasinke nasi hepekera evhu?’
8 Age ta limburura asi: ‘Hekurwange, si siga tupu tanko ure womvhura, yipo ngani sime konontere ni ture ko ruhoho.
9 Nsene ngasi yima enyango, hawe ngano nawa, nye nsene kapisi yimo, ntani nye ngo si teta.’”
10 Age kwa rongere mosinagoge zimwe mEsabata.
11 Amo kwa kere mo mukadi ogu za veresere mpepo zondona ure wonomvhura 18, age kapi nga vhuru kusikama kuvyukilira.
12 Jesus apa ga mu mwene, ta mu zigida noku mu tantera asi: “Mukadi, ono veruka kouvera woge.”
13 Makura ta mu kambeke mawoko gendi, poopo ngoso ta vyukilire kusikama makura ta hamberere Karunga.
14 Nye ogu nga pitisire mosinagoge, kapi ya mu hafesere kweyi Jesus ga verwire mEsabata, makura ta tantere mbunga asi: “Mazuva ntazimwe ga kara po, aga ga hepa kurugana muntu, omu wize momazuva ogo va ya mu verure, nye kapisi mEsabata.”
15 Nye Hompa ta mu limburura asi: “Vayilipaki one, opo muna kara, pweli ogu a dili kumangurura ntwedu ndi sindongi sendi mEsabata, a si tware si ka nwe ko mema ndi?
16 Makura mukadi ogu, munwaAbirahamu ogu ga manga Satana nomvhura 18, nokuvhura si kumuverura mEsabata ndi?”
17 Apa ga uyungire eyi, nonkore dendi tadi lifu nomuga, nye mbunga tazi hafere eyi ga uyungire.
18 Makura ta tanta asi: “Ngapi wa fana Uhompa waKarunga ntani kosinke nani u fanekesa?
19 Awo kwa lifana nohuma zomositareta* ezi ga kunine muntu mepya lyendi, makura tazi kuru, tazi kara sitji ano yidira ta yi tungire yikorogo yayo konomutayi daso.”
20 Ta tanta hena asi: “Kosinke nani u fanekesa Uhompa waKarunga?
21 Awo kwa lifana noyihaheso eyi ga gusire mukadi, ta yi rungu moyipako yitatu yoyinene yousura, makura ta yi hahesa usura naunye.”
22 Monzira zendi zokuza koJerusarema, Jesus kwa pitire moyitata nomonomukunda oku ta rongo vantu.
23 Mugara gumwe makura ta mu pura asi: “Hompa, wovasesu tupu ngava ka paruka ndi?” Age ta va tantere asi:
24 “Tani mu tantere asi kondjeni mu hwilire mevero lyenunu, morwa wovanzi ngava hetekera ko kuhwilira mo nye kapi ngava yi vhura.
25 Apa mwenya embo nga pinduka a pate kevero lyendi, one ngomu sikama ponze mu ngongore kevero oku tomu tanta asi: ‘Hompa, tu zegurura.’ Nye age nga mu limburura asi: ‘Kapi nina diva oku muna kutunda.’
26 Makura ngomu tanta asi: ‘Wa tu mwene apa ngatu li nokunwa ntani ngo rongo mononzira detu.’
27 Nye age nga mu limburura asi: ‘Kapi nina diva oku muna kutunda. Ligoreni nge mu ze kwi, vadinikarunga one!’
28 One ngomu lira oku tomu likwetja komazego apa ngomu mona Abirahamu naIsaka naJakopo ntani novaporofete navenye moUhompa waKarunga, nye one ngava mu zugumina ponze.
29 Ntani hena, vantu ngava tunda koUpumezuva nokoUtokero nokoMuzogo ntani nokoMbindakano va ya hingire kositafura moUhompa waKarunga.
30 Wokuhulilira ngava hova, ano wokuhova ngava hulilira.”
31 Poopo ngoso, Vafalisayi vamwe tava wiza noku ya mu tantera asi: “Tunda po apa o ze, morwa Herodesa* ana hara a ku dipage.”
32 Age ta va limburura asi: “Zendeni mu ka tantere mbanze ogo asi: ‘Ame kuna kutjida mo nompepo donondona nokuverura vantu naina nomungura, mezuva lyautatu ntani ngani mana.’
33 Nye ame tani twikire nosirugana sange naina nomungura nopinduko morwa muporofete nokuvhura si kumudipagera mevango lyapeke mwa hana asi moJerusarema.
34 Jerusarema, Jerusarema, mudipagi govaporofete nomudipagi nomamanya ava va mu tumina. Rungapi na here kupongaika vana woge moomu azi pongaike nhunhwa vana momavava gazo, nye ove kapi wa here!
35 Tareni, nzugo zeni ngava zi siga. Tani mu tantere asi kapi ngomu mona nge dogoro ngomu tante asi: ‘Va mu tungike ogu ana kuwizira medina lyaJehova!’”
