Buke zaRukasa 17:1-37
17 Makura ta tantere varongwa vendi asi: “Ngapa kara nkenye apa yininke eyi ayi ninkisa muntu a zone. Nye nane vakwetu muntu ogu a ninkisa mukwawo a zone!
2 Muntu gwangesi ngano ga fira kumumangerera emumanya* monsingo noku mu zugumina mefuta, kapisi kumwe neyi na pukisa kamwe potunona twange.
3 Takameseni. Nsene gumwe* ana kuzono, mu pukurura, ano nsene a litezurura, mu dongwenena po.
4 Nampili nsene a kuzonena yikando ntambali mezuva, a wize koge yikando ntambali a ya ku tantere asi: ‘Na litezurura,’ mu dongwenena po.”
5 Vapositoli tava tantere Hompa asi: “Tu vatera tu kare nepuro lyokupama.”
6 Hompa makura ta va tantere asi: “Ngano epuro lyeni kwa hura pohuma zomositareta, ngano kuvhura kutantera sitji souhoro asi: ‘Duruka po apa o ka ndjikame mefuta,’ makura naso tasi mu zuvhu.
7 “Opo muna kara, yilye na vhura kutantera mukareli gwendi ogu ana ka purura ndi ana ka lisa yimuna apa na ka tunda komapya asi: ‘Genderera o wize oku o ya lye’?
8 Nani kapi na mu tantera asi: ‘Dwara siteta* o terekere nge makura o pe nge nondya dange, apa nani mana kulya nokunwa, nove ntani nye no lya nokunwa’?
9 Age kapi na pandura mukareli ogo morwa age kuna sikisa mo tupu yirugana yendi.
10 Mokulifana, nsene muna mana kurugana nayinye eyi vana mu tantere, tanteni asi: ‘Ose tu vakareli tupu. Eyi tuna rugana yiyo ngano twa fira kurugana.’”
11 Monzira zendi zokuza koJerusarema, age kwa pitire pomururani gwaSamaliya naGalireya.
12 Eyi ga hwilira momukunda gumwe, vagara murongo woyingondwe tava mu mono, awo kwa sikamene koure.
13 Tava zigire asi: “Jesus, Murongi, tu fira nkenda!”
14 Apa ga va mwene, ta va tantere asi: “Zendeni mu ka moneke kovapristeli.” Ha va za mokugenda, tava veruka.
15 Apa munayingondwe gumwe ga mwene asi ana veruka, ta tengura oku ta hamberere Karunga nezwi lyenene.
16 Makura ta gwire konompadi daJesus oku ta mu pandura. Mugara ogo kwa kere Musamaliya.
17 Jesus ta tanta asi: “Nani kapisi murongo vana veruka? Oku vana kara vena ntane kupi?
18 Nagumwesi hena ana tengura ko a ya hamberere Karunga, googu munayirongo gelike ndi?”
19 Makura ta mu tantere asi: “Katuka o ze, epuro lyoge lina kuverura.”
20 Vafalisayi apa va mu pulire asi siruwoke ngau wiza Uhompa waKarunga, age ta va limburura asi: “Uhompa waKarunga kapi ngau wiza noyidiviso yokumoneka,
21 ndi vantu ngava tante asi, ‘tareni oku!’ ndi ‘tareni kwina!’ Yeeyi Uhompa waKarunga mouli mokatji keni.”
22 Makura ta tantere varongwa vendi asi: “Mazuva taga wiza apa ngomu hara kumona ezuva limwe lyaMunwaMuntu, nye kapi ngomu li mona.
23 Vantu makura ngava mu tantera asi ‘tareni kwina!’ ndi ‘tareni apa!’ Kapisi ngomu pwage ko ndi mu va kwame.
24 Moomu tupu aru vema ruvadi ru tundilire koruha rumwe rweguru ru ka livete koruha rukwawo, nemezuva lyaMunwaMuntu yimo ngorooro ngayi kara.
25 Nye pomuhowo, nga pita momahepeko gomanzi ntani vantu ava ngava mu nyoka.
26 Ntani hena, moomu tupu ya kere momazuva gaNowa, nomomazuva gaMunwaMuntu yimo ngorooro ngayi kara:
27 vantu ngava li nokunwa, vagara ngava kwara ano vakadi ngava va pangere va kware dogoro ezuva eli Nowa ga hwililire memuwato, makura Ruhanzo yipo rwa wizire noku ya va zonagura po navenye.
28 Moomu tupu ya kere momazuva gaRoto: vantu ngava li nokunwa nokuranda nokurandesa ntani ngava kunu nokudika.
29 Nye mezuva eli ga tundire Roto moSodoma, mamanya gomundiro yipo ga tundire meguru ga va zonagure po navenye.
30 Nemezuva eli nga moneka MunwaMuntu yimo ngorooro ngayi kara.
31 “Mezuva olyo, ogu nga kara peguru lyonzugo nye yiweka yendi moyili monzugo, ga ha humburuka a ka yi simbe, ano ogu nga kara mepya ga ha tengura a ka simbe yininke eyi ana sigi.
32 Diworokeni mukadaRoto.
33 Ogu ga hara kupopera mwenyo* gwendi nga gu zumbanesa, nye ogu a gu zumbanesa yige nga gu parura.
34 Tani mu tantere asi masiku ogo vantu vavali ngava rara pombete zimwe, gumwe ngava mu gusa po ano mukwawo ngava mu siga.
35 Povakadi vavali ava ngava twa yilya, gumwe ngava mu gusa po ano ogu gumwe ngava mu siga po.”
36 *——
37 Awo makura tava mu pura asi: “Kupi ngayi horokera eyi Hompa?” Age ta va limburura asi: “Oku aku kara erambo,* yiko aga pongo makuvi kooko.”
Nonkango dokonhi
^ Ndi “emanya lyenene eli nga si mbirumuna sindongi.” Alyo ngava li ruganesa mokukweya rukokotwa.
^ Kwa tamba komupuli mukwetu.
^ Siteta kuna kara sidwara esi ava dwara pokutereka nokugavera nondya.
^ Ndi “eparu.”
^ Tara mwaMateusa 17:21, ftn.
^ Ndi “sikorama sokufa.”
