Buke zaRukasa 8:1-56
-
Vakadi tava zi naJesus (1-3)
-
Sifanekeso somukuni (4-8)
-
Eyi Jesus ga ruganesere yifanekeso (9, 10)
-
Sifanekeso somukuni tava si faturura (11-15)
-
Ramba noku zi kudumika si (16-18)
-
Ozina vaJesus novamumbya vendi (19-21)
-
Jesus ta mwenekeda ekundungu (22-25)
-
Jesus ta tjidire nompepo donondona moyinguru (26-39)
-
MunwaJairusa gomukadona; mukadi ta kwata yikoverero yaJesus yokontunda (40-56)
8 Kutunda opo, ta zi tunda sitata zende sitata ntani tunda mukunda zende mukunda, a zuvhise mbudi zongwa zoUhompa waKarunga. Ano ava murongo navavali kwa zire nendi,
2 ntani kumwe novakadi ava ga verwire konompepo donondona nokomauvera, awo kwa kere: Mariya ogu ngava tumbura asi Mangadarena, ogu da tundire nompepo donondona ntambali;
3 naJohana mukadaKusa erenga lyaHerodesa naSusana ntani novakadi vamwe hena ava ngava mu vatere noyiweka yawo.
4 Apa mbunga za pongere kumwe nava va mu kweme tunda sitata zende sitata, ta uyunga moyifanekeso asi:
5 “Mukuni gumwe kwa zire a ka kune mbuto zendi. Ha ga za mokukuna, mbuto zimwe tazi gwire konontere donzira makura tava zi lyatanga, ano yidira tayi zi li po.
6 Zimwe kwa gwililire pomamanya, konyima zokukura, tazi kukuta morwa kapi pwa kere mema.
7 Ano mbuto zimwe hena tazi gwire momega, ano mega aga ga kulire kumwe nazo taga zi kondere zi dire kukura.
8 Nye ezi zimwe tazi gwire pevhu lyewa, konyima zokukura, tazi reta yiyimwa 100 kupitakana pwanare.” Apa ga mene kuuyunga eyi, ta ziguruka kuuyunga asi: “Ogu ga kara nomatwi gokuzuvha, a zuvhe.”
9 Nye varongwa vendi tava mu pura eyi asi tanta sifanekeso oso.
10 Makura age ta va limburura asi: “One Karunga ga mu vatera mu kwate egano yihoramo yoUhompa wendi, nye wopeke kuvauyungira moyifanekeso, yeeyi nomeho ngava tara, nye kapi ngava yi mona, nomatwi ngava yi zuvha, nye kapi ngava yi kwata egano.
11 Eyi yiyo asi tanta sifanekeso: Mbuto kuna kara nonkango daKarunga.
12 Mbuto ezi za gwililire konzira, kuna kara ava ava zuvhu nonkango daKarunga, makura Muzonaguli ta ya gusa nonkango odo momutjima gwawo yipo va dire kupura ngava dire kuparuka.
13 Ezi za gwililire pomamanya, kuna kara ava ava zuvhu nonkango daKarunga, tava di tambura noruhafo nye kapi va kara nonondandani. Awo kupura tupu pokaruwogona, nye posiruwo somaheteko, tava hageke.
14 Ano ezi za gwililire momega, kuna kara ava ava purakene nonkango, nye morwa yinka youzuni ou nedowo lyemona nomadowo goyininke yapeke, tayi dipaga nonkango edi va zuvha, makura kapi tava reta hena mbuto.
15 Nye ezi za gwililire pevhu lyewa, kuna kara ava ava zuvhu nonkango daKarunga, tava di tambura nokuyima yiyimwa nedidimiko.”
16 “Kwato muntu ogu a hwameke ramba, a zi kudumike sipako ndi a zi ture konhi zombete, nye kuzitura mouzweko woramba yipo va zi mone ava vana kuhwilira mo.
17 Yeeyi kutupu esi sa vanda ngasi dira kuhoroka ndi esi va horeka ngasi dira kuwiza poruzera.
18 Yipo nye, takameseni mokupurakena kweni, yeeyi ogu ga kara noyuma, ngava mu gwederera ko, ano ogu ga dira yuma, ngava mu gusa neyi a gazara asi yiyo ga kara nayo.”
19 Ozina novamumbya vendi kwa wizire kwendi, nye kapi va vhulire kumuhedera morwa mbunga zovantu.
20 Makura tava mu tantere asi: “Onyoko novamumbya woge ponze vana kara, vana hara kukumona.”
21 Age ta va limburura asi: “Onane novamumbya vange, vaava ava zuvhu nonkango daKarunga noku di sikisa mo.”
22 Ezuva limwe, nage novarongwa vendi kwa rondere mowato, makura ta va tantere asi: “Tu ruteni mesinya mwina lyediva.” Makura tava rutu.
23 Nye ngomu va rutire, age ta ponyoka. Va tara ko emukundungu tali tameke kupepa mediva, wato tau tameke kuzura mema makura tava kara mosiponga.
24 Awo makura tava mu zire va ka mu pindure, tava tanta asi: “Murongi, Murongi, tatu fu!” Age ta pinduka, ta tugumukire ekundungu nomankupi, ayo makura tayi litura.
25 Makura age ta va pura asi: “Morwasinke muna dilire kupura asi Karunga natu vatera?” Nye awo kwa kere nowoma ntani kwa tetukire, tava lipura vene navene asi: “Yilye mwene ogu no? Yeeyi age kupangera ekundungu nomankupi gaaga, makura tayi mu limburukwa.”
