Rutu 2:1-23
2 Naomi kwa kere nekoro lyamugara gwendi, edina lyendi Bowasa. Age kwa kere ngawo zonene ntani age kwa tundililire mezimo lyaElimereki.
2 Rutu goMumowaba ta tantere Naomi asi: “Pulisira nge ni ze momapya ni ka toragure* eyi vana sigi mo vatezi ava nava ka fira nge nkenda.” Naomi makura ta mu tantere asi: “Zende munange.”
3 Makura ta zi a ka tameke kutoragura mepya monyima zovatezi. Ta ka sika mepya lyaBowasa ogu ga kere ekoro lyaElimereki.
4 Konyima, Bowasa nage ta ya siki a tunde koBeterehema, makura ta tantere vatezi asi: “Jehova a kare none.” Awo tava mu limburura asi: “Jehova a ku tungike.”
5 Bowasa ta pura murugani ogu nga tarere vatezi asi: “Kupi ana tundu ogu mukadi?”
6 Murugani ta limburura asi: “Mukadi ogo kwa tunda komukunda gwaMowaba, age kwa wiza kumwe naNaomi.
7 Age kuna tu pura nsene kuvhura a toragure nombuto edi vana sigi vatezi. Age kuna rugana kutunda ngurangura dogoro ngesi, ntani tupu ana kuhingira momundwire a pwizumuke ko nakauke.”
8 Bowasa ta tantere Rutu asi: “Munange purakena, wa ha za o ka toragure mepya lyapeke ndi o ze kwapeke, kara pepi novarugani vange wovakadi.
9 Va tarera asi mepya musinke vana kuza va ka teze o va kwame. Nina tantere varugani vange wovagara va dire kukudonganesa.* Nsene no zuvha enota, zende o ka nwe moyipako yomema aga vana vheta varugani vange wovagara.”
10 Age ta tu nongoro nokulinyongamena, makura ta tanta asi: “Morwasinke ono kulikidira nge nkenda ntani morwasinke ono kupakerera nge mbili mokumona asi ame munayirongo?”
11 Bowasa ta mu limburura asi: “Va tantera nge nayinye eyi wa ruganena ngumweyi zoge konyima zapa ga dogoroka mugara goge, nomu wa siga oguho nonyoko nosirongo seni, yipo o wize kovantu ava wa dira kudiva.
12 Jehova ngano a ku fute kweyi wa rugana ntani Jehova Karunga goVaisraeli ngano a ku pe mfeto zokuzulilira, yeeyi ove kwa papara uvando kwendi.”*
13 Rutu ta tanta asi: “Hompa gwange, ove kuna kulikida nge nkenda zonene morwa ove kuna kuhengagwida nokukorangeda nge, nampili ngomu na dira kukara mukareli goge.”
14 Apa sa sikire siruwo sokulya, Bowasa ta tantere Rutu asi: “Wiza o ya lye mboroto nokuziverera movhinyu zoururu.” Rutu makura ta ka hingira novatezi. Bowasa ta mu pe mbuto zokukanga, ta li, ta kuta makura ta sigisa po.
15 Apa ga katukire a ka toragure, Bowasa ta tantere varugani vendi wovagara asi: “Mu sigeni a toragure nampili pondambo zonombuto ntani mwa ha mu tekura momudona.
16 Ntani mu sigireni ko nombuto dimwe edi muna kuteza, yipo adi toragure, mwa ha mu ninka a hageke kutoragura.”
17 Rutu ta twikire kutoragura mepya dogoro ngurova. Apa ga mene kuhwaga eyi ga toragwire, ayo kwa sikire koyiha yonokilograma 13.*
18 Makura ta zi nayo mositata, ano ngumweyi zendi ta mono eyi ga ka toragwire. Rutu ta gusa nondya edi ga hupisire po apa ga lire, ta di gava kongumweyi zendi.
19 Ngumweyi zendi ta mu pura asi: “Kupi ono ka toragwira neina? Mepya lyalye ono ka rugana? Karunga ngano a tungike ogu ana kulikida nkenda.” Rutu ta tantere ngumweyi zendi kuhamena muntu ogu ga rugene nendi. Age kwa tente asi: “Mugara ogu nina rugana nage edina lyendi Bowasa.”
20 Naomi makura ta tantere ngumweyi zendi asi: “Jehova ogu a likida nkenye apa eharo lyenene kovanamwenyo novafe, ngano a mu tungike.” Naomi ta twikire ko asi: “Mugara ogo ekoro lyetu. Age kuvhura kutugusa momaudigu.”
21 Rutu goMumowaba ta tanta asi: “Age kuna tantere nge ni kare novarugani vendi dogoro ngava mane kuteza.”
22 Naomi ta tantere ngumweyi zendi Rutu asi: “Munange, hansa kara novarugani vendi wovakadi mevango lyokuza mepya lyapeke va ka ku hepeke.”
23 Makura ta kara novarugani wovakadi vaBowasa, ta twikire kutoragura dogoro apa sa pwire siruwo sokuteza nombuto norukokotwa. Age ta twikire kukara nongumweyi zendi.
Nonkango dokonhi
^ Ndi “kupupura.”
^ Ndi “kukukwata.”
^ Ndi “momavava gendi.”
^ MoRuhebeli asi “koyiha yoe′phah zimwe.” Tara App. B14.
