Buke zaRukasa 9:1-62
-
Varongwa murongo navavali tava va pe mapukururo omu nava ka zuvhisa (1-6)
-
Herodesa tayi mu piyaganeke yokuhamena Jesus (7-9)
-
Jesus ta kutike vantu 5 000 (10-17)
-
Peturusa ta tanta asi yilye Kristusa (18-20)
-
Jesus ta pumbu nomfa dendi (21, 22)
-
Eyi natu rugana mokukwama Jesus (23-27)
-
Jesus ta lisitunuka (28-36)
-
Mumati gompepo zondona tava mu verura (37-43a)
-
Jesus ta pumbu hena nomfa dendi (43b-45)
-
Varongwa tava lipatana asi yilye gomunene po (46-48)
-
Ogu a dili kuturwanesa, kwetu ga hamena (49, 50)
-
Jesus tava mu nyoka momukunda gwaSamaliya (51-56)
-
Omu no kwama Jesus (57-62)
9 Makura ta zigida ava murongo navavali, ta va pe nonkondo dokutjida mo nompepo donondona nokuverura mauvera.
2 Ta va tumu va ka zuvhise kuhamena Uhompa waKarunga ntani nokuverura,
3 ta va tantere asi: “Mwa ha lisimbira yuma morugendo rweni, yi kare asi mpango, ndjato zonondya, mboroto, yimaliwa* ndi yikoverero yivali.*
4 Nkenye omu membo ngomu za, ka kareni moomo dogoro noku ngomu ka tunda mo.
5 Nkenye oku ngava ka nyoka kumutambura, pokupwaga mositata oso, ka kukumuneni mbundu konompadi deni yipo yi kare umbangi kwawo.”
6 Makura tava zi, tunda mukunda zende mukunda va zuvhise mbudi zongwa oku tava verura vaveli.
7 Herodesa* ogu nga pangere mukunda gwaGalireya, apa ga zuvhire eyi ya horokere, tayi mu piyaganeke morwa vamwe kwa uyungire asi Johanesa vana mu pindura koufe,
8 nye vamwe asi Eliya ana moneka, ano vamwe asi gumwe govaporofete vanare yige ana vhumbuka.
9 Herodesa makura ta tanta asi: “Johanesa nyame na mu ninka va mu tete mutwe, yilye nye ogo nina kuzuvha ana kurugana yininke oyo?” Yiyo nye ga harerere kumumona.
10 Vapositoli apa va ka tengwire, tava ya tantere Jesus nayinye eyi va ka rugene. Makura age ta zi kumwe nawo kevega lya hana vantu mositata saBetesaida.
11 Nye mbunga zovantu apa za yi dimbwilire, tazi mu kwama. Age tava tambura nokuvatantera kuhamena Uhompa waKarunga, nokuverura wokuvera.
12 Apa lya tokere ezuva, ava murongo navavali tava mu hedere nokumutantera asi: “Ninka mbunga zi ze monomukunda dopopepi zi ka papare mararo nonondya, morwa evega eli kwato ogu ga tunga mo.”
13 Nye age ta va tantere asi: “Nyone nomu va pa nondya.” Awo ta va mu limburura asi: “Ose kuna kara tupu nonomboroto ntano nonomfi mbali, ntudi nyose natu ka va randera nondya.”
14 Apo kwa kere po vagara wokusika poyiha 5 000. Nye age ta tantere varongwa vendi asi: “Va ninkeni va hingire vantu wokusika poyiha 50 mwankenye kambunga.”
15 Awo makura ta va yi rugana, ta va ninki navenye va hingire.
16 Ta gusa nomboroto odo ntano nonomfi mbali, ta tara keguru makura ta kanderere. Ta di bamagura, ta di pe varongwa vendi va di gavere mbunga.
17 Navenye kwa lire tava kuta, makura varongwa vendi tava pongaike eyi ya hupire po, tava zwida yikumba 12.
18 Konyima zosiruwo, age kuna kukanderera, varongwa tava mu wizire, age makura ta va pura asi: “Ngapi omu mbunga azi gazarere nge?”
