Buke zaRukasa 14:1-35
14 MEsabata limwe age kwa zire kembo lyomupitisili goVafalisayi a ka lye, ava va kere membo kwa mu nomenene.
2 Makura ta mono mugara ogu ga kere nouvera wokufura morutu.*
3 Jesus makura ta pura valirongi woVeta noVafalisayi asi: “Va yi pulisira kuverura mEsabata ndi hawe?”
4 Nye awo teete. Age ta gusa mugara ogo nokumuverura makura ta mu ninki a ze.
5 Ta va pura asi: “Opo muna kara, kweli ogu na sigilira munendi gomumati ndi ntwedu zendi metope nsene kuna gwire mo mezuva lyEsabata ndi?”
6 Awo kapi va vhulire kumulimburura.
7 Apa ga dimbwilire asi vagara ava va zigidire kuna kulihorwera yipundi yoyiwa po, ta va tantere sifanekeso esi asi:
8 “Nsene vana kuzigida kosipito sononkwara, wa ha ka hingira posipundi sosiwa. Nampo morwa pweli ogu vana zigida ga kupita mekuto.
9 Ano ogu ana kuzigida ta wiza a ya ku tantere asi: ‘Pa muntu ogu evega.’ Makura ove to tundu po nonomuga doge o ka hingire kevango lyokonyima.
10 Nye nsene vana kuzigida, zende o ka hingire kevango lyokonyima, yipo asi ogu ana kuzigida apa na wiza, a ya ku tantere asi: ‘Hewa, yohingire oku.’ Ntani nye ngo gwana mfumwa kovagenda ava vana kara posipito.
11 Yeeyi asi nkenye ogu a linenepeke ngava mu nunupika, ano ogu a linunupike ngava mu nenepeka.”
12 Ta tantere hena mugara ogu ga mu zigidire asi: “Nsene to zigida muntu komuzuhwa ndi komurarero, wa ha zigida tupu vakweni ndi vanekoro ndi vamusinda woge wonongawo. Neisi nove ngava kuzigida o gwanene po mfeto zoge.
13 Nye nsene to rugana sipito, zigida vahepwe noyirema novatwiku,
14 ove ngo hafa morwa kwato eyi ngava kutengwidira. Yeeyi ove ngo ka gwana mfeto zoge pevhumbuko lyovahungami.”
15 Mugenda gumwe apa ga yi zuvhire eyi, ta tantere Jesus asi: “Gerago googu a hingire nokulya* moUhompa waKarunga.”
16 Jesus ta mu tantere asi: “Mugara gumwe kwa wapaikire murarero, makura ta zigida vantu wovanzi.
17 Ta tumu mukareli gwendi a ka tantere ava ga zigidire asi: ‘Wizeni, yeeyi nayinye yina pu kuwapaika.’
18 Nye navenye tava tameke kuligusa-gusa mo. Gokuhova ta mu tantere asi: ‘Ame kuna randa epya ntani na hepa kuza ni ka li tare, kapi nani vhura kuwiza.’
19 Ogu gumwe ta mu tantere asi: ‘Ame kuna randa nohove murongo, tani zi ni ka di heteke, kapi nani vhura kuwiza.’
20 Ano gumwe ta tanta asi: ‘Ame ntani tupu kani kwere, kapi nani vhura kuwiza.’
21 Mukareli makura ta zi a ka yi tantere hekurwendi. Hekurwendi ta handuka nokutantera mukareli gwendi asi: ‘Zende usimbu mononzira domositata o ka zigide vahepwe noyirema novatwiku.’
22 Apa mukareli ga ka tengwire ta tanta asi: ‘Hekurwange, nina rugana eyi ono tantere nge, nye simpe monzugo kapi muna zura.’
23 Hekurwendi ta mu tantere hena asi: ‘Zende moyitaura nomononzira o ka va likwambere va ka wize, yipo nzugo zange zi ya zure.
24 Tani ku tantere asi pwava na zigidire, kwato ogu na ya makera ko konondya dange.’”
25 Mbunga zonene zovantu kwa gendere nage, makura ta setuka nokuvatantera asi:
26 “Nkenye ogu ana hara kukara murongwa gwange ga hepa kuhara nge unene kupitakana omu ga hara oguhwe nozina namukadendi novamumbya vendi novakuru vendi ndi eparu* lyendi.
27 Nkenye ogu a dili kulikambeka sitji* sendi a kwame nge, kapi ta vhuru kukara murongwa gwange.
28 Opo muna kara, yilye a dili kuhova tanko kuhingira nsene ana hara kutunga etungo* a varure yipo a tare nsene yina mu gwanene po eyi ga hepa mokumana kutunga?
29 Yeeyi nsene a dira kuyirugana, ngano etateko lyelike tupu nga mana kutunga, ano navenye ava ngava yi mona ngava mu zora
30 asi: ‘Mugara ogu kwa tameka kutunga nye ya mu vhura kumana.’
31 Ndi hompa musinke a dili tanko kuhingira a zogere novakwawo nsene asi kuvhura yi mu tompoke kuza novakwayita vendi 10 000 a ka rwise hompa mukwawo ogu ana kara novakwayita 20 000?
32 Ano nsene a dimburura asi kapi tayi ka mu tompoka, ta tumu ko vantu vendi va ka tulise po mbili, age mukwawo simpe ure ana kara.
33 Mokulifana, nkenye ogu a dili kusiga yiweka yendi nayinye kapi ta vhuru kukara murongwa gwange.”
34 “Mungwa muwa. Nye nsene gu hakumpara, yisinke nava gu tovesesa?
35 Ago nokuvhura si hena kuguruganesa kevhu ndi koruhoho. Va hepa kuguzuguma. Ogu ga kara nomatwi gokuzuvha, a zuvhe.”
Nonkango dokonhi
^ Uvera ou kuninkisa rutu romuntu ru fure morwa morutu kuyakara mo mema gomanzi.
^ MoRugereka asi “kulya mboroto.”
^ Ndi “mwenyo.”
^ Ndi “ruhungu.”
