Buke zaRukasa 18:1-43
18 Jesus makura ta tantere varongwa vendi sifanekeso kuhamena mulyo gokukanderera nkenye apa ntani nokudira kuhageka,
2 ta tanta asi: “Mositata simwe mwa kere mupanguli ogu ga dilire kutjira Karunga ntani kapi nga fumadeke vantu.
3 Ntani mwa kere hena mufisayendi ogu nga zi nkenye apa kwendi a ka mu tantere asi: ‘Pangura nge pauhunga nogu na lizonena nage.’
4 Pomuhowo kapi ga here, nye konyima ta uyunga asi: ‘Nampili ngomu na dira kutjira Karunga ntani kapi na fumadeka vantu,
5 nye mokumona asi mufisayendi ogu kuna kukondjesa nge unene, tani mu pangura pauhunga yipo nga hageke kuwiza morwa ta rorora nge.’”
6 Hompa makura ta tanta asi: “Purakeneni eyi ga uyungire mupanguli nampili ngomu ga dilire kukara mulimburukwi.
7 Karunga nga dire nye kuvatera vahoroworwa vendi ava ava mu likwambere masiku nomutenya nampili ngomu a va lididimikire ndi?
8 Tani mu tantere asi, age nga ninka va va pangure pauhunga usimbu-simbu. Nye apa nga wiza MunwaMuntu nga ya gwana mo sili epuro lyangesi mouzuni ndi?”
9 Age kwa simwitilire hena sifanekeso simwe kwavamwe ava va litere vene asi awo vahungami nokutara vakwawo asi kwato mulyo:
10 “Vagara vavali kwa zire kontembeli va ka kanderere, gumwe kwa kere Mufalisayi ano ogu gumwe mufutisi gomutero.
11 Mufalisayi kwa sikeme, ta kanderere momutjima asi: ‘Karunga, tani kupandura morwa ame kapi na kara ngwendi vantu vamwe, vakorokotji nava ava dili kulimburukwa novagara wokukwara ava ava hondere ndi ngwendi gogu mufutisi gomutero.
12 Ame kudilira ruvali mosivike ntani kugava yiumurongo poyininke nayinye eyi ani gwana.’
13 Nye mufutisi gomutero kwa sikamene ure ntani kapi ga here kukankura meho gendi keguru nye age kwa litoonene ponturo oku ta tanta asi: ‘Karunga, fira nge nkenda, ame munanzo.’
14 Tani mu tantere asi mugara ogu kwa zire kembo age Karunga ana mu hafere, nye kapisi ngwendi Mufalisayi gwina. Yeeyi nkenye ogu a linenepeke ngava mu nunupika, ano ogu a linunupike ngava mu nenepeka.”
15 Vantu kwa mu reterere vakeke vawo yipo a ya va kambeke mawoko nokuvatungika, nye varongwa vendi apa va yi mwene, tava va tugumukire.
16 Nye Jesus ta ninki va mu retere vakeke pokutanta asi: “Sigeni vanonagona va wize kwange, mwa ha va kondera, morwa vantu vangoso yiwo wa hamena Uhompa waKarunga.
17 Yosili nina kumutantera asi, ogu a dili kutambura Uhompa waKarunga ngwendi munonagona ogu, kapi nga za mo.”
18 Mupangeli gumwe ta mu pura asi: “Murongi gomuwa, yisinke nani rugana yipo ngani ka gwane mwenyo gwanarunye?”
19 Jesus ta mu limburura asi: “Morwasinke ono kutumbwira nge asi ni muwa? Kwato ogu ga wapa, ntudi Karunga.
20 Amesi wa diva yipango eyi asi: ‘Walye o hondere, walye o dipaga, walye o vaka, walye o rundire, o fumadeke oguho nonyoko.’”
21 Age ta tanta asi: “Ame kwa yi sikisa mo nayinye oyo kutunda unona wange.”
22 Apa Jesus ga yi zuvhire oyo, ta mu tantere asi: “Kosili sininke simwe hena esi wa hepa kurugana: Ka randese yininke yoge nayinye eyi wa kara nayo, ano yimaliwa o ka yi gavere vahepwe, ngo gwanene po emonazuni meguru. Makura ntani nye no ka wiza, o ya kare murongwa gwange.”
23 Apa ga yi zuvhire eyi, ta guwu unene morwa age kwa kere ngawo zonene.
24 Jesus ta mu tara nokutanta asi: “Ayo udigu unene kwava va kara noyimaliwa yoyinzi mokuza moUhompa waKarunga!
25 Ayo ureru kongameru mokuhwilira mezuru lyonsonga nye udigu komuntu gongawo mokuza moUhompa waKarunga.”
26 Ava va yi zuvhire oyo tava tanta asi: “Nsene yimo ngoso, yilye nye ngava vhura kuparura?”
27 Age ta tanta asi: “Eyi ya digopa kovantu, kwaKarunga ureru.”
28 Nye Peturusa ta tanta asi: “Tara si! Ose kwa siga yininke yetu yiyo atu kukwama.”
29 Age ta va tantere asi: “Yosili nina kumutantera asi kwato ogu ga siga embo lyendi ndi mukadendi ndi vakuru novamumbya vendi ndi vakondi vendi ndi vana vendi morwa Uhompa waKarunga
30 nga dire kugwana yoyinzi mouzuni ou, ano mouzuni* woupe, mwenyo gwanarunye.”
31 Makura ta zigida ava murongo navavali, ta va tantere asi: “Tareni, tatu kandukeni koJerusarema, ano yininke nayinye eyi va tjanga vaporofete kuhamena MunwaMuntu tayi ka sika mo.
32 Pasihonena, age ngava ka mu gava kovantu wokonomuhoko dapeke ngava ka mu swaure noku mu tekura momudona ntani noku mu fizagera.
33 Konyima zoku mu sopora,* ngava ka mu dipaga nye mezuva lyautatu ngava mu pindura koufe.”
34 Nye awo kapi va kwete egano eyi ya tente yininke nayinye oyo, yeeyi kwa yi va horekerere yiyo va dilire kukwata egano eyi ga va tanterere.
35 Ngomu Jesus ga hederere pepi naJeliko, mugara gomutwiku ogu nga hundagere kwa hingilire konontere donzira.
36 Apa ga zuvhire mbunga zina kupita po, ta pura eyi yina kuhoroka.
37 Tava mu tantere asi: “Jesus goMunasareta ana kupita po.”
38 Makura ta zigire asi: “Jesus, MunwaNdafita, fira nge nkenda!”
39 Ava va kere komeho tava mu tugumukire asi a mwene, nye age ta zigire unene asi: “MunwaNdafita, fira nge nkenda!”
40 Jesus ta sikama noku va tantera va mu rete kwendi. Apa ga sikire pepi, Jesus ta mu pura asi:
41 “Yisinke ono hara nani kuruganena?” Age ta limburura asi: “Hompa, ninka nge ni mone hena.”
42 Jesus makura ta mu tantere asi: “Mona, epuro lyoge lina kuverura.”
43 Poopo ngoso, ta tameke kumona, makura ta mu kwama oku ta hamberere Karunga. Navenye ava va yi mwene eyi, tava hamberere Karunga.