19 Awo tava mu limburura asi: “Johanesa Mukuhwi, nye vamwe asi Eliya ano vamwe kutanta asi gumwe govaporofete vanare.”
20 Ano age ta va pura asi: “One omu omu gazarere nge asi nyame yilye?” Peturusa ta limburura asi: “Kristusa ogu ga tuma Karunga.”
21 Age ta va pamperekeda asi va ha ka yi tantera vantu,
22 ta va tantere hena asi: “MunwaMuntu nga pita momahepeko gomanzi ntani masimbi novapristeli wovanene novalirongi womatjangwa ngava mu nyoka nokumudipaga, nye mezuva lyautatu ngava mu pindura koufe.”
23 Makura ta tantere navenye asi: “Nkenye ogu ga hara kukwama nge, ga ha litura mwene muhowo, nye ga hepa kulikambeka sitji* sendi nkenye ezuva, a twikire kukwama nge.
24 Yeeyi ogu ga hara kuparura mwenyo* gwendi, nga gu zumbanesa, ano ogu a zumbanesa mwenyo* gwendi morwa kukara murongwa gwange, yige nga gu gwana.
25 Yisinke ayi kwafa muntu yokuweka uzuni mudima, nye mwenyo* gwendi a gu zumbanese ndi a gu ture mosiponga?
26 Yeeyi nkenye ogu a lifu nge nomuga nononkango dange, MunwaMuntu nage nga ka mu lifa nomuga apa nga wiza mouyerere wendi nou woGuhwe ntani nou wovaengeli wokupongoka.
27 Yosili nina kumutantera asi poveli vamwe apa tuna sikama ngesi, ava ngava dira kufa, awo va hana kumona Uhompa waKarunga.”
28 Koyiha yomazuva ntantatu konyima zapa ga uyungire nonkango edi, ta zi kumwe naPeturusa naJohanesa ntani Jakopo kondundu a ka kanderere.
29 Ha ga za mokukanderera, sipara sendi tasi litjindji ano yikoverero yendi tayi zere tooto.
30 Va tara ko, vagara vavali vana kuzogera nendi, awo kwa kere Mosesa naEliya.
31 Awo kwa monekere mosite sokupaima unene, makura tava tameke kuzogera asi Jesus nga tunda po ntani asi eyi ngayi ka sikilira mo moJerusarema.
32 Peturusa nava va kere nage tava gwire monompofu, nye apa va pindukire, tava mono uyerere wendi novagara vavali ava va sikeme nendi.
33 Apa va tundire po va ka ze, Peturusa ta pura Jesus asi: “Murongi, yina wapa kweyi tuna kara po. Ninka tu tunge nondunda ntatu, zimwe zoge, zimwe zaMosesa, ano ezi nkwawo zaEliya.” Kapi ga divire asi yinke ana kuuyunga.
34 Age simpe kuna kuuyunga yininke oyo, eremo makura tali wiza, tali va kudumike.* Apa lya va kudumikire eremo, woma tau va kwata.
35 Meremo olyo makura tamu tundu ezwi lina kutanta asi: “Ogu yige Munange ogu na horowora. Omu mu limburukwe.”
36 Ngomu lya zuvhikire ezwi, va tara ko Jesus gelike po. Nye awo kwa mwenene teete, kapi va tanterere ko vantu eyi va mwene.
37 Ezuva eli lya kweme ko, apa va tundire kondundu, mbunga zonene tazi gwanekere nendi.
38 Mugara gumwe mombunga ta zigire asi: “Murongi, na kanderere, fira nkenda munange, yeeyi gelike a huru na kara nendi.
39 Mpepo zondona azi mu kwata, ta takuma, tazi mu nyunganga dogoro ta tundu ntutu mokana ntani azo kumusiga dogoro zina mu remeke.
