Rutu 4:1-22
4 Bowasa ta zi pevero lyositata, makura ta ka hingira. Age ta mono ekoro* lyaElimereki ogu ga tumbwire kuna kupita. Bowasa ta tanta asi: “Ove ngandi, wiza o ya hingire.” Age makura ta wiza ta ya hingire.
2 Bowasa ta zigida masimbi murongo gomositata, ta va tantere asi: “Hingireni.” Awo makura tava hingire.
3 Makura Bowasa ta tantere ekoro lyaElimereki asi: “Naomi ogu ga ka tengura komukunda gwaMowaba, kuna kurandesa epya lyaElimereki.
4 Yiyo nina gazara kuyakutantera o li rande komeho zomasimbi ntani novantu ava va tunga mositata esi. Mokumona asi nyove ekoro lyene-lyene lyaElimereki, li randa. Nye nsene kapi ono hara kuliranda tantera nge yipo ni li rande.” Makura age ta limburura asi: “Tani li randa.”
5 Bowasa makura ta uyunga asi: “Apa ngo randa epya kwaNaomi, wa hepa hena kuliranda kwaRutu mufisayendi goMumowaba, yipo upingwa wanakufa ngau twikire kukara medina lyendi.”
6 Ekoro lyaElimereki ta tanta asi: “Kapi tani vhuru kuliranda dogoro ni zonagwise upingwa wange. Tani ku pe epulisiro o li rande morwa ame kapi tani vhuru kuliranda.”
7 Eyi yiyo ngava rugana nare Vaisraeli nsene kuna kuranda ndi kuna kulisinta nkenye eyi: Muntu nga hutura sicamakaku* sendi nokusigava kwamukwawo monkedi ezi yimo ngava pameke elizuvhasano moIsraeli.
8 Apa gekoro lyaElimereki ga tanterere Bowasa asi: “Li randa, li kare lyoge” age kwa hutwire ko sicamakaku sendi.
9 Makura Bowasa ta tantere masimbi novantu navenye asi: “Naina one nombangi dange kweyi nina kuranda kwaNaomi upingwa naunye waElimereki nou waKiliyoni naMahironi.
10 Ame hena tani gusa Rutu goMumowaba mukadaMahironi a kare mukadange, yipo upingwa wanakufa u twikire kukara medina lyendi ntani yipo vekoro lyendi novantu womositata ngava dire kudivara edina lyendi. Naina one nombangi dange.”
11 Vantu navenye ava va kere pevero lyositata ntani nomasimbi tava tanta asi: “Ose nombangi doge, Jehova ngano a tungike mukadi ogu ana kuwiza membo lyoge yipo a kare ngwendi Rakera naReya, omu rwa tundilira rudi roVaisraeli. Ngano yi ku tompoke moEfurata nokudivikwa moBeterehema.
12 Epata lyoge ngano li kare ngwendi lyaPeresi munaTamara naJuda, kupitira movana ava nga ku pa Jehova nomukadi ogu gomunona.”
13 Makura Bowasa ta gusa Rutu a kare mukadendi. Ta ligwanekere nendi panyama, Jehova ta mu ninki a kare nezimo makura Rutu ta hampuruka munona gomumati.
14 Vakadi womoBeterehema tava tantere Naomi asi: “Jehova va mu hamberere ogu ga ku pa gokuvhura kukugusa moudigu. Ngano edina lyendi va li divise moIsraeli!
15 Age kuna kupe eparu lyepe ntani nga ku vatera moukurupe woge, morwa age* kwa mu reta ngumweyi zoge ogu ga ku hara ntani age ga pitakana vana ntambali wovagara.
16 Naomi ta gusa munona ta mu kwaterere nokumupakera mbili.
17 Makura vamusinda wovakadi tava mu ruku edina. Awo kwa tente asi: “Naomi ana hampuruka munona gomumati.” Awo makura tava mu ruku Obedi. Age guhyalsayi oguhwe vaNdafita.
18 Oru yiro ruvharo rwaPeresi: Peresi guhyaHesironi;
19 mwaHesironi Rama; mwaRama Aminadabu;
20 mwaAminadabu Nasoni; mwaNasoni Salimoni;
21 mwaSalimoni Bowasa; mwaBowasa Obedi;
22 mwaObedi lsayi; ano mwalsayi Ndafita.
Nonkango dokonhi
^ Ndi “gokuvhura kuvagusa momaudigu.”
^ Ndi “sicapa.”
^ Kwa tamba mutekurwa Naomi gomugara.
