Buke zaRukasa 4:1-44
4 Jesus kwa tundire koJorodana, age ana zura mpepo zokupongoka, makura tazi mu twara momburundu
2 age kwa ka kere mo mazuva 40, makura Muzonaguli ta mu heteke. Momazuva nagenye ogo, kwato eyi ga lire, ano konyima zomazuva ogo, tazi mu kwata nzara.
3 Muzonaguli makura ta mu tantere asi: “Nsene asi ove munwaKarunga, tantera emanya eli li kare mboroto.”
4 Nye Jesus ta mu limburura asi: “Kwa tjanga asi ‘muntu kapi a paruka komboroto zelike.’”
5 Poopo ngoso, Muzonaguli ta mu twara hena kondundu zonde ta ka mu likida mapangero nagenye gomouzuni.
6 Muzonaguli makura ta mu tantere asi: “Tani ku pe nonkondo nadinye edi nomauwa nagenye aga, yeeyi ayo kwa yi pa nge ni yi gave kwankenye ogu nina hara.
7 Ano nsene o twa nongoro o karere nge, nayinye ngano tani yi ku pe.”
8 Jesus ta mu limburura asi: “Kwa tjanga asi ‘o tongamene Jehova Karunga goge oku to mu karere gelike makura.’”
9 Kutunda opo, ta mu twara hena koJerusarema, ta ka mu tura koruhungu* rontembeli, ta mu tantere asi: “Nsene asi ove munwaKarunga, vatukira pevhu,
10 yeeyi kwa tjanga asi: ‘Age nga tantera vaengeli vendi va ku kaure,’
11 ntani asi: ‘Ngava ku simbira pomawoko gawo yipo mpadi zoge zi dire kupunduka kemanya.’”
12 Jesus makura ta mu limburura asi: “Kwa tanta asi: ‘Walye o heteke Jehova, Karunga goge.’”
13 Muzonaguli apa ga mene kumuheteka, ta tundu po tanko pwendi, a ka ndindire siruwo sapeke souhunga.
14 Jesus makura ta tengura koGalireya nononkondo dompepo zokupongoka. Ano mbudi zokuhamena yirugana yendi yoyiwa tazi lihanene monomukunda nadinye.
15 Ta tameke hena kuvaronga monosinagoge* dawo, vantu navenye kwa mu fumadekere.
16 Makura ta zi koNasareta oku ga kulira, ano moomu ga yika kuyirugana mEsabata, ta hwilire mosinagoge, ta sikama a rese.
17 Tava mu pe bukegango zomuporofete Jesaya, apa ga zi gangwinine ta gwana apa va tjanga nonkango edi asi:
18 “Mpepo zaJehova pozili pwange, morwa age kwa gwaveka nge ni divise mbudi zongwa kovahepwe. Age kwa tuma nge ni udisire nonkwate emanguruko, ano vatwiku emahuko, ntani ni ya mangurure ava va kara moruhepo,
19 ni ya divise asi siruwo sina siki yipo Jehova a parure vantu vendi.”
20 Apa ga mene, ta ganga bukegango, ta zi gava komukareli, makura ta zi ta ka hingira, awo vantu ava va kere mosinagoge, ha va nwikira meho gawo kwendi.
21 Age makura ta va tantere asi: “Naina etjangwa eli muna zuvhu, lina siki mo.”
22 Navenye kwa mu pandadekere ntani kwa tetukire kononkango donongwa edi ga uyungire, makura tava tanta asi: “Nani kapisi yige munwaJosefa ogu?”
23 Age makura ta va tantere asi: “One ngomu tantera nge sisewe esi asi: ‘Ndokotora, liverura nyamoge. Yininke eyi wa rugana moKaperenaumu, yi ruganena hena momukunda omu wa kulira.’”
24 Ta va tantere hena asi: “Yosili nina kumutantera asi kutupu muporofete ogu ava tambura momukunda omu ga kulira.
25 Nye tani mu tantere asi posiruwo esi ga parukire Eliya, vafisavaya vawo vanzi va kere moIsraeli, mvhura kapi za rokere nomvhura ntatu nomakwedi ntazimwe ntani nzara kwa kere mosirongo nasinye.
26 Nye Eliya kapi va mu tumine ko kovakadi owo, age kwa mu tumine tupu komufisayendi gomoSarefata moSidoni.
27 Ntani hena, nampili ngomu moIsraeli mwa kere vanayingondwe wovanzi, posiruwo esi ga parukire muporofete Elisa, Namani goMusiliya gelike va verwire po.”
28 Ano navenye ava va kere mosinagoge apa va yi zuvhire eyi, tava handuka unene,
29 makura tava katuka va mu tjide mo mositata, tava mu twara keguru lyondundu oku va tungira sitata sawo asi va ka mu zundwire pevhu.
30 Nye age ta piti pokatji kawo, ta ka za.
31 Makura ta gurumuka a ze koKaperenaumu, sitata somoGalireya. Age kwa va rongere mEsabata,
32 awo kwa tetukire monkedi ezi ga va rongere, morwa eyi ga uyungire kwa tundilire kwaKarunga.
33 Mosinagoge mwa kere mugara ogu ga kere nompepo zondona, age kwa zigilire nezwi lyenene asi:
34 “Yisinke tuna kuzono, ove Jesus Munasareta? Ove kuna wizire o ya tu zonagure ndi? Ame na kudiva asi nyove yilye, ove Mupongoki gwaKarunga.”
35 Nye Jesus ta tugumukire mpepo zondona asi: “Mwena, tunda mo momuntu ogo.” Azo makura tazi mu gandere pokatji kawo, makura tazi tundu mo mwendi za hana kumukoresa.
36 Apa va yi mwene tava tetuka makura tava lipura vene navene asi: “Nonkango musinke edi? Age kupangera nompepo donondona di tunde mo movantu makura nado tadi tundu mo!”
37 Makura mbudi zokuhamena kwendi tazi lihanene mosirongo nasinye.
38 Apa ga pwege mosinagoge, ta zi membo lyaSimoni.* Ngumweyi zaSimoni kwa verere unene, makura tava mu pura a mu vatere.
39 Age ta ka sikama pwendi, ta tugumukire uvera, awo makura tau mu tundu. Poopo ngoso, mukadi ta katuka a ka va wapaikire ko nondya.
40 Apa lya gombokere, navenye ava va kere novantu womauvera gokulisiga-siga kwa retere vaveli vawo kwendi. Age kwa va verwire pokuvakambeka mawoko gendi.
41 Nompepo donondona kwa tundire movantu wovanzi oku tadi zigire asi: “Ove MunwaKarunga.” Nye age kwa di tugumukilire ntani kapi ga di pulisilire di uyunge, morwa da mu divire asi yige Kristusa.
42 Ano ezuva lyokukwama ko, ta tundu mo a ze kevega lyomaporeza.* Nye mbunga tazi mu papara, tazi ka mu gwana, tazi mu likwambere asi ga ha tunda po pwawo.
43 Nye age ta va tantere asi: “Na hepa hena kukaudisira mbudi zongwa zoUhompa waKarunga koyitata yapeke, morwa eyi yiyo va tumina nge.”
44 Age makura ta zi a ka udisire monosinagoge domoJudeya.
Nonkango dokonhi
^ Ndi “keguru-guru lyontembeli.”
^ Eli edina limwe hena lyomupositoli Peturusa.
^ Ndi “lya hana vantu.”
