Buke zaRukasa 3:1-38
3 Momvhura 15 zepangero lyaTibeliusi, hompa gwaRoma, age Piratusa mupangeli gwaJudeya, ano Herodesa* hompa gwaGalireya, mumbyendi Filipusa mupangeli gwaItureya naTarekonitusa, ano Lisaniya mupangeli gwaAbirene,
2 momazuva gomupristeli gomunene Anasi naKayifasa, yipo Karunga ga pere mbudi Johanesa, munwaSakaliya momburundu.
3 Age nga zi monomukunda nadinye daJorodana a zuvhise asi vantu va litezurure, va va kuhwe yipo va va dongwenene po nonzo dawo,
4 moomu va yi tjanga mobuke zomuporofete Jesaya asi: “Ezwi lyagumwe kuna kuzigira momburundu asi: ‘Wapaikireni Jehova nzira, vyukiseni nonzira dendi.
5 Nkenye edamenena va li fofere, ano nkenye ndundu nokandundugona va yi hetakanese, nonzira dokupenga va di vyukise, ano nonzira doyingurumanya va di wapeke,
6 monkedi ezi, vantu navenye ngava mona omu Karunga nga gava ezoworo.’”
7 Makura ta tantere vantu ava va wizire kwendi a ya va kuhwe asi: “One vana wonombaroka, yilye ogu ana mu tantere mu henduke ehandu lyenene lyaKarunga eli lina kuwiza?
8 Nsene yimo ngoso, yimeni nye yiyimwa eyi ayi likida elitezururo. Mwa ha tanta asi ‘ose guhyetu Abirahamu.’ Nye ame tani mu tantere asi Karunga kwa kara nononkondo dokuninka mamanya aga ga kare vana vaAbirahamu.
9 Ekuva nare vana li tura konondandani dositji. Nkenye sitji esi asi dili kuyima yiyimwa yoyiwa, ngava si teta, tava si zugumine momundiro.”
10 Mbunga makura tazi mu pura asi: “Yisinke nye natu rugana?”
11 Age ta va limburura asi: “Ogu ga kara noyikoverero yivali,* a peko ogu yina dili, ano ogu ana kara neyi yokulya nage ngosikwawo.”
12 Vafutisi womutero nawo kwa wizire a ya va kuhwe, makura tava mu pura asi: “Murongi, yisinke natu rugana?”
13 Age ta va limburura asi: “Walye omu futisa yokupitakana pweyi yomutero.”
14 Vakwayita nawo tava mu pura asi: “Yisinke natu rugana?” Age ta va limburura asi: “Walye omu hakana vantu ndi asi mu va rundire, ayi mu gwanene po eyi omu gwana.”*
15 Vantu kwa kere nendindiro ntani navenye ngava lipura monomutjima dawo kuhamena Johanesa asi: “Kapisi yige nampo Kristusa ogu?”
16 Johanesa ta va limburura asi: “Ame kuna kumukuhwa tupu nomema, nye ngaku wiza ogu ga pita nge mononkondo, ame kapi na wapera kuditura nongodi dononkaku dendi. Age nga ya mu kuhwa nompepo zokupongoka nomundiro.
17 Sizereso mokuwoko kwendi sa kara. Age nga wapeka rupare rwendi nokupongaikira rukokotwa mosihete, ano rungu* nga ru swakerera momundiro ogu agu dili kudima.”
18 Age kwa pukwilire hena vantu nokuvazuvhisira mbudi zongwa.
19 Johanesa kwa pukwilire Herodesa mupangeli gwaGalireya kuhamena Herodiyasa mukadamukurwendi ntani kuhamena yininke nayinye yoyidona eyi ga rugene.
20 Herodesa kwa gwederere ko hena koyirugana yendi yoyidona pokutulisa Johanesa modorongo.
21 Apa va pwire kuvakuhwa vantu navenye, Jesus nage tava mu kuhu. Ngomu ga kanderere, eguru ta li zeguruka,
22 mpepo zokupongoka ta zi hegumukire pomutwe gwendi morupe romputukuwa, ano meguru ta mu tundu ezwi lina kutanta asi: “Ove Munange ogu na hara, wa za nge komutjima.”
23 Apa ga tamekere Jesus sirugana sendi, age nomvhura dendi koyiha 30, vantu ngava mu gazarere asi agemunwaJosefazaEli,
24 Eli zaMatate,Matate zaRevhi,Revhi zaMereki,Mereki zaJanai,Janai zaJosefa,
25 Josefa zaMatatiya,Matatiya zaAmosa,Amosa zaNahumu,Nahumu zaEsili,Esili zaNagayi,
26 Nagayi zaMati,Mati zaMatatiya,Matatiya zaSemeyi,Semeyi zaJoseke,Joseke zaJoda,
27 Joda zaJowanani,Jowanani zaResa,Resa zaSerubabeli,Serubabeli zaSeyalitiyeli,Seyalitiyeli zaNeli,
28 Neli zaMereki,Mereki zaAdi,Adi zaKosama,Kosama zaElimodamu,Elimodamu zaEra,
29 Era zaJesus,Jesus zaEliyesere,Eliyesere zaJolimu,Jolimu zaMatate,Matate zaRevhi,
30 Revhi zaSimiyoni,Simiyoni zaJudasa,Judasa zaJosefa,Josefa zaJonamu,Jonamu zaEliyakimu,
31 Eliyakimu zaMeleya,Meleya zaMena,Mena zaMatata,Matata zaNatana,Natana zaNdafita,
32 Ndafita zaIsayi,Isayi zaObedi,Obedi zaBowasa,Bowasa zaSalimoni,Salimoni zaNasoni,
33 Nasoni zaAminadabu,Aminadabu zaAreni,Areni zaHesironi,Hesironi zaPeresi,Peresi zaJuda,
34 Juda zaJakopo,Jakopo zaIsaka,Isaka zaAbirahamu,Abirahamu zaTera,Tera zaNahoro,
35 Nahoro zaSerugi,Serugi zaReu,Reu zaPareki,Pareki zaEbere,Ebere zaSera,
36 Sera zaKainani,Kainani zaArupakesadi,Arupakesadi zaSema,Sema zaNowa,Nowa zaRameki,
37 Rameki zaMetusera,Metusera zaHenoka,Henoka zaJaredi,Jaredi zaMaharareliMaharareli zaKainani,
38 Kainani zaEnosi,Enosi zaSete,Sete zaAdamu,Adamu zaKarunga.
Nonkango dokonhi
^ Ndi “nosikoverero simwe hena.”
^ Ndi “mfeto.”
^ Yininke eyi ayi kukumuka komahangu apa ava ga zere.
