Rutu 3:1-18
3 Naomi ta tantere ngumweyi zendi Rutu asi: “Munange tani ku paparere ko mugara, yipo o kare mombili.*
2 Bowasa ekoro lyetu, yige muhona govarugani vena ono rugana nawo. Masiku ganaina age ta hwaga nombuto dendi porupare.*
3 Zende o ka likuhwe nokukalikwita magadi gedumba lyewa, ove hena o ka dware* makura o ka ze oku ana kuhwagera. Ga ha kumona Bowasa ntudi dogoro konyima zapa na mana kulya nokunwa.
4 Apa na ka rara, ka tare nawa oku na ka rara makura o ka mu kudumune konompadi dendi yipo o ka rare. Age na ka kutantera eyi no rugana.”
5 Rutu makura ta limburura asi: “Nani rugana nayinye eyi ono tantere nge.”
6 Makura age ta zi korupare, ta ka rugana nayinye eyi ga mu tanterere ngumweyi zendi.
7 Bowasa ta li nokunwa makura ta hafa. Makura ta zi a ka rare kondambo zonombuto dendi. Konyima, Rutu ta wiza makura ta kudumuna konompadi daBowasa, ta rara.
8 Pokatji komasiku, Bowasa ta tameke kukankama makura ta pinduka, ta mono mukadi ana rara konompadi dendi.
9 Bowasa ta mu pura asi: “Nyove yilye?” Age ta limburura asi: “Nyame Rutu mukareli goge. Kudumika mukareli goge, yeeyi ove nyove gokutugusa momaudigu.”
10 Bowasa ta mu limburura asi: “Munange, Jehova ngano a ku tungike. Ove ono likida eharo lyenene sikando esi kupitakana pwanare, pokudira kupapara mugara mokatji kovadinkantu yi kare asi gongawo ndi goruhepo.
11 Munange, wa ha lipakera sinka. Nani kuruganena nayinye eyi ono hara, yeeyi vantu navenye womositata va kudiva asi ove mukadi gomuwa.
12 Ame kuvhura kumugusa momaudigu, nye pweli gumwe gekoro lyeni gokuvhura kumugusa momaudigu, age ekoro lyeni lyene-lyene.
13 Kara kooku masiku ganaina, nsene ngayi tambura, nawa tupu. Nye nsene kapi ana hara, tani gana kwaJehova Karunga gomunamwenyo asi, ngani kugusa momaudigu. Rara paapa dogoro ngurangura.”
14 Age ta rara konompadi daBowasa, komeho lise ta pinduka usimbu yipo va dire kumudimburura. Bowasa kapi ga here vantu va dive asi kweli mukadi ogu ana wiza korupare.
15 Bowasa ta mu tantere asi: “Reta sikoverero soge sokontunda o si kwaterere.” Rutu makura ta si kwaterere, ano Bowasa ta mu tulire po mbuto zokusika ponokilograma* dokoyiha 25 makura ta si mu tambeke, age makura ta ka za mositata.
16 Rutu ta zi kwangumweyi zendi Naomi, makura Naomi ta mu pura asi: “Ngapi yina ka kugenda po* munange?” Age ta mu tantere nayinye eyi ga rugene Bowasa.
17 Rutu ta tanta hena asi: “Age kuna penge nombuto dokusika ponokilograma dokoyiha 25 nokutantera nge asi ‘wa ha tengura mawoko-woko kwangumweyi zoge.’”
18 Naomi ta mu tantere asi: “Munange, hingira o ndindire eyi nayi horoka, morwa Bowasa na rugana ko yuma naina.”
Nonkango dokonhi
^ Ndi “nembo.”
^ Evango eli ava hwagere nombuto.
^ Ndi “o ka dware yikoverero yoge yokontunda.”
^ MoRuhebeli asi “yimeteso ntazimwe.” Nampo kwa tamba konoseah ntazimwe. Tara App. B14.
^ MoRuhebeli asi “Nyove yilye?”
