Buke zaRukasa 24:1-53
24 Mezuva lyokuhova lyomosivike,* tava menekere kontoko* va tware yikwedumba eyi va wapaikire.
2 Nye tava ka gwana emanya vana li sindumuna ko kontoko,*
3 apa va hwililire mo, kapi va ka gwene mo simpu saHompa Jesus.
4 Hava hokwa kutetuka, va tara ko vagara vavali woyikoverero yokupaima vana va sikamene.
5 Vakadi owo tau va kwata woma makura tava nyongama, ano vagara owo tava va pura asi: “Morwasinke muna kupaparera munamwenyo mokatji kovafe?
6 Age mwato omu, ka va mu vhumbwire mo. Diworokeni eyi ga mu tanterere apa ga kere moGalireya
7 asi MunwaMuntu ngava mu gava kovananzo va mu dipagere kositji, ano mezuva lyautatu nga vhumbuka koufe.”
8 Awo makura tava diworoka nonkango dendi,
9 tava tundu ko kontoko* va ka tantere ava murongo nazimwe novakwawo hena vamwe yininke nayinye eyi.
10 Awo kwa kere Mariya Mangadarena naJohana naMariya zinya Jakopo. Ntani vakadi hena vamwe ava va kere po, nawo kwa tanterere vapositoli yininke eyi.
11 Nye eyi va va tanterere, kwawo kwa monekere ngwendi yikavauka tupu, kapi va pulire eyi va va tanterere vakadi.
12 Nye Peturusa ta katuka a dukire kontoko,* apa ga nokerere mo, ta mono mo tupu makehe gelike. Ta tengura, age ana tetuka kweyi ya horokere.
13 Nye mezuva lyoolyo, mouvali wawo tava zi komukunda gedina Emausi, ogu gwa likara naJerusarema nokilometa dokusika poyiha 11,
14 awo kwa zogerere kuhamena yininke nayinye eyi ya horokere.
15 Ngomu va zogerere yininke eyi, Jesus ta va hedere a gende kumwe nawo,
16 va mu mwene nye kapi va mu dimbwilire.
17 Age ta va pura asi: “Yisinke eyi muna kulipatana?” Tava sikama, awo vana guwu.
18 Kiliyopasa ta mu limburura asi: “Ove mugenda moJerusarema gokudira kudiva* eyi ka yi horokere mo mazuva aga ndi?”
19 Age ta va pura asi: “Yininke musinke?” Awo tava mu limburura asi: “Eyi ka yi horokerere Jesus goMunasareta ogu ga kere muporofete gononkondo moyirugana nomononkango komeho zaKarunga nokovantu navenye,
20 nomu vapristeli wovanene novapangeli vetu va mu geve va ka mu dipage pokumupampara kositji.
21 Nye ose kwa huguvarere asi mugara ogu yige nga ya zowora Israeli. Ano kugusa ko eyi, eli kuna kara ezuva lyautatu kutunda apa ka yi horokere eyi.
22 Ntani hena, vakadi vamwe kava ya tu tetukisire, morwa apa kava menekerere kontoko,*
23 kapi kava ka gwene simpu sendi ntani kava ya tente asi kava ka mwene vaengeli ava kava va tanterere asi muzuni.
24 Makura vamwe vetu yipo kava zire kontoko,* nawo kava ka yi gwene moomu kava tente vakadi, kapi kava ka mu gwene mo.”
25 Age ta va tantere asi: “Magova one, wonomutjima dokudira kupura usimbu yininke nayinye eyi va uyunga vaporofete!
26 Nani Kristusa kapi ga hepa kupita momaudigu aga yipo a ka hwilire mouyerere wendi ndi?”
27 Age kwa va fatwilire yininke nayinye eyi ya kara moMatjangwa yoku mu hamena kutundilira kwaMosesa dogoro nokoVaporofete navenye.
28 Konyima, tava ya siki pepi nomukunda ogu va tembe, age makura ta ninki ngwendi ta va piti komeho.
29 Nye awo tava mu likwambere a kare nawo pokutanta asi: “Kara nose morwa lina toko.” Makura ta kara nawo.
30 Awo kuna hingire kositafura, ta gusa mboroto, ta kanderere, ta zi bamagura noku zi va pa.
31 Meho gawo taga mahuka, makura tava mu dimburura, nye age ta dongonoka po pwawo.
32 Tava litantere vene navene asi: “Nonkango dendi kuna tu gumu komutjima apa ana tu fatwilire monzira Matjangwa.”
33 Poopo ngoso, tava katuka va tengure koJerusarema, tava ka gwana ava murongo nagumwe nava va pongere kumwe nawo
34 ava va tente asi: “Yosili, Hompa ka va mu vhumbwire ntani ka monekerere Simoni!”
35 Awo tava simwitire eyi ya va horokerere monzira ntani nomu ga lihorwere kwawo pokubamagura mboroto.
36 Awo simpe kuna kuuyunga yininke eyi, age ta sikama mokatji kawo nokutanta asi: “Mbili zi kare none.”
37 Nye morwa woma kwa va kwete, tava gazara asi kuna kumona muengeli.*
38 Ta va tantere asi: “Morwasinke muna karere nowoma, ntani morwasinke muna karere nomasinganyeko monomutjima deni?
39 Tareni mawoko nonompadi dange, nyame ogu, kwateni nge mu mone, yeeyi muengeli* kapi ga kara nonyama noyisupa ngomu muna kumona nge.”
40 Apa ga uyungire eyi, ta va likida mawoko nonompadi dendi.
41 Nye apa va dilire kuyipura morwa va hefe ntani va tetukire, age ta va pura asi: “Muna kara ko neyi yokulya ndi?”
42 Awo tava mu pe mfi zokudosa,
43 age ta zi gusa ta zi li awo kuna kutara.
44 Makura ta va tantere asi: “Edi yido nonkango dange na mu tanterere apa na kere none asi, nayinye eyi va tjanga kuhamena nge moVeta zaMosesa nomomatjango goVaporofete nomoMapisarome ya hepa kusika mo.”
45 Makura ta va vatere va kwate nawa egano Matjangwa,
46 ta va tantere asi: “Eyi yiyo va tjanga asi Kristusa nga hepa ntani ngava mu vhumbura koufe mezuva lyautatu,
47 mbudi ezi asi vantu va litezurure va va gusire po nonzo dawo, ngava zi divisa medina lyendi kutundilira moJerusarema dogoro konomuhoko nadinye.
48 One nyone nombangi doyininke eyi.
49 Tareni, ame ngani ka mu tumina eyi va tumbwidira Otate. Kareni moJerusarema dogoro noku ngomu gwana nonkondo dokutunda meguru.”
50 Age makura ta va twara dogoro koBetani, ta zerura mawoko gendi a va tungike.
51 Ha ga za mokuvatungika, Karunga ta mu gusa po a mu tware meguru.
52 Awo tava mu nyongamene* makura tava tengura koJerusarema awo vana hafa unene.
53 Nkenye ezuva, ngava kara montembeli va hamberere Karunga.
Nonkango dokonhi
^ Ezuva eli atu tumbura asi Sondaha, koVajuda alyo kwa kere ezuva lyokuhova lyomosivike.
^ Ndi “keyendo.”
^ Ndi “keyendo.”
^ Ndi “keyendo.”
^ Ndi “keyendo.”
^ Ndi nampo asi “Nyovelike mugenda moJerusarema gokudira kudiva?”
^ Ndi “keyendo.”
^ Ndi “keyendo.”
^ MoRugereka asi “mpepo.”
^ MoRugereka asi “mpepo.”
^ Ndi “tongamene.”
