Mbilive kwaTitusa 1:1-16
1 Mbilive ezi kuna kutunda kwaPaurusa mukareli gwaKarunga nomupositoli gwaJesus Kristusa ogu ga kara nepuro eli lya liza neli lyovahorowora vaKarunga ntani nediwo lyousili kuhamena kutjira Karunga.
2 Ediwo olyo kwa li tatekera kehuguvaro lyomwenyo gwanarunye. Karunga ogu a dili kutanta yimpempa, yige ga gu tu tumbwidira nare-nare
3 nye apa sa sikire mo siruwo sendi, age kwa divisire nonkango dendi kupitira mombudi zongwa. Ame kwa horowora nge ni divise mbudi ozo kuliza nompango zaKarunga, Muzowoli gwetu.
4 Ame kuna kukutjangera mbilive ezi ove Titusa ogu ga kara ngwendi munange mwene-mwene mepuro eli twa kara nalyo:
Ngano mbili nonkenda zonene zaKarunga Guhya ntani naJesus Kristusa Muzowoli gwetu, zi kare nove.
5 Ame kwa ku sigire moKereta o wapeke yininke eyi ya dilire kuvyuka nokuhorowora vakuronambunga tunda sitata zende sitata, moomu tupu na ku tanterere.
6 Mukuronambunga a kare ogu ga dira usima, a kare nomukadi gumwe ntani novana wovapuli ava va dira kukara nonkareso zondona* ndi zourwanesi.
7 Ngomukareli gwaKarunga, mupitisili a kare ogu ga dira usima, ga ha kara ndino ndi gokuhanduka usimbu ndi nkorwe ndi nyanya,* kapisi a kare ogu ga dowokera yimaliwa ndi gokukondjera uwa wamwene,
8 nye a kare ogu a tambura vagenda, ga hara yoyiwa, gonondunge, muhungami, mulimburukwi, gokulipangera,
9 a ronge kuliza nousili yipo a korangede* wopeke nerongo lyousili nokunyokera ava ava rwanesa erongo eli.
10 Yeeyi pwa kara vagara wovanzi wovarwanesi, awo vakavauki novakumbageli, unene po ava va kwaterera kweyi yovamba.
11 Va mwenekeda, yeeyi vagara ava kupukisa mapata gomanzi pokuronga yininke yepuko yipo va gwanene po mauwa.
12 Muporofete gwawo gumwe kwa tanta asi: “Vakereta vakumbageli, yikasama yonyanya, awo udwa ntani makurulya.”
13 Nonkango odo usili. Eyi yiyo no va tugumukilira unene yipo va kore mepuro
14 va dire kupurakena komasimwititi goyimpempa goVajuda ntani nokonompangera dovantu ava va siga usili.
15 Yininke nayinye kwa kuhuka kovantu ava va kuhuka, ano kwava va nyata ntani va dira epuro, kwato eyi ya kuhuka, yeeyi nondunge dawo nezwi lyawo lyokomutjima kwa nyata.
16 Awo kuuyunga asi va diva Karunga, nye yirugana yawo kulikida asi va mu nyoka, yeeyi awo vadona ntani kapi ava limburukwa ntani kapi ava vhuru kurugana yirugana yoyiwa.
Nonkango dokonhi
^ Ndi “zokudira kulipangera.”
^ Ndi “a uyunge nonkango dokukoresa.”
^ Ndi “rondore.”
