Buke zaRukasa 16:1-31
16 Makura ta tantere hena varongwa vendi asi: “Pwa kere mugara gumwe gongawo ogu va tanterere asi: ‘Erenga lyoge eli ali gendesa yininke yemembo lyoge kuna kuhepeka emona lyoge.’”
2 Makura ta mu zigida, ta mu tantere asi: ‘Eyi nina kukuzuvhira yidona. Zende o ka tjange omu wa ruganesa yimaliwa yange, morwa kapi nani kupulisira hena o gendese embo lyange.’
3 Makura erenga ta li lipura lyene asi: ‘Mokumona asi hekurwange ta gusa nge situmbukira sange, yisinke nani rugana? Ame kapi ani vhuru kulima ntani ame nomuga kuhundagera.
4 Na yi diva eyi nani rugana yipo vantu ngava tambure nge momambo gawo apa hekurwange nga gusa nge situmbukira sange.’
5 Makura ta zigida ava va korota hekurwendi gumwe nagumwe, ta pura gomuhowo asi: ‘Yingapi wa korota hekurwange?’
6 Age ta limburura asi: ‘Yipako* efere yomagadi gononzwe.’ Ta mu tantere asi: ‘Gusa buke zoge zomakongo o ka tjange mo usimbu 50.’
7 Ta pura gokukwama ko asi: ‘Ove yingapi wa mu korota?’ Ta tanta asi: ‘Nonsako* efere dorukokotwa.’ Ta mu tantere asi: ‘Gusa buke zoge zomakongo o ka tjange mo 80.’
8 Ano hekurwendi makura ta mu pandadeke morwa age kwa ruganesere nondunge nampili ngomu ga dilire kulimburukwa, yeeyi vantu womouzuni* ou kuruganesa nawa nondunge monkedi omu ava gendesa yininke yawo kupitakana vakareli vaKarunga.*
9 “Tani mu tantere hena asi: Tuliseni po ukwawo novantu pokuruganesa emona lyomouzuni ou woudona, yipo asi apa ngali pwa, awo ngava ka mu tambure momambo ganarunye.
10 Ogu va huguvara mweyi yoyinunu, nomu mweyi yoyinene kwa mu huguvara, ano ogu va dira kuhuguvara mweyi yoyinunu, nomusi mweyi yoyinene kapi va mu huguvara.
11 Yipo nye, nsene kapi o vhuru kuruganesa nawa emona lyomouzuni ou woudona, ngapi ngava kuhuguvarera emona lyousili?
12 Nsene kapi o ruganesa nawa yininke yovakweni, yilye ogu nga ku pa yanyamoge?
13 Kwato mukareli ogu a vhuru kukarera vahekuru vavali, morwa na nyenga po gumwe, ta hara po mukwawo, ndi na hamena kwagumwe, ta sense po mukwawo. None nokuvhura si kukarera Karunga ntani emona.”
14 Ano Vafalisayi ava va here unene yimaliwa, kwa purakenene nayinye eyi ga uyungire makura tava mu serauka.
15 Makura ta va tantere asi: “One kurugana yininke yipo mu moneke kovantu asi mu vahungami, nye Karunga ga diva nomutjima deni. Yeeyi eyi ava mono vantu asi mulyo, kwaKarunga nayimwe si.”
16 “Veta ntani matjango govaporofete kwa ga divisire dogoro apa ga wizire Johanesa. Kutunda opo, mbudi zongwa zoUhompa waKarunga yipo va tamekere kuzidivisa, ano wovanzi kukondja yipo va ze mo.
17 Eguru nevhu kuvhura kudongonoka po nye koVeta nakamwesi aka nga ka dira kusikilira mo.”
18 “Nkenye ogu a zumbu mukadendi, a ka kware gwapeke, kuhondera, ano ogu a kwara mukadi ogu va zumba, kuhondera.”
19 Jesus kwa simwitilire sifanekeso esi asi: “Pwa kere mugara gongawo ogu nga dwara yikoverero yondiro, age nga paruka eparu lyewa.
20 Nye pwa kere muhepwe gedina Rasarusa ogu ga kere nomasina, age ngava mu reta pevero lyongawo,
21 age kwa here a lye ruhupwa oru ngaru gu kositafura somugara gongawo. Nonombwa deedi ngadi wiza di ya pehagure komasina gendi.
22 Konyima zosiruwo, mugara gomuhepwe ta fu makura vaengeli ta va mu twara a ka hingire pepi* naAbirahamu.
Mugara gongawo nage ta ya fu, ta va mu vhumbike.
23 Age moMayendo* kuna kuhepa, ta kankura meho gendi, ta monene Abirahamu koure ana hingire pepi* naRasarusa.
24 Ta zigire asi: ‘Tate Abirahamu, fira nge nkenda o tume Rasarusa a ka dove nyara zendi momema a ya tendeke eraka lyange, yeeyi ame kuna kuhepa momundiro ogu.’
25 Nye Abirahamu ta mu tantere asi: ‘Munange, diworoka omu wa parukire eparu lyewa nye Rasarusa kwa hepere. Age ngesi kuna kumuhengagwida nye ove to kara moruhepo.
26 Ntani hena, pokatji ketu kuna kara po epompwa,* yipo nye asi ava vana kara oku nokuvhura si kutaguruka va wize oko, ndi ava vana kara oko, nokuvhura si va wize oku.’
27 Makura ta tanta asi: ‘Nsene asi yimo ngoso, mu tumeni kembo lyotate,
28 a ka zuvhisire vamumbya vange vatano yipo ngava dire kuwiza mevega eli lyoruhepo.’
29 Nye Abirahamu ta mu tantere asi: ‘Mosesa novaporofete poveli, va purakene kwawo.’
30 Age ta tanta asi: ‘Hawe tate, Abirahamu, yeeyi nsene a za ko ogu ga fa, nava ka litezurura.’
31 Nye age ta mu tantere asi: ‘Nsene asi kapi vana kupurakena kononkango daMosesa novaporofete, nampili muntu ogu ga fa, kapi nava ka mu purakena.’”
Nonkango dokonhi
^ Sipako simwe kwa hulire ponolitera 22.
^ Nsako zimwe zorukokotwa kwa kere 170 kg.
^ MoRugereka asi “vana wouzera.”
^ MoRugereka asi “‘mevha lyaAbirahamu,’ eyi kulikida asi kwa mu haferere.”
^ MoRugereka asi “mevha lyendi.”
^ Kwa tamba ekero lyenene lya za monaure.
