Buke zaRukasa 15:1-32
15 Vafutisi navenye womutero novananzo kwa ya pongere va mu purakene.
2 Vafalisayi novalirongi womatjangwa kwa sivanene asi: “Mugara ogu kutambura vananzo nokulya nawo.”
3 Makura ta va tantere sifanekeso esi asi:
4 “Opo muna kara, muntu musinke ogu ga kara nononzwi 100, makura pa zumbane zimwe, na dira kusiga edi 99 momburundu a ka papare zokuzumbana?
5 Apa na ka zi gwana, ta hafa makura ta zi likambeke pomapepe.
6 Apa na ya sika kembo, ta zigida vakwawo novamusinda, ta va tantere asi: ‘Wizeni mu ya hafese nge ko, morwa nina gwana nzwi zange ezi za zumbanene.’
7 Tani mu tantere asi mokulifana, meguru ngamu kara ruhafo nsene munzoni gumwe a litezurura kupitakana vantu 99 wovahungami ava va dira kuhepa elitezururo.”
8 “Ndi mukadi musinke ga kara noyimaliwa yosisiliveli* murongo, makura pa zumbane simwe, na dira kutemesa ramba, a kombe membo lyendi a si papare dogoro a si gwane?
9 Ano apa na si gwana ta zigida vakwawo* novamusinda, ta va tantere asi: ‘Hafeseni nge ko, yeeyi nina gwana simaliwa sange esi na zumbanesere.’
10 Tani mu tantere asi vaengeli vaKarunga nawo yimo ngorooro ngava hafera munanzo gumwe ogu ana litezurura.”
11 Makura ta tanta asi: “Mugara gumwe kwa kere novana vavali wovamati.
12 Gomunona po ta tantere oguhwe asi: ‘Tate, peni nge upingwa ou wa tumbukira nge.’ Guhya makura ta u va gawinine.
13 Konyima zomazuva gongandi, gomunona po ta pongaike yininke yendi nayinye nokuza kosirongo sokoure, oko yiko nye ga ka hepekerere upingwa wendi pokuparuka eparu lyedona.
14 Upingwa wendi apa wa pwire, mosirongo ta mu kara nzara zonene makura ta tameke kuhepa.
15 Makura ta zi a ka likwambere kwagumwe gomosirongo oso a mu kute, gwina makura ta mu tumu a ka lise yinguru yendi.
16 Nzara kwa mu kwete unene makura ta likwambere asi ngano va mu pe mutjeketera ogu ngayi li yinguru, nye kwato ogu ga gu mu pere.
17 “Apa ga dimbwilire asi ga rugene ugova ta tanta asi: ‘Tara nye varugani wotate kounzi, nonondya dononzi edi ava li, nye ame kwa kuyafira oku nzara!
18 Tani katuka ni ze kotate ni ka va tantere asi: “Tate, ame na zona kwaKarunga noku kweni.
19 Ame kapi nina fire hena kutumbura nge asi muneni. Ninkeni nge tupu name ni kare gumwe govarugani veni.”’
20 Makura ta katuka a ze koguhwe. Age simpe ure, oguhwe nare vana mu mono, tava mu fire nkenda makura tava duka va ka mu lidingire, tava mu ncumita unene.
21 Mumati makura ta va tantere asi: ‘Tate, ame na zona kwaKarunga noku kweni. Ame kapi nina fire hena kutumbura nge asi muneni.’
22 Nye oguhwe tava tantere vakareli vawo asi: ‘Genderereni mu ka rete erwakani lyewa po, mu ya li mu dwareke, mu ya mu dwareke hena linga noyicamakaku.
23 Ntani ka reteni ntana za linetera, mu ya zi dipage, tu ya lyeni nokuhafa,
24 yeeyi munange kwa fire nye ngesi nomwenyo ana kara, kwa zumbanene nye ngesi ana moneka.’ Makura tava djobwana.
25 “Munendi gomukondi kwa kere komapya, apa ga ka tengwire a hedere pepi nembo, ta zuvhu nonsumo novantu vana kudana.
26 Ta zigida mukareli gumwe a ya mu pure asi yisinke yina kuhoroka.
27 Ta mu tantere asi: ‘Mumbyoge ana ka tengura, makura oguho yiyo vana dipaga ntana za linetera morwa ana ka tengura age muwaawa.’
28 Nye age ta handuka, ta nyoka kuhwilira mo. Oguhwe makura tava pwaga va ya mu lihenge.
29 Age ta limburura oguhwe asi: ‘Tareni, ame kwa mu ruganena nomvhura dononzi ntani kapi na nyoka rumwe kulimburukwa nompangera deni, nye kapi mwa pa nge rumwe nampili sikombo sosinona ni ka hafe kumwe novakwetu.
30 Nye tupu ana ya siki ogo muneni ogu ga ka hepekera upingwa weni konohondedi, yiyo muna mu dipagere ntana za linetera.’
31 Awo tava mu limburura asi: ‘Munange, ove name wa kara, ano yininke yange nayinye, yoge.
32 Nye ose tu hafe nokubodjana, morwa mumbyoge kwa fire nye ngesi ana kara nomwenyo, kwa zumbanene nye ngesi ana moneka.’”
Nonkango dokonhi
^ Kwa tamba koyimaliwa yoVagereka ngava tumbura asi Drachma.
^ Ndi “vakwawo wovakadi.”