40 Na likwamberere varongwa woge asi va zi tjide mo, nye kapi va yi vhulire.”
41 Jesus makura ta limburura asi: “Vantu one wokudira epuro ava mwa puka, siruwo sokuhura kupi ngani kara none nokumulididimikira? Retera nge munoge oku.”
42 Nye apa ga mu hederere, mpepo zondona tazi mu gandere pevhu oku tazi mu nyunganga nononkondo. Nye Jesus ta tugumukire ozo mpepo zondona, ta verura ogo mumati makura ta mu gava koguhwe.
43 Navenye kwa tetukire kounankondo waKarunga.
Ha va hokwa mokutetuka koyininke nayinye eyi ga rugene, age ta tantere varongwa vendi asi:
44 “Purakeneni nawa nokudiworoka nonkango edi, MunwaMuntu ngava mu gava momawoko gononkore dendi.”
45 Nye awo kapi va kwete egano eyi ga uyungire. Ayo kwa yi va horekerere asi va ha yi kwata egano, ntani va tjilire kumupura eyi ga tembe.
46 Tava tameke kulipatana asi yilye munene po pokatji kawo.
47 Jesus ta dimburura asi yiyo vana kugazara, makura ta gusa munonagona, ta mu ninki a sikame pepi nendi,
48 ta va tantere asi: “Ogu a tambura munonagona ogu medina lyange, nyame a tambura, ano ogu a tambura nge, kutambura hena ogu ga tuma nge. Nkenye ogu a linunupike mokatji keni namuvenye yige ga nenepa po.”
49 Johanesa makura ta limburura asi: “Murongi, tuna mono muntu ana kutjida nompepo donondona medina lyoge, makura yiyo tuna hetekere ko kumukava, morwa kapi ga hamena kwetu.”
50 Nye Jesus ta mu limburura asi: “Mwa ha mu silika, yeeyi ogu a dili kumurwanesa, kweni ga hamena.”
51 Apa siruwo saJesus sokuza meguru sa hederere pepi,* yipo ga tokwere kuza koJerusarema.
52 Makura ta tumu nontumi di pite komeho. Ado kwa zire momukunda gwaSamaliya di ka mu wapaikire nayinye.
53 Nye kapi va mu tambwire morwa age kwa tokomenene kuza koJerusarema.
54 Apa varongwa vendi Jakopo naJohanesa va yi mwene eyi, tava mu pura asi: “Hompa ono hara tu hundire mundiro meguru gu ya va hanagure po ndi?”
55 Nye age ta piruka nokuvatugumukira.
56 Makura tava zi komukunda gwapeke.
57 Ngomu va gendere, mugara gumwe ta mu tantere asi: “Ame tani kukwama nkenye oku no za.”
58 Nye Jesus ta mu tantere asi: “Vambanze nomakero gawo, ano yidira nayo noyikorogo yayo, nye MunwaMuntu kapi ga paka oku na sateka mutwe gwendi.”
59 Makura ta tantere gumwe asi: “Kara murongwa gwange.” Age ta mu limburura asi: “Hompa, pulisira nge tanko ni ka horeke otate.”
60 Nye age ta mu tantere asi: “Siga vafe va horeke vafe vakwaawo, nye ove zende o ka zuvhise mbudi zoUhompa waKarunga.”
61 Ano gumwe ta uyunga asi: “Tani kukwama Hompa, nye tanko ni ze ni ka rekere vemembo lyetu.”
62 Jesus ta mu tantere asi: “Kwato muntu ogu ana tameke kupurura nye a tare koyininke yokonyima, ga wapera moUhompa waKarunga.”
Nonkango dokonhi
^ MoRugereka asi “sisiliveli.”
^ Ndi “sikoverero simwe hena.”
^ Ndi “eparu.”
^ Ndi “eparu.”
^ Ndi “eparu.”
^ Ndi “tali va kara keguru.”
^ MoRugereka asi “sa sikire mo.”
