Buke zaRukasa 23:1-56
23 Mbunga nazinye ta zi katuka noku mu twara kwaPiratusa.
2 Tava tameke kumurundira asi: “Mugara ogu kuna kupukisa muhoko gwetu nokusilika vantu mokufutira hompa gwaRoma mutero, ntani kuna kutanta asi age Kristusa ntani hompa.”
3 Piratusa makura ta mu pura asi: “Nyove Hompa goVajuda ndi?” Age ta limburura asi: “Yimo, moomu ono kutanta.”
4 Piratusa makura ta tantere vapristeli wovanene nombunga asi: “Mugara ogu kapi nina mu gwana unzoni.”
5 Nye awo tava twikire ko asi: “Eyi ana kuronga vantu moJudeya nazinye kuna kuretera vantu maudigu, kutamekera koGalireya dogoro nakooku.”
6 Piratusa apa ga yi zuvhire oyo, ta pura asi: “Mugara ogu Mugalireya ndi?”
7 Apa ga zuvhire asi age kwa kere gemepangero lyaHerodesa ntani asi Herodesa mweli moJerusarema posiruwo oso, yipo ga mu tumine kwendi.
8 Apa Herodesa ga mwene Jesus, ta hafa unene. Yeeyi age kwa ndindilire siruwo sosire asi a mone Jesus morwa yinzi ga zuvhire kumuhamena ntani age kwa here a mone sitetu esi na mu ruganena.
9 Makura ta tameke kumupuragera, nye age kapi ga mu limbwilire.
10 Nye vapristeli wovanene novalirongi womatjangwa kwa handukire makura tava katuka va mu rundire.
11 Herodesa novakwayita vendi tava mu sense noku mu swaura pokumudwareka sikoverero sosiwa makura tava mu twara kwaPiratusa.
12 Kutunda ezuva olyo, Herodesa naPiratusa tava kara vakaume, yeeyi nare awo kwa linyengere.
13 Piratusa makura ta zigida vapristeli wovanene novapangeli ntani navamwe,
14 ta va tantere asi: “One kuna reta mugara ogu asi age kuna kuzeda vantu va rwanese epangero. Nye apa nina mu puragere komeho zeni, kapi nina mu gwana nzo zoyininke eyi muna kumurundira.
15 Nampili Herodesa nage kapi ana ka mu gwana unzoni yiyo ana ka mu tengwida kwetu, yeeyi kwato eyi ga zona yoku mu twaredesa konomfa.
16 Tani ninki tupu va mu sopore makura a ze.”
17 *——
18 Nye mbunga nazinye ta zi zigire asi: “A fe,* Barabasa yige no tu mangwilira!”
19 (Mugara ogu kwa mu tulire modorongo morwa kwa lihamekere mokurwanesa epangero ntani kwa kere nonzo zedipago.)
20 Piratusa kwa uyungisire hena mbunga morwa kwa here a mangurure Jesus.
21 Nye awo tava zigire asi: “Va mu pampare kositji! Va mu pampere kositji!”
22 Age ta va pura rwautatu asi: “Morwasinke? Udona musinke ga rugana? Kapi na gwana mo mwendi nzo ezi nazi mu twaredesa konomfa, tani mu ninki va mu sopore makura a ze.”
23 Awo kwa twikilire kuzigira unene asi va mu dipage dogoro ta yi mu vhuru kuvasilika.
24 Piratusa yipo ga va ruganenene eyi va here.
25 Age ta va mangwilire mugara ogu va here, ogu ga kere modorongo morwa nzo zedipago ntani kurwanesa epangero, nye Jesus ta mu gava kwawo va ka mu rugane eyi va here.
26 Ngomu va mu twere, tava kondere Simoni gomoKirene ogu ga ka tundire ponze zositata makura tava mu ninki a simbire po Jesus sitji sendi, a mu kwame monyima.
27 Mbunga zonene zovantu kwa mu kweme kukwatera mo vakadi ava va mu lilire oku tava litoona pononturo morwa ruguwo.
28 Jesus ta setuka, ta tara vakadi owo, ta va tantere asi: “One vakadona vaJerusarema, hagekeni kulilira nge. Nye lilireni nyamweni novana veni,
29 yeeyi mazuva ta ga wiza apa vantu ngava tanta asi: ‘Nonganze nomazimo aga ga dira kuhampuruka nomavere aga ga dira kuzamweka rumwe kuna kara vantu woruhafo!’
