Buke zaRukasa 7:1-50
7 Apa ga mene kuuyunga novantu, ta zi moKaperenaumu.
2 Mukareli gomupitisili govakwayita efere ogu ga here po unene, kwa karerere mokufa morwa kwa verere unene.
3 Apa ga zuvhire kuhamena Jesus, ta tumu vakurona vamwe woVajuda va ka mu ta tantere a wize a ya verure mukareli gwendi.
4 Tava wiza kwaJesus nokumulikwambera asi: “Yina mu fire yokumuverura ove,
5 yeeyi age kwa here unene muhoko gwetu yiyo ga tu dikilire sinagoge.”
6 Jesus makura ta zi kumwe nawo. Nye tupu ga sikire pepi nembo, mupitisili govakwayita ta tumu vakwawo va ka mu tantere asi: “Hompa, kapisi hepero o wize, yeeyi ove kapi wa wapera kuhwilira membo lyange.
7 Eyi yiyo nye nina dilire kuwiza koge. Nye uyunga tupu nkango, makura mukareli gwange ta veruka.
8 Yeeyi name kwa kara mepangero lyomuntu ntani name na kara novakwayita ava ani pangere, ano nsene ni tantera gumwe povakwayita vange asi ‘zende,’ ta zi, ano mukwawo asi ‘wiza,’ ta wiza, ano nsene ni ninka mukareli gwange asi ‘rugana esi,’ ta si rugana.”
9 Apa Jesus ga yi zuvhire eyi, tayi mu tetura, ta pirukire mbunga zovantu ava va mu kweme, ta va tantere asi: “Tani mu tantere asi nampili moIsraeli moomu kapi na gwana mo muntu gepuro lyenene ngwendi gogu.”
10 Apa va tengwire kembo ava va tumine, ta va ya gwana mukareli age ana veruka.
11 Kutunda opo, ta zi kositata sedina Nayini, ano varongwa vendi nombunga zonene kwa zire nage.
12 Apa ga sikire pepi nevero lyositata, ta mono mugara gokufa vana simbi, gelike a huru mezimo lyozina. Ozina hena kwa kere mufisayendi. Mbunga zonene zomositata kwa mu sindikilire ko.
13 Apa Hompa ga mwene mufisayendi, ta mu fire nkenda, ta mu tantere asi: “Wa ha lira.”
14 Age ta hedere ava va simbire simpu, ta kwata kosininke esi va simbilire simpu, awo tava sikama. Makura ta tanta asi: “Mugara, tani kutantere asi pinduka!”
15 Nakufa ta pinduka, ta tameke kuuyunga, Jesus makura ta mu gava kozina.
16 Navenye tau va kwata woma, makura tava tameke kuhamberera Karunga pokutanta asi: “Muporofete gomunene ana moneka mokatji ketu,” ntani “Karunga ana fire nkenda vantu vendi.”
17 Mbudi ezi zokumuhamena tazi lihanene moJudeya nazinye ntani monomukunda nadinye dopopepi.
18 Varongwa vaJohanesa kwa mu tanterere yihorokwa nayinye eyi.
19 Johanesa makura ta zigida varongwa vendi vavali, ta va tumu kwaHompa va ka mu pure asi: “Nyove ogu va tanta asi ngo wiza ndi tu ndindire ko gwapeke?”
20 Apa va ya sikire kwendi, tava mu tantere asi: “Johanesa Mukuhwi kuna tu tumu tu ya ku pure asi: ‘Nyove ogu va tanta asi ngo wiza ndi tu ndindire gwapeke?’”
21 Poopo ngoso, ta verura vantu wovanzi womauvera gokulisiga-siga, ta tjida mo nompepo donondona ntani ta mahura meho govatwiku wovanzi.
22 Age ta va limburura asi: “Zendeni mu ka tantere Johanesa eyi muna mono neyi muna zuvhu. Vatwiku kuna kumona, yirema kuna kugenda, vanayingondwe kuna kuvaverura, yipuru-puru kuna kuzuvha, ano vafe kuna kuvapindura, vahepwe kuna kuvazuvhisira mbudi zongwa.
23 Muntu goruhafo googu a dili kupunduka morwa nyame.”
24 Apa va tengwire ava ga tumine Johanesa, Jesus ta pura mbunga kuhamena Johanesa asi: “Yisinke eyi mwa zililire mu ka tare momburundu, ruu rokulinyunganga kompepo ndi?
25 Yinke nye eyi mwa zililire mu ka tare, mugara ogu a dwara yikoverero yondiro?* Ava ava dwara yikoverero yondiro, monombara dovahompa va tunga.
