KoVafilipi 1:1-30
1 Mbilive ezi kuna kutunda kwaPaurusa naTimoteusa, vakareli vaJesus Kristusa, zi ze kovapongoki navenye womoFilipi ava va kara mouumwe naJesus Kristusa ntani kovatareli novakwafimbunga:
2 Karunga Guhyetu naHompa Jesus Kristusa ngano va mu fire nkenda unene nokumupa mbili.
3 Ame kupandura Karunga gwange nkenye apa ani mu diworoka.
4 Nkenye apa ani mu likwamberere po namuvenye, ame kuyirugana noruhafo
5 morwa one kwa kwatesa ko* mbudi zongwa kutunda apa mwa zi tambura dogoro ngesi.
6 Ame na kara nehuguvaro asi Karunga ogu ga tameka sirugana oso sosiwa mweni, ngasi sikisa mo dogoro kezuva lyaJesus Kristusa.
7 Ayo ya wapa kwange mokumugazara monkedi zangesi, yeeyi one kwa za nge komutjima, one kwa kwatesa nge ko apa na kere monomango ntani apa na poperere* mbudi zongwa komeho zovapangeli. Natuvenye kwa gwanena mo uwa monkenda zaKarunga zonene.
8 Yeeyi Karunga ga yi diva asi ame kuna kumurongora one namuvenye unene ntani kwa mu hara unene ngwendi moomu ga mu hara Jesus Kristusa.
9 Ame kutwikira kukanderera asi eharo lyeni li kure unene-nene mediwo lyousili nomonondunge nadinye,
10 yipo mu dive asi yipi yomulyo po unene, mu kuhuke ntani mu dire kupundukisa wopeke dogoro kezuva lyaKristusa,
11 ntani va mu zwide yiyimwa youhungami mevatero lyaJesus Kristusa, yipo Karunga a yererepere po noku fumanena po.
12 Vakwetu, nina hara mu dive asi ukaro wange kwa ninkisa mbudi zongwa zi lihane,
13 yeeyi vanomeni vahompa gwaRoma nanavenye, va zuvha asi ame kwa kara monomango morwa Kristusa.
14 Sinzi sovakwetu mwaHompa kwa gwana uradi kweyi va tura nge monomango ntani awo kuna kutwikira kuuyunga nonkango daKarunga va hana woma.
15 Vamwe kuna kuzuvhisa Kristusa morwa mfudu nonomutangu nye vamwe nositambo sosiwa.
16 Ava ava zuvhisa nositambo sosiwa kuna kuzuvhisa Kristusa morwa eharo, yeeyi va yi diva asi ame kwa horowora nge ni popere mbudi zongwa,
17 nye ava ava zuvhisa morwa mfudu nonomutangu, kapi ava yi rugana nositambo sosiwa, yeeyi awo kuna hara kuretera nge maudigu siruwo esi nina kara monomango.
18 Nye yitundwamo musinke ya kara? Vantu simpe kuna kuzuvha mbudi kuhamena Kristusa yi kare asi owo ava zi zuvhisa kuyirugana nositambo sosiwa ndi hawe, ano eyi kuhafesa nge. Yipo nye, ame ngani hafa ngorooro,
19 yeeyi na yi diva asi oyo ngayi ninkisa nge ni ka paruke morwa malikwambero geni ntani nevatero lyompepo zokupongoka ezi a gava Jesus Kristusa.
20 Eyi ya liza neyi na ndindira nononkondo ntani na kara nehuguvaro asi kwato eyi ngayi ninkisa nge ni life nomuga. Nye morwa ame kuuyunga na hana woma, yiyo nina kuyererepeka Kristusa moomu ngani yi rugana nare. Ame ngani mu yererepeka yi kare asi kuna kuparuka ndi kuna fu.
21 Yeeyi kwange ko nsene ni paruka, tani parukire mwaKristusa, ano nsene ni fa, tani gwanene mo uwa.
22 Nsene ni kara morutu oru ropanyama, ngani vhura kuruganena Kristusa momunene. Nye kapi nani mu tantera eyi nani horowora.
23 Ame kuna kara mompatakani zoyininke yivali eyi, yeeyi ame nina hara unene va mangurure nge yipo ni ka kare naKristusa, eyi yiyo yoyiwa po nye unene.
24 Nye nampili ngoso, ayo ya kara nomulyo kwange asi ni kare morutu ropanyama mwarweni.
25 Morwa eyi, ame ngani twikira kukara none namuvenye yipo mu twikire mosirugana seni kwaKarunga ntani yipo mu hafe mepuro lyeni.
26 Ano apa ngani tengura kweni, ruhafo rweni ngaru vhuke mwaJesus Kristusa.
27 Kareni monkedi ezi za liza nombudi zongwa kuhamena Kristusa yipo asi nampili ngani wize ni ya mu tare ndi hawe, ngani ya zuvhe asi one muna koro, muna kara negazaro limwe mouumwe nositambo simwe ngomu muna kukondjera epuro mombudi zongwa
28 ntani kapisi di mu tjilise nonkore deni. Oyo kuna kara umbangi kwawo noku kweni wokutunda kwaKarunga asi awo ngava va zonagura po, nye one ngava mu parura.
29 Yeeyi one kwa mu pa mpito kapisi asi yipo mu pure tupu mwaKristusa, nye mu hepere hena mwarwendi.
30 Yeeyi one kuna kukondja moomu ngani kondjo ame, ntani ame simpe kuna kukondja moomu muna kuyizuvha.
