Buke zaRukasa 19:1-48
19 Jesus kwa zire moJeliko makura ta ka pitakana.
2 Amo mwa kere mugara gongawo gedina Sakeusa, age kwa kere mukurona govafutisi womutero.
3 Age kwa here kumona asi yilye nani ogo Jesus, nye kapi ga mu mwene morwa mbunga ntani Sakeusa musupi ga kere.
4 Makura ta duka a pite komeho noku ka ronda kositji soukuzu yipo a mone Jesus, yeeyi nzira ozo yizo ga ya pitire.
5 Apa Jesus ga ya sikire po, ta kankuka, ta mu tantere asi: “Sakeusa, humburuka usimbu, yeeyi naina tani ka kara mugenda membo lyoge.”
6 Ta humburuka usimbu, ta mu tambura noruhafo.
7 Apa va yi mwene eyi, makura navenye tava vhunguta asi: “Kuna kuza a ka rare membo lyomugara gomunanzo.”
8 Sakeusa ta sikama, ta tantere Hompa asi: “Harufa zemona lyange tani zi gava kovahepwe, ano yimaliwa eyi na vaka pokukumbagera tani yi va tengwidire kupitakana pwarune.”
9 Apa Jesus ga yi zuvhire eyi ta uyunga asi: “Naina membo eli muna wiza eparu, yeeyi nove munwaAbirahamu.
10 Yeeyi MunwaMuntu kwa wizira a ya papare noku ya parura ava va zumbana.”
11 Awo kuna kupurakena koyininke eyi, ta va tantere hena sifanekeso simwe morwa age kwa kere pepi naJerusarema ntani awo kwa gazarere asi ntaantani va mone Uhompa waKarunga.
12 Makura ta tanta asi: “Mugara gemepata lyovahompa kwa zire kosirongo sokoure va ka mu ture mouhompa ntani nga ka tengura.
13 Ta zigida vakareli vendi murongo, ta va pe yimaliwa yoyinzi* noku va tantera asi: ‘Yi ruganeseni ngesefa dogoro ngani ka tengure.’
14 Nye vantu womosirongo sendi kwa mu nyengere makura tava tumu ko vantu va ka mu tantere asi: ‘Kapi tuna hara mugara ogo a tu pangere.’
15 “Apa va ka mu tulire mouhompa,* ta ka tengura nokuzigida vakareli vendi ava ga pere yimaliwa* yipo a ya divilise eyi va gwanena po pokuyiruganesa kongesefa.
16 Gokuhova ta wiza ta ya mu tantere asi: ‘Hompa, poyimaliwa yoge na gwanena po nsonso zoyimaliwa murongo.’
17 Ta mu tantere asi: ‘Wa rugana nawa, ove mukareli gomuwa, morwa wa limburukwa moyininke yoyinunu, tani ku pe nonkondo dokupangera yitata murongo.’
18 Gwauvali ta wiza, ta ya tanta asi: ‘Hompa, poyimaliwa yoge na gwanena po nsonso zoyimaliwa yitano.’
19 Nage ta mu tantere asi: ‘Nove tani ku pe nonkondo dokupangera yitata yitano.’
20 Nye gokukwama ko ta wiza, ta ya tanta asi: ‘Hompa, yimaliwa yoge yeeyi na horeka posikehe.
21 Ame kwa kutjilire, yeeyi ove mugara gonyanya, ove kugusa eyi wa dira kupungwisa ntani kuzangura eyi wa dira kukuna.’
22 Ta mu tantere asi: ‘Tani kupangwisisa kononkango doge, mukareli gomudona ove. Amesi wa yi diva asi ame mugara gonyanya ogu a gusa eyi ga dira kupungwisa nokuzangura eyi ga dira kukuna?
23 Morwasinke nye wa dilire kupungwisa yimaliwa yange* kombanga? Apa nina ka tengura ngesi ngano nina ya gwanene po nsonso.’