26 Yisinke nye mwa zililire mu ka tare, muporofete ndi? Nhi, ame tani mu tantere asi age kwa pitakana muporofete.
27 Ogu yige ya hamena eyi va tjanga asi: ‘Tara, ame tani tumu ntumi zange komeho zoge, ogu nga ku wapekera nzira zoge.’
28 Tani mu tantere asi kutupu ogu va hampuruka ga pita Johanesa, nye ogu ga nunupa po moUhompa waKarunga yige ga mu pita.”
29 (Apa vafutisi womutero novantu va yi zuvhire eyi, tava yi pura asi Karunga muhungami, morwa Johanesa kwa va kuhwire.
30 Nye Vafalisayi novalirongi womatjangwa kapi va here kukwama mapukururo* gaKarunga morwa Johanesa kapi ga va kuhwire.)
31 “Kosinke nani fanekesa muhoko ogu, yilye gwa fana?
32 Ago kwa lifana novanona ava ava hingire pomarandesero, va zigide vakwawo asi: ‘Ose katu mu sivire po nsiva, nye one kapi muna dana! Tuna mu dimbire po nonsumo domalirankali, nye kapi muna lili.’
33 Mokulifana, apa ga wizire Johanesa Mukuhwi kapi nga li mboroto ndi a nwe vhinyu, nye one ngomu mu ninki asi ‘mpepo zondona za mu kara.’
34 Ano MunwaMuntu eyi ga wiza, age kulya nokunwa, nye one kumuninka asi: ‘Tareni si, mugara gomakurulya nomakurunwa, age kwa likwata ukwawo novafutisi womutero novananzo.’
35 Nye yininke youhunga eyi a rugana muntu kulikida asi age munongo.”
36 Mufalisayi gumwe kwa zigidire Jesus asi va ka lye nendi. Age ta hwilire membo lyoMufalisayi, ta hingire va lye.
37 Mukadi ogu ga divikwire mositata asi munanzo, kwa zuvhire asi Jesus kuna kulya membo lyoMufalisayi yipo ga wizire nosipako semanya omu mwa kere magadi gedumba lyewa.
38 Age makura ta gwire konompadi dendi, ta lili, mahodi gendi taga woreke nompadi daJesus, ta di kokota nonohuki dendi. Makura ta di ncumita, ta di kwita magadi aga ga simbire.
39 Mufalisayi ogu ga mu zigidire apa ga yi mwene, ta lipura asi: “Ngano mugara ogu sili muporofete, ngano ana yi diva asi mukadi musinke ogu ana kumukwata, age mukadi gononzo.”
40 Nye Jesus ta mu tantere asi: “Simoni,* koyili nina hara kukutantera.” Age ta limburura asi: “Murongi, tanta tupu.”
41 “Vagara vavali kwa korotere yimaliwa komugara gumwe, gumwe kwa korotere madenali* 500 ano mukwawo 50.
42 Apa va dilire kuvhura kumufuta, age makura ta va gusire po. Yilye pokatji kowo vavali, na mu hara po unene?”
43 Simoni ta mu limburura asi: “Googu ga dongwenene po makongo gomanzi.” Age ta mu limburura asi: “Ono pangura mouhunga.”
44 Age makura ta piruka a tare komukadi, ta tantere Simoni asi: “Ono mono ogu mukadi? Apa nina hwilire monzugo zoge kapi ono pe nge mema ni kuhwe nompadi dange. Nye ogu mukadi kuna kuhu nompadi dange nomahodi gendi nokudikokota nonohuki dendi.
45 Ove kapi ono ncumita nge, nye ogu mukadi tupu ana wiza, kapi ana hageke kuncumita nompadi dange.
46 Kapi ono tjire magadi komutwe gwange, nye ogu mukadi kuna tjire magadi gedumba lyewa konompadi dange.
47 Tani kutantere asi morwa eyi, nonzo dendi nampili di kare nonzi,* vana di mu dongwenene po, morwa eharo lyendi enene. Nye ogu ava dongwenene po nakauke, eharo lyendi enunu.”
48 Makura ta tantere mukadi asi: “Nonzo doge vana di kudongwenene po.”
49 Ava va kere positafura nage tava lipura vene navene asi: “Mugara musinke ogu gokuvhura kudongonona po nononzo deedi?”
50 Nye age ta tantere mukadi asi: “Epuro lyoge lina kuparura, zende mombili.”
Nonkango dokonhi
^ Ndi “yikoverero yokurerema.”
^ Ndi “mavyukiso.”
^ Ogu kuna kara Mufalisayi ogu ga zigidire Jesus.
^ Yimaliwa yosisiliveli yoVaroma.
^ Ndi “nonene.”
