Buke zaRukasa 5:1-39
5 Ezuva limwe, apa Jesus ga sikamene kediva lyaGenesareta,* mbunga kwa liromberere asi zi ka zuvhe nonkango daKarunga.
2 Makura ta mono mawato gavali vana hegeke pezenga, nye vakwati wonomfi awo vana tundu mo, kuna kukuhwa makwe gawo.
3 Ta rondo mowato waSimoni, makura ta mu tantere a u porese po pezenga. Ta hingire, a ronge mbunga age mowato.
4 Apa ga mene kuuyunga, ta tantere Simoni asi: “Twara petondo, makura mu tege makwe geni mu kwate.”
5 Simoni ta mu limburura asi: “Murongi, ose kuna hugu masiku nagenye nye kwato eyi tuna kwata, nye kompangera zoge nani li tegera.”
6 Apa va tegere, tava kwata nomfi dononzi. Makwe gawo dogoro taga hara kutauka.
7 Tava rapa vakwawo ava va kere mowato wapeke va ya va vatere, makura tava ya zwida mawato nagenye, dogoro mawato kuna kuhara kudama.
8 Apa Simoni Peturusa ga yi mwene eyi, ta tu nongoro komeho zaJesus, ta tanta asi: “Tunda po pwange Hompa, morwa ame mugara gononzo.”
9 Morwa nage novakwawo kwa va tetwire kweyi va kwete nomfi dononzi,
10 Jakopo naJohanesa vana vaSebede, vakwawo vaSimoni, nawo kwa tetukire. Nye Jesus ta tantere Simoni asi: “Wa ha tjira. Kutunda apa ngo kwata nye vantu.”
11 Tava hegeke mawato nokusiga nayinye va mu kwame.
12 Apa ga kere mositata simwe, tapa wiza mugara gumwe goyingondwe. Apa ga mwene Jesus makura ta ligandere komeho zendi, ta mu likwambere asi: “Hompa, nsene ono yi panga, kuvhura o verure* nge.”
13 Age makura ta gonyonona kuwoko kwendi, ta mu gumu, ta tanta asi: “Nina yi panga, veruka!” Naruvali si nare yingondwe yina mu tundu.
14 Makura ta mu pangere a dire kukayitantera vantu, ta tanta asi: “Nye zende o ka moneke komupristeli nokukagava nzambo zekuhuro ngamoomu tupu ga yi pangere Mosesa, yi ka kare umbangi kwawo.”
15 Nye mbudi zokumuhamena tazi lihanene nakunye, vantu wovanzi tava ya pongo va mu purakene ntani va ya va verure komauvera gawo.
16 Nye age rorunzi nga zi komavango va dira kutunga vantu a ka kanderere.
17 Ezuva limwe apa ga rongere, Vafalisayi novarongi woVeta ava va tundire konomukunda nadinye daGalireya naJudeya ntani Jerusarema, nawo yipo va kere. Ano nonkondo daJehova dokuverura vaveli, kwa kere mwendi.
18 Makura vagara vamwe tava reta mugara gosirema somondambo, age ana rara pouro, awo kwa hetekere asi va mu hwilide mo yipo va mu tware kwaJesus.
19 Apa ya va limbire kumuhwilida mo morwa mbunga zonene, tava tomona peguru lyonzugo, tava mu hegumwisire pokatji kovantu komeho zaJesus age pouro wendi.
20 Apa ga mwene asi vana kara nepuro, ta tanta asi: “Mugara, nonzo doge vana di ku dongwenene po.”
21 Makura valirongi womatjangwa noVafalisayi tava tameke kugazara monomutjima dawo asi: “Muntu musinke ogu a swaura Karunga? Kweli ogu a dongwenene po nonzo ga hana asi Karunga ndi?”
22 Nye Jesus ga divire eyi va gazarere, makura ta va limburura asi: “Morwasinke muna kugazarera ngoso?
23 Yipi youreru po, yokuuyunga asi ‘nonzo doge vana di ku dongwenene po,’ ndi asi ‘katuka o gende’?
24 Nye mokuninka asi mu dive asi MunwaMuntu ga kara nononkondo dokudongonona po nonzo pevhu—” makura ta tantere muntu gosirema asi: “Tani ku tantere asi katuka, damuna uro woge o ze kembo.”
25 Poopo ngoso, ta katuka awo kuna kutara, ta damuna uro wendi, ta ka za kembo lyendi oku ta hamberere Karunga.
26 Navenye kwa tetukire unene, makura tava tameke kuhamberera Karunga asi: “Tuna mono yitetu yoyinene naina!”
27 Ya pwa oyo, ta pwaga mo a ka ze, ano apa ga mwene Revhi* mufutisi gomutero age ana hingire pomberewa zomutero, makura ta mu tantere asi: “Kara murongwa gwange.”
28 Gwina makura ta sigi nayinye, ta katuka a mu kwame.
29 Revhi makura ta mu ruganene sipito membo lyendi, ano vafutisi womutero wovanzi nawo yipo va kere novantu vapeke.
30 Apa va yi mwene eyi Vafalisayi novalirongi womatjangwa, tava vhungutire varongwa vendi asi: “Morwasinke omu lire oku tomu nu novafutisi womutero novananzo?”
31 Jesus ta va tantere asi: “Vakanguki kapi va hepa ndokotora, vaveli yiwo va mu hepa.
32 Ame kwa wizira vananzo yipo va litezurure, nye kapisi vahungami.”
33 Tava mu tantere asi: “Varongwa vaJohanesa nava woVafalisayi kudilira nokukanderera, nye woge awo kulya nokunwa.”
34 Jesus ta va limburura asi: “Kuvhura o ninke vakwawo womukwali va dilire age nawo ana kara ndi?
35 Nye mazuva ngaga wiza apa mukwali ngava mu gusa po, ntani nye ngava dilira momazuva ogo.”
36 Age kwa va tanterere hena sifanekeso esi asi: “Kwato ogu a tete sivando posikoverero sosipe, a si honzere posikoverero sosikurukuru. Nsene a yi rugana sivando sosipe tasi zomonoka po ntani kapi nasi liza nosikoverero sosikurukuru.
37 Ntani hena, kwato ogu a dwire vhinyu zompe monompunda* dononkurunkuru. Nsene a yi rugana, vhinyu zompe tazi tomona nompunda odo makura tazi tjika mo ano nompunda tadi zonauka.
38 Nye vhinyu zompe va hepa kuzidwira monompunda donompe.
39 Kwato ogu a nu vhinyu zonkurunkuru na hara hena kunwa zompe morwa na tanta asi ‘zonkurunkuru ngwa.’”
Nonkango dokonhi
^ Kwa tamba Efuta lyaGalireya.
^ MoRugereka asi “kukuhura.”
^ Eli edina limwe lyaMateusa.