24 “Ta tantere ava va sikeme po asi: ‘Mu guseni yimaliwa mu yi pe ogu ga gwanena po nsonso zoyimaliwa murongo.’
25 Nye awo tava mu tantere asi: ‘Hompa, age amesi ana kara nare noyimaliwa murongo!’
26 Ta va limburura asi: ‘Tani mu tantere asi ogu ga kara noyuma ngava mu pa yoyinzi, nye ogu ya dira neyi ga kara nayo ngava yi mu gusa.
27 Reteni hena wonkore zange ava va dilire kuhara ni va pangere, mu ya va dipagere komeho zange.’”
28 Apa ga mene kuuyunga yininke eyi, ta kanduka koJerusarema.
29 Apa ga ka sikire pepi noNdundu zoMauzwe apa pwa kere mukunda gwaBetefage naBetani, ta tumu varongwa vendi vavali
30 nokuvatantera asi: “Zendeni momukunda gwina muna kumona, apa nomu ka hwilira mo, nomu ka gwana sindongigona vana mangerere, esi ga dira kuronda rumwe muntu. Ka si ditureni mu ka si rete.
31 Nye nsene gumwe na ka mu pura asi: ‘Morwasinke muna kusiditwira?’ Ka tanteni asi: ‘Hompa ana si hepa.’”
32 Owo ga tumine tava zi, tava ka si gwana moomu ga yi va tanterere.
33 Nye apa va si ditwire, venya sindongigona tava va pura asi: “Morwasinke muna kuditwira sindongigona oso?”
34 Tava limburura asi: “Hompa ana si hepa.”
35 Tava si twara kwaJesus, tava zara pomugongo gwaso yikoverero yawo yokontunda, makura Jesus ta rondo po.
36 Ngomu ga gendere, tava zara yikoverero yawo yokontunda monzira.
37 Apa ga sikire pepi nonzira ezi za gurumuka zi tunde koNdundu zoMauzwe, mbunga zovarongwa tazi hafa nokuziguruka kuhamberera Karunga morwa yitetu yoyinene eyi va mwene
38 pokutanta asi: “Va mu tungike Hompa ogu ana kuwizira medina lyaJehova! Mbili zi kare meguru, va mu hamberere ogu ga kara keguru-guru!”
39 Nye Vafalisayi vamwe ava va kere mombunga ozo tava tanta asi: “Murongi, tantera varongwa woge va mwene.”
40 Nye age ta va limburura asi: “Nsene nava mwena, mamanya yigo naga zigira.”
41 Apa ga sikire pepi nositata saJerusarema, tasi tara noku si lilira,
42 ta tanta asi: “Ngano wa divire yininke eyi ngayi kuretera mbili, nye yininke eyi kwa yi kuhorekera.
43 Yeeyi mazuva taga wiza apa nonkore doge ngadi kukundurukida komaruha nagenye noyitji yokutwepa.
44 Ngava kumyona pevhu kumwe novana woge, moge kapi ngava siga mo emanya eli ngali kara kontunda zekwawo, yeeyi kapi wa dimbwilire siruwo esi va ya kukonakonene.”
45 Makura ta hwilire montembeli, ta tjida mo ava va randesere
46 nokuvatantera asi: “Kwa tjanga asi ‘nzugo zange ngava zi tumbura asi nzugo zomakanderero,’ nye one yiyo muna kuzitura zi kare ekombombo lyovakorokotji.”
47 Age nga rongo nkenye ezuva montembeli. Ano vapristeli wovanene novalirongi womatjangwa ntani vanekuto kwa paparere mpito zokumudipaga
48 nye kapi va gwene mpito zokuyirugana, yeeyi vantu kwa kere nendi nkenye apa va mu purakene.
Nonkango dokonhi
^ MoRugereka asi “nomina murongo.”
^ Ndi “pere nonkondo dokupangera.”
^ MoRugereka asi “sisiliveli.”
^ MoRugereka asi “sisiliveli sange.”
