KoVafilipi 2:1-30
2 Nsene mu likorangeda-korangeda morwa mwa kara mouumwe naKristusa nokulihengagwida-hengagwida morwa mwa lihara noku lipakera-pakera sinka nokukara nomalizuvho geharo nonkenda mokatji keni,
2 ayo ngano ngayi hafesa nge unene, nsene mu kara mouumwe nokulihara-hara ntani mu lize moyirugana nomomagazaro.
3 Mwa ha rugana yuma monomutangu ndi mokukondjera uwa wanyamweni, nye linunupikeni noku tara wopeke asi va mu pita mekuto.
4 Mwa ha kondjera tupu uwa wanyamweni nye kondjereni hena uwa wava wopeke.
5 Kareni nomagazaro ntani nonkareso ngwendi zezi ga kere nazo Jesus Kristusa.
6 Nampili ngomu ga kere ngwendi Karunga, kapi ga gazarere kugusa situmbukira sokuninka asi a hetakane naKarunga.
7 Nye age kwa sigire nayinye a ya kare muntu* ntani a ya kare ngwendi mupika.
8 Ntani hena, apa ga ya kere muntu, age kwa linunupikire nokulimburukwa dogoro nokonomfa dokositji* deedi.
9 Eyi yiyo Karunga ga mu zerwira noku mu pa situmbukira sosinene ntani age kwa mu pa edina eli lya pitakana madina gapeke,
10 yipo navenye vemeguru nava vepevhu nava va kara konhi zevhu* va tongeke nongoro medina lyaJesus,
11 ntani yipo navenye ngava dimburure asi Jesus Kristusa yige Hompa, yipo ngava yererepekere po oGuhwe, Karunga.
12 Yipo nye asi vakwetu wokuhara, ngamoomu tupu mwa limburukwa, kapisi paapa tupu ani kara po, nye unene po apa ani dili po, twikireni kukondjera ezoworo lyeni noutjirwe nekankamo.
13 Yeeyi Karunga yige a mu pe eharo nononkondo dokusikisa mo nayinye eyi ga hara.
14 Omu rugane nayinye mwa hana kuvhunguta nokutanguna,
15 yipo mu kuhuke nokudira unzoni ngovana vaKarunga, va hana kavadi* mokatji kovantu wokupenga nokupuka, mu teme ngwendi noramba mouzuni.
16 Kwaterereni unene kononkango deparu yipo ngani hafe mezuva lyaKristusa morwa na diva asi kapi na duka ndi ni rugane unene mawoko-woko.
17 Nampili ni ligave nyamwange ngwendi nzambo zoyikunwa ezi vana kutjira posizambero morwa kukwatesa ko sirugana sokupongoka, nina hafa unene kumwe none namuvenye, morwa epuro lyeni none lya mu tumangeda mu rugane eyi.
18 None mwa hepa kuhafa unene kumwe name.
19 Nsene asi Hompa Jesus ana yi panga, ntaantani ngani tume Timoteusa kweni yipo ngayi ya korangede nge apa ngani ya zuvha mbudi zokuhamena kweni.
20 Yeeyi kwato ogu ga kara nonkareso zongwa ngwendi zendi, ogu nga vhura kuyamupakera nawa mbili.
21 Yeeyi navenye kuna kukondjera tupu mauwa gavene, kapisi gaJesus Kristusa.
22 Nye one mwa diva sihonena sosiwa esi ga tura po, ngwendi moomu munona a rugana noguhwe, age kwa rugana name mokutwara mbudi zongwa komeho.
23 Yipo nye, age yige nina hara kutuma kweni apa tupu ngani diva eyi ngayi horokera nge.
24 Nina kara nehuguvaro mwaHompa asi name ntaantani ngani wize.
25 Nye ngesi ame kuna kugazara kumutumina mukwetu Epafuraditusa, age murugani mukwetu nomukwayita mukwetu. One kwa mu tuma kwange ngomukareli a ya vatere nge.
26 Age kuna hara unene kumumona namuvenye ntani ana guwu unene morwa mwa zuvha asi age kwa verere.
27 Nhi, age kwa verere dogoro kuhara kufa, nye Karunga ga mu fira nkenda, kapisi gelike tupu, nye hena name, yipo ni dire kuguva hena unene.
28 Yipo nye, ame kuna kumutuma kweni pangenderera yipo mu ya hafe hena ntani name ni dire kukara hena nosinka sosinene.
29 Mu tambureni nehafo moomu omu tambura varongwa vaHompa, vagara vangoso va fira kuvafumadeka unene
30 morwa nkare a fire sirugana saKristusa* pokutura eparu lyendi mosiponga yipo a vatere nge, one nokuvhura si kuyirugana eyi, morwa one pwato.
Nonkango dokonhi
^ MoRugereka asi “norutu ropasintu.”
^ Kutanta asi vafe ava ngava vhumbura.
^ Ndi “sipo.”
^ Ndi nampo asi “sirugana saHompa.”
