KoVaefeso 5:1-33
5 Yipo nye, honeneni Karunga, yeeyi one vana vendi wokuhara,
2 ntani twikireni kulikida eharo ngwendi moomu Kristusa ga tu* likida eharo nokuligava mwene ngonzambo zedumba lyewa kwaKarunga.
3 Nokuzogera si kuhamena yininke yoruhonda* nankenye tupu eyi yokunyata ndi yokuhamena komadowo gomadona, yeeyi kapi ya fira vapongoki,
4 ndi mu zogere yininke yonomuga ndi nonzogera dougova nonomuteu donondona, yininke eyi ya dira kuwapera, nye mevango lyoyo, pandureni Karunga.
5 Yeeyi mwa yi diva nawa-nawa asi kwato muntu goruhonda* ndi gonyata ndi gedowo ngwendi gogu a karere yikarunga yoyimpempa, nga pinga Uhompa waKristusa naKarunga.
6 Ga ha mu pukisa nkenye ogu nononkango doyimpempa, yeeyi yininke yangoso yiyo ngali wizira ehandu lyaKarunga kovantu ava ava dili kulimburukwa.
7 Yipo nye, mwa ha va honena,
8 yeeyi one nare kwa kere ngwendi mundema nye ngesi muna kara ngwendi uzera mwaHompa. Kareni ngovana womouzera,
9 yeeyi uzera owo kutuvatera tu kare nomutjima gomuwa mwanayinye nokurugana youhunga nokugenda monzira zouhunga.
10 Diviliseni nkenye apa asi yirugana yeni kuna kuhafesa Hompa
11 ntani hagekeni kulihameka moyirugana yokudira mulyo eyi ya hamena komundema nye yi tureni poruzera asi ayo yidona.
12 Yeeyi eyi ava rugana mokahore-hore, nampili kuyitumbura kooku, nomuga.
13 Uzera kutemena yininke nayinye yokudira kuhungama, monkedi ozo, yininke eyi ya dira kuhungama kuyihorora.
14 Yipo nye, Matjangwa gokupongoka kwa tanta asi: “One ava muna rara ngwendi kuna fu, pindukeni, makura Kristusa a mu temene.”
15 Yipo nye, takameseni asi mwa ha kara ngwendi magova nye kareni ngwendi vanandunge.
16 Ruganeseni nawa siruwo seni,* yeeyi mazuva aga tuna kuparuka madona.
17 Mokumona asi mazuva aga madona, hagekeni kukara ugova nye kwateni egano eyi ana mu harere Jehova mu rugane.
18 Ntani hena, mwa ha korwa vhinyu yeeyi azo kutwaredesa konkareso zondona* nye zureni mpepo zokupongoka.
19 Linkondopekeni nonomutango dokupongoka, oku tomu hamberere Karunga nokudimba nonsumo doukareli, dimbireni Jehova ngwendi kuna kusika nomusika monomutjima deni.
20 Pandureni nkenye apa Karunga Guhyetu kwanayinye medina lyaHompa gwetu, Jesus Kristusa.
21 Atu lilimburukweni morwa twa fumadeka unene Kristusa.
22 Nkenye mukadi a limburukwe kwamugara gwendi moomu a limburukwa Hompa,
23 yeeyi mugara yige mutwe gwamukadendi ngwendi moomu Kristusa ga kara mutwe gombungakriste, rutu rwendi, age muparuli gwaro.
24 Ngwendi moomu mbungakriste azi limburukwa Kristusa, nkenye mukadi nage a limburukwe kwamugara gwendi mwanayinye.
25 Nkenye mugara a hare mukadendi ngwendi moomu Kristusa ga here mbungakriste nokuligava mwene mwarwazo,
26 yipo azi lipongwere pokuzizeresa nomema, kutanta asi nonkango daKarunga,
27 makura yipo mbungakriste zi kare zina wapa kosipara sendi za hana kavadi ndi egonye ndi nkenye eyi tupu yangoso, nye zi pongoke za hana sipo.
28 Mokulifana, mugara nage ga hepa kuhara mukadendi ngwendi moomu ga hara rutu rwendi. Mugara ogu ga hara mukadendi, kwa lihara mwene,
29 yeeyi kwato ogu ga nyenga rutu rwamwene nye age kurupakera mbili ntani kuruhafera ngwendi moomu Kristusa a yi rugana kombungakriste
30 yeeyi ose maruha gorutu rwendi.
31 Etjangwa kwa tanta asi: “Eyi yiyo nye mugara a sigire oguhwe nozina, a hame* kwamukadendi, ano mouvali wawo tava kara rutu rumwe tupu.”
32 Sihoramo esi sinene. Ame kuna kuuyunga kuhamena Kristusa ntani mbungakriste.
33 Nye nkenye gumwe gweni ga hepa kuhara mukadendi moomu ga lihara mwene ano mukadi ga hepa kufumadeka unene mugara gwendi.
Nonkango dokonhi
^ Ndi nampo asi “ku.”
^ MoRugereka asi “lirandereni siruwo.”
^ Ndi “zokudira kulipangera.”
^ Ndi “a kare.”
