Mbilive kwaTitusa 2:1-15
2 Nye ove twikira kuronga erongo eli lya liza nerongo lyousili.
2 Vagara wovakurona ava lipangere mwanayinye, ava kare nononkedi donongwa, ava kare nonondunge, va kore mepuro, va hare wopeke ntani va lididimike.
3 Vakadi wovakurona nawo ava kare nonkareso ezi azi reta efumano kwaKarunga, kapisi va uyunge vakwawo momudona ndi va nwe vhinyu zonzi, nye va kare varongi veyi yoyiwa,
4 yipo va ronge* vakadi wovanona va hare vagara vawo novana vawo,
5 va kare nonondunge, va kuhuke, va pakere mbili mapata gawo,* va kare nonkareso zongwa, va limburukwe vagara vawo yipo nonkango daKarunga va dire kudiuyunga momudona.
6 Mokulifana, korangeda vagara wovadinkantu va kare nonondunge,
7 kara sihonena sosiwa mwanayinye eyi o rugana. Ronga eyi ya kuhuka nelituromo,
8 uyunga nonkango dousili edi nava dira kupatanesa yipo yi fise nomuga varwanesi, makura yi va limbe kutuuyunga momudona.
9 Vakareli va limburukwe vahekuru vawo mwanayinye, va kondje mokuvahafesa, kapisi va kare mutomonono,
10 ndi va vake yininke yawo, nye ava kare wokuhuguvara yipo va wapeke erongo lyaKarunga, Muzowoli gwetu.
11 Yeeyi nkenda zaKarunga zonene kwa zi likida yipo vantu navenye va va zowore.
12 Azo kuturonga tu nyokere po nayinye eyi ya dira kuliza nonompango daKarunga ntani nomadowo nagenye gomouzuni, tu kare nonondunge, tu hungame yipo tu karere Karunga mouzuni* ou,
13 siruwo esi tuna kundindira ehuguvaro lyewa ntani apa nga horoka Karunga Munankondo nadinye naJesus Kristusa Muzowoli gwetu mouyerere.
14 Age kwa ligeve mwene yipo a tu mangurure* koyirugana nayinye yoyidona noku tu kuhura yipo tu kare vantu vendi wokulikarera, tu rugane yirugana yoyiwa noupampi.
15 Twikira kuronga nokurondora* nokupukurura wopeke kuhamena yininke eyi, yeeyi ove wa kara nononkondo dokuyirugana. Wa ha va pulisira va kusense.
Nonkango dokonhi
^ Ndi “deure.”
^ Ndi “va rugane membo.”
^ MoRugereka asi “a tu zowore.”
^ Ndi “nokukorangeda.”
