Mbilive kwaTitusa 3:1-15
3 Twikira kuvadiworokesa va limburukwe komapangero nokovapangeli, yipo va liwapaikire kurugana yirugana yoyiwa.
2 Kapisi va uyunge wopeke momudona ndi va kare wokutanguna ndi wondino nye va kare nougomoki kwanavenye.
3 Ose kwa kere magova, kapi ngatu limburukwa, vantu ngava tu pukisa, ngatu kwama madowo gokulisiga-siga ntani ngatu hokwa kulihafesa, ngatu paruka eparu lyedona ntani ngatu nyenene yininke, kwa kere vantu wovadona ntani kwa linyenga-nyengere.
4 Nye apa Karunga Muzowoli gwetu ga likidire nkenda neharo kovantu,
5 (kapisi morwa yirugana yetu yoyiwa eyi twa rugana, nye morwa nkenda zendi) age kwa tu zowora pokutukuhura eyi yiyo ya tu ninkisa tu kare nomweyo ntani kwa ruganesa mpepo zendi zokupongoka mokutuninka tu kare wovape.
6 Age kwa tu powomwena mpepo zendi zonzi zokupongoka kupitira mwaJesus Kristusa Muzowoli gwetu.
7 Age kwa yi ruganenene eyi yipo tu kare nehuguvaro lyokukagwana mwenyo gwanarunye ogu ga tu tumbwidira. Ose ngatu ka gu gwana morwa nkenda zendi zonene ezi ga tu likida ezi azi mu ninkisa a tu tare asi ose vahungami.
8 Nonkango edi kuvhura kudihuguvara ntani nina hara o twikire kuvatantera yininke eyi yipo asi ava va pura mwaKarunga, magano gawo ga demenene koyirugana yoyiwa. Yininke eyi yiwa ntani kuretera vantu uwa.
9 Nye nyokereni po nompata dougova nonompata dokuhamena malikwamo gomazimo ntani nonompata kuhamena Veta, morwa yininke eyi kwato mulyo ntani kapi ayi reta uwa.
10 Muntu ogu a rongo erongo lyoyimpempa, mu ligoreni konyima zokumupukurura* sikando sokuhova ntani sauvali,
11 yeeyi muntu gwangoso kwa ligusa ko kousili, age kuzona ntani nonzo dendi kumupangura.
12 Apa ngani tuma Arutemasa ndi Tikikusi koge, ngo kondje o wize kwange moNikopolisi yeeyi oko yiko ngani ka kara pokufu.
13 Kondja o vatere Zenasa ogu ga diva nawa Veta naAporo yipo ngava dire kuhepa yuma morugendo rwawo.
14 Tantera vantu vetu va lironge kurugana yirugana yoyiwa, yipo va vatere poyiruwo yoyidigu, monkedi zangoso tava rugana yirugana yoyiwa.
15 Navenye ava vana kara name, vana mu kundisire po. Kundisireni po vapuli vakwetu ava va tu hara.
Ngano nkenda zaKarunga zonene zi kare none.
Nonkango dokonhi
^ Ndi “zokumurondora.”
