Rutu 1:1-22
1 Posiruwo esi va kere vapanguli moIsraeli, mosirongo ta mu kara erumbu. Mugara gumwe kwa tundire moBeterehema zomoJuda a ze a ka tunge ngomunayirongo momukunda* gwaMowaba. Age kwa zire namukadendi novana vendi vavali wovagara.
2 Mugara ogo edina lyendi Elimereki,* ano mukadendi Naomi* ntani vana vawo wovagara yiwo Mahironi* naKiliyoni.* Awo kwa kere womorudi rwaEfurata ntani kwa tundililire moBeterehema zomoJuda. Awo kwa wizire momukunda gwaMowaba tava ya tungu moomo.
3 Konyima, Elimereki mugara gwaNaomi ta dogoroka, ta mu sigi novana vavali wovagara.
4 Vana vendi wovagara kwa ya kwere vakadi woVamowaba, madina gawo Orupa naRutu. Awo kwa kere momukunda ogo ure wonomvhura murongo.
5 Konyima, Mahironi naKiliyoni nawo tava dogoroka. Naomi ta hupu po gelike ga hana mugara ndi vana vendi vavali.
6 Apa ga zuvhire asi Jehova kuna kutungika vantu vendi pokuvapa nondya,* yipo ga tokwere kudiruka moMowaba novangumweyi zendi.
7 Makura ta diruka novangumweyi zendi vavali. Ngomu va gendere monzira va tengure koJuda,
8 Naomi ta tantere vangumweyi zendi asi: “Tengureni komambo geni mu ka kare novazinya veni. Jehova ngano a mu likide eharo lyenene eli mwa likida nge novagara veni ava va dogoroka.
9 Jehova ngano a mu pe* vagara yipo ngomu kare mombili.”* Makura age tava ncumita, awo tava lili unene.
10 Tava mu likwambere asi: “Hawe, ose tuna hara kuza nove kovantu woge.”
11 Nye Naomi ta va tantere asi: “Vana vange, tengureni. Morwasinke nomu zira name? Kuvhura hena ni rete vana ava ngomu vhura kukwara ndi?
12 Vana vange, tengureni. Zendeni, ame nina kurupa kapi tani vhuru kukwara. Nampili ni gwane mugara masiku ganaina nokureta vana,
13 kuvhura ngomu va ndindire dogoro ngava kure ndi? Yiyo nye ngomu dilira kukwara morwa kuna kuvandindira ndi? Hawe, vana vange, ukaro weni una guvisa nge morwa kuwoko kwaJehova kuna piruka nge.”
14 Awo makura tava lili hena unene, konyima Orupa ta ncumita ngumweyi zendi makura ta tengura, nye Rutu ta kara nangumweyi zendi.
15 Naomi ta tanta asi: “Tara si, mukweni* ana tengura kovantu vendi ntani kovakarunga vendi. Tengura namukweni.”
16 Nye Rutu ta tanta asi: “Wa ha likwambera nge asi ni ku sige o ze nyovelike, yeeyi nkenye oku ngo za name yiko ngani za, oku ngo rara, name yiko ngani rara. Vantu woge nawo ngava kara vange, ntani Karunga goge, Karunga gwange nga kara.
17 Oku ngo ka fira, name yiko ngani ka fira ntani yiko ngava ka vhumbika nge. Ame kapi ngani kusiga ntudi nomfa ngadi tu gaununa, Jehova ngano a tengeke nge nsene ni dira kuyisikisa mo.”
18 Apa Naomi ga mwene asi Rutu ana tokora kuza nage, ta hageke kumusilika.
19 Makura tava twikire norugendo rwawo dogoro tava ka sika koBeterehema. Tupu va ka sikire moBeterehema, vantu navenye womositata tava tetuka. Vakadi tava tanta asi: “Naomi ogu?”
20 Age ta limburura vakadi owo asi: “Mwa ha tumbura nge asi Naomi,* tumbureni nge asi Mara,* yeeyi Munankondo nadinye kwa rurupika eparu lyange.
21 Apa na zire, ame kwa kere neyi yoyinzi, nye Jehova yiyo ga ka tengwida nge mawoko-woko. Morwasinke nomu tumbwira nge asi Naomi, mokumona asi Jehova Munankondo nadinye kwa rwanesa nge ntani kwa retera nge udigu?”
22 Yimo nye ngesi ga ka tengwire Naomi komukunda gwaMowaba kumwe nangumweyi zendi goMumowaba Rutu. Awo kwa ya sikire moBeterehema posiruwo esi ava tameke kuteza nombuto.*
Nonkango dokonhi
^ Ndi “momapya.”
^ Kutanta asi “Karunga gwange yige Hompa.”
^ Kutanta asi “ruhafo rwange.”
^ Nampo kwa tunda konkango zoRuhebeli ezi azi tanta asi “kusesupa nonkondo; kuvera.”
^ Kutanta asi “ogu yina kudira kutompoka; ogu ana kusika kehagero.”
^ MoRuhebeli asi “mboroto.”
^ Ndi “a mu pe uhwi.”
^ MoRuhebeli asi “evango lyokupwizumukira.”
^ Ndi “mbusoge.”
^ Kutanta asi “ruhafo rwange.”
^ Kutanta asi “ururu.”
^ Kwa tamba konombuto dokufana ngwendi rukokotwa.