26 Tava ka sika momukunda goVagerasa ogu gwa livyuka naGalireya.
27 Jesus apa ga humburukire mowato, ta gwanekere nomugara ogu ga kere nonompepo donondona. Age kwa kere muhere-here siruwo songandi ntani kapi ga tungire membo nye kwa tungire monontoko.*
28 Apa ga mwene Jesus, ta ligandere komeho zendi, ta zigire unene asi: “Yisinke nina kuzono, ove Jesus MunwaKarunga gekeguru-guru? Na kanderere, wa ha hepeka nge?”
29 (Yeeyi Jesus kwa pangerere mpepo zondona zi tunde mo momugara ogo. Azo ngazi mu hepeke yikando yoyinzi* ntani nkenye apa ngava mu manga nomauketanga va mu takamese, nye age ngaga ndembagura ntani mpepo zondona ngazi mu ninkisa a ka likarere gelike.)
30 Jesus ta mu pura asi: “Edina lyoge yilye?” Age ta limburura asi: “Mbunga,” yeeyi nompepo donondona nonzi da kere mwendi.
31 Tadi mu likwambere asi ga ha di zugumina mekero.*
32 Pwa kere yinguru yoyinzi eyi ya lire pondundu, makura tadi mu likwambere asi a di pulisire di hwilire moyinguru oyo, age makura tadi pulisire.
33 Nompepo donondona makura tadi tundu momugara ogo, tadi ka hwilira moyinguru, yinguru makura ta yi kunkumukire mediva tayi ka fa komema.
34 Nye apa vasita va mwene eyi ya horokere, tava dukire mositata nokonomukunda dopopepi va ka yi tantere vantu.
35 Vantu makura tava zi va ka tare eyi ya horokere. Tava wiza kwaJesus, tava ya gwana mugara ogu da tundire nompepo donondona, age ana dwara ntani muwaawa, kuna hingire konompadi daJesus, makura tava tukuka.
36 Ava va yi mwene kwa tanterere ko wopeke omu mugara gonompepo donondona va mu verwire.
37 Makura mbunga zonene ezi za tundire momukunda gwaGerasa ta zi tantere Jesus a tunde po pwawo, morwa awo kwa kere nowoma wounene. Age makura ta ka ronda mowato ta ka za.
38 Nye mugara ogu za tundire mpepo zondona kwa mu likwamberere asi a ze nendi nye age ta mu silike nokumutantera asi:
39 “Zende kembo o ka divise eyi ana ku ruganene Karunga.” Age makura ta tengura, nokukatantera vantu womositata nasinye eyi ga mu ruganenene Jesus.
40 Apa Jesus ga ka tengwire momukunda gwaGalireya, mbunga kwa mu tambwire nawa morwa navenye kwa mu ndindilire.
41 Nye mugara gumwe gedina Jairusa ogu nga pitisire mosinagoge, kwa wizire kwendi. Ta gwire konompadi daJesus nokumulikwambera asi a ze nage kembo lyendi,
42 morwa munendi a huru gonomvhura 12 gomukadona, kwa kere pepi nokufa.
Apa Jesus ga zire, mbunga tazi mu kwama oku zina mu paterekeda.
43 Pwa kere mukadi ogu ga kere nouvera wohonde nomvhura 12, ntani kwato ogu ga vhulire kumuverura.
44 Age kwa tundilire konyima makura ta kwata konyerera zosikoverero sendi, poopo ngoso, uvera wendi wohonde tau haga.
45 Jesus makura ta pura asi: “Yilye ogu ka kwata nge?” Navenye apa va patanene, Peturusa makura ta limburura asi: “Murongi, mbunga kuna ku kundurukida ntani zina ku paterekeda.”
46 Nye Jesus ta limburura asi: “Pweli ogu ka kwata nge, morwa nonkondo dina tundu mo mwange.”
47 Mukadi apa ga mwene asi vana mu dimburura, ta ya ligandere komeho zendi oku ta kankama, makura ta tantere mbunga nazinye eyi ga mu guminine ntani nomu ga verukire.
48 Nye age ta mu tantere asi: “Munange, epuro lyoge lina kuverura. Zende mombili.”
49 Age simpe kuna kuuyunga, mugara gumwe gemembo lyaJairusa ta wiza nokutanta asi: “Munoge ana dogoroka, wa ha rorora Murongi.”
50 Apa Jesus ga yi zuvhire eyi, ta mu tantere asi: “Wa ha tjira, kara tupu nepuro, munoge na paruka.”
51 Apa ga ka sikire pembo, kwato ogu ga pulisilire a hwilire monzugo ntudi Peturusa naJohanesa naJakopo ntani vakondi womukadona.
52 Nye vantu navenye kwa lilire oku tava litoona ponturo morwa ruguwo. Age makura tava tantere asi: “Hagekeni kulira, mukadona kapi ana fu nye kuna rara.”
53 Awo makura tava mu zoro sirungu, morwa va yi divire asi ana fu.
54 Nye age ta mu kwata kokuwoko nokumutantera asi: “Mukadona, pinduka!”
55 Age ta kara hena nomwenyo, ta pinduka, makura Jesus ta ninki asi va mu pe ko yokulya.
56 Vakondi vendi kwa hefe unene, kapi va yi pulire, nye Jesus tava tantere asi va ha ka tantera ko muntu eyi yina horoka.