30 Makura ngava tantera nondundu asi: ‘Tu gwireni!’ Ntani tundundugona asi: ‘Tu horekeni!’
31 Nsene va rugana eyi aso sitji sina tarara, ngapi nye nsene si kukuta?”
32 Vagara vavali wovakorotji nawo kwava twere va ka va dipage kumwe nendi.
33 Apa va ka sikire kevango eli ava tumbura asi Evango lyoYikora, tava mu pampara kositji novakorokotji vavali, gumwe korulyo rwendi ano ogu gumwe korumoho rwendi.
34 Nye Jesus ta tanta asi: “Tate, va gusira po, yeeyi kapi vana diva eyi vana kurugana.” Nye awo tava ligavere yikoverero yendi pokuyininkira fungu-fungu.
35 Vantu kwa sikeme nokutara. Nye vapangeli kwa mu seraukire oku tava tanta asi: “Age nga popere vakwawo, mu sigeni a lipopere mwene nsene asi yige Kristusa, ogu ga horowora Karunga.”
36 Vakwayita nawo kwa mu swawire, tava wiza noku ya mu nwisa vhinyu zoururu
37 nokutanta asi: “Nsene asi ove Hompa goVajuda, liparura nyamoge.”
38 Keguru lyomutwe gwendi kwa tulire ko sidiviso apa va tjenge asi: “Ogu yige Hompa goVajuda.”
39 Gumwe govakorokotji ava va pamparere kumwe nendi, ta tameke kumuswaura asi: “Nani kapisi nyove Kristusa? Liparura nyamoge nose o tu parure no!”
40 Nye mukwawo ta mu nyokere asi: “Ove kapi wa tjira Karunga mokumona asi nove kuna kuhepa ngwendi yige?
41 Ose yina tu fire, morwa kuna kutuhepekera yininke eyi twa rugana, nye mugara ogu kwato yoyidona eyi ga rugana.”
42 Makura ta tanta hena asi: “Jesus, ngo ka diworoke nge moUhompa woge.”
43 Age ta mu tantere asi: “Yosili nina kukutantera naina asi ngo ka kara name moParadisa.”
44 Azo kwa kere vili zauntazimwe,* nye mosirongo nasinye ta mu kara mundema gomunene dogoro vili zauntane,*
45 morwa ezuva kapi lya geve site yiyo kwa karerere mundema, makura ekehe lyomontembeli tali tauka pokatji.
46 Jesus ta zigire nezwi lyenene asi: “Tate, eparu* lyange tani li gava koge.” Apa ga mene kuuyunga oyo, makura ta fu.
47 Apa mupitisili govakwayita ga mwene eyi ya horokere, ta hamberere Karunga pokutanta asi: “Yosili, mugara ogu nani muhungami ga kere.”
48 Apa vantu ava va pongere va mwene eyi ya horokere, tava tengura komambo gawo oku tava litoona pononturo morwa ruguwo.
49 Navenye ava va mu divire kwa sikamenene ure. Ntani hena, vakadi ava va mu kweme kutundilira koGalireya nawo yipo va kere ntani va mwene eyi ya horokere.
50 Pwa kere mugara gedina Josefa gumwe gomosigongi somasimbi, age kwa kere muhungami ntani nga rugana yoyiwa.
51 (Age kapi ga va kwatesere ko mokudipaga Jesus.) Age kwa tundilire koAremateya sitata soVajudeya ntani kwa ndindilire Uhompa waKarunga.
52 Mugara ogu kwa zire kwaPiratusa a ka hundire simpu saJesus.
53 Ta si gusa ko, ta si dingire pekehe nokukasirangeka montoko* ezi va tjokwera memanya omu va dira kurangeka rumwe simpu.
54 Alyo kwa kere ezuva lyoMaliwapaikiro ntani Esabata kwa kere pepi nokusika.
55 Vakadi ava va mu kweme kutundilira koGalireya, tava tara montoko* oku va mu rangekere,
56 makura tava tengura va ka wapaike yikwedumba. Nye mEsabata tava pwizumuka kuliza noveta.
Nonkango dokonhi
^ Tara mwaMateusa 17:21, ftn.
^ MoRugereka asi “mu twara.”
^ Kwa tamba koyiha yovili 12, mutwekatji.
^ Kwa tamba koyiha yovili 3, sitenguko.
^ Ndi “mwenyo.”
^ Ndi “meyendo.”
^ Ndi “meyendo.”
